ദൃശ്യം’ എന്ന ബ്രഹ്മാണ്ഡ ചിത്രത്തിലൂടെ ആഗോളതലത്തിൽ ശ്രദ്ധിക്കപ്പെട്ട സംവിധായകനാണെങ്കിലും, സമീപകാല ചിത്രങ്ങളുടെ സാങ്കേതിക നിലവാരത്തെച്ചൊല്ലി സോഷ്യൽ മീഡിയയിൽ ഉയർന്ന വിമർശനങ്ങൾക്ക് മറുപടി നൽകുകയാണ് ജീത്തു ജോസഫ്. തന്റെ സിനിമകളുടെ മേക്കിംഗിനെ ‘സീരിയൽ ലെവൽ’ എന്ന് വിശേഷിപ്പിക്കുന്നത് ഉൾപ്പെടെയുള്ള കടുത്ത വിമർശനങ്ങളെക്കുറിച്ച് അദ്ദേഹം തുറന്നു സംസാരിച്ചു. സിനിമകൾ റിയലിസ്റ്റിക് ആയിരിക്കണമെന്ന തന്റെ നിർബന്ധമാണ് പലപ്പോഴും വിഷ്വലുകളിൽ മാറ്റം വരുത്താൻ കാരണം എന്നും, അത് തന്റെ സാങ്കേതിക പ്രവർത്തകരുടെ കുഴപ്പമല്ലെന്നും അദ്ദേഹം വ്യക്തമാക്കി.
സോഷ്യൽ മീഡിയയിൽ തന്നെ ബോധപൂർവം ടാർഗറ്റ് ചെയ്യുന്ന ഒരു വിഭാഗമുണ്ടെന്ന് ജീത്തു ജോസഫ് ആരോപിച്ചു. ഒരു സിനിമ റിലീസ് ചെയ്ത് ആദ്യ ഷോ കഴിയുമ്പോഴേക്കും സ്ഥിരമായി മോശം കമന്റുകൾ പ്രചരിപ്പിക്കുന്ന ചിലരെ താൻ കണ്ടെത്തിയെന്നും അദ്ദേഹം പറഞ്ഞു. ഇത്തരം തുടർച്ചയായ പ്രചരണങ്ങൾ കാണുന്ന പ്രേക്ഷകർ പതുക്കെ ബ്രെയിൻ വാഷ് ചെയ്യപ്പെടുകയാണ്. തന്റെ ഡ്രൈവർ പോലും ഇത്തരത്തിൽ സോഷ്യൽ മീഡിയയിലെ വാചകങ്ങൾ അതേപടി ആവർത്തിച്ച അനുഭവം അദ്ദേഹം പങ്കുവെച്ചു. വ്യക്തിപരമായ താൽപ്പര്യങ്ങൾ വെച്ചാണ് ചിലർ ഇത്തരം സൈബർ ആക്രമണങ്ങൾ നടത്തുന്നതെന്നും അദ്ദേഹം കൂട്ടിച്ചേർത്തു.
സിനിമയുടെ കാഴ്ചാസംസ്കാരം മാറിക്കൊണ്ടിരിക്കുകയാണെന്നും വിഷ്വൽ ക്വാളിറ്റി ഉയർത്തണമെന്ന പൊതു അഭിപ്രായം താൻ മാനിക്കുന്നുണ്ടെന്നും ജീത്തു ജോസഫ് പറഞ്ഞു. റിയലിസ്റ്റിക് ശൈലിക്ക് വേണ്ടി ആർട്ട് ഡിപ്പാർട്ട്മെന്റിനെ ഉൾപ്പെടെ നിയന്ത്രിക്കുന്ന രീതി താൻ ഇനി മാറ്റാൻ പോവുകയാണ്. പ്രേക്ഷകരുടെ ടേസ്റ്റ് അനുസരിച്ച് മാറാൻ തയ്യാറാണെന്നും ഇതിനായി നിലവിലുള്ള സാങ്കേതിക പ്രവർത്തകരെ മാറ്റേണ്ട ആവശ്യമില്ലെന്നും അദ്ദേഹം വ്യക്തമാക്കി. തന്റെ ഇൻപുട്ടുകൾ അനുസരിച്ചാണ് ടീം പ്രവർത്തിക്കുന്നത് എന്നതുകൊണ്ട് തന്നെ മാറ്റങ്ങൾ വരും ചിത്രങ്ങളിൽ പ്രകടമാകുമെന്നും അദ്ദേഹം പ്രത്യാശ പ്രകടിപ്പിച്ചു.
The post “അത് മേക്കിംഗിന്റെ കുഴപ്പമല്ല, എന്റെ ചോയ്സാണ്”; ടെക്നിക്കൽ ക്വാളിറ്റിയിലെ വിമർശനങ്ങൾക്ക് ജീത്തു ജോസഫിന്റെ മറുപടി appeared first on Express Kerala.
