പുതിയ സാങ്കേതിക വിദ്യകളോടും ഗാഡ്ജെറ്റുകളോടും തനിക്കുള്ള താൽപ്പര്യത്തെക്കുറിച്ച് മനസ് തുറന്ന് മെഗാസ്റ്റാർ മമ്മൂട്ടി. മമ്മൂട്ടി കമ്പനിയുടെ പുതിയ ചിത്രമായ ‘പേട്രിയറ്റിന്റെ’ വിശേഷങ്ങൾ പങ്കുവെക്കുന്നതിനിടെയാണ് താരം തന്റെ ടെക്നോളജി കമ്പത്തെക്കുറിച്ച് സംസാരിച്ചത്. പുതിയ ഫോണുകളോടും വാഹനങ്ങളോടുമൊക്കെയുള്ള തന്റെ താൽപ്പര്യം വെറുമൊരു ഉപഭോക്താവിന്റേത് മാത്രമാണെന്നും അതിനപ്പുറം വലിയ അറിവുള്ള സാങ്കേതിക വിദഗ്ധനല്ല താനെന്നും മമ്മൂട്ടി വ്യക്തമാക്കി. തന്നിൽ ഇപ്പോഴും വളരാതെ നിൽക്കുന്ന ഒരു കുട്ടിയുള്ളതുകൊണ്ടാണ് പുതിയ കളിപ്പാട്ടങ്ങളോട് തോന്നുന്നതുപോലുള്ള ഒരു ആവേശം ഗാഡ്ജെറ്റുകളോട് തോന്നുന്നതെന്ന് അദ്ദേഹം കൂട്ടിച്ചേർത്തു.
സിനിമയുമായി ബന്ധപ്പെട്ട് നിൽക്കുന്ന ആളായതുകൊണ്ട് വിഷ്വൽ ടെക്നോളജിയോടാണ് തനിക്ക് കൂടുതൽ താൽപ്പര്യമെന്ന് മമ്മൂട്ടി പറഞ്ഞു. പുതിയ കാര്യങ്ങൾ അറിയുമ്പോഴുണ്ടാകുന്ന കൗതുകവും ആശങ്കയും എല്ലാവരെയും പോലെ തനിക്കുമുണ്ട്. എന്നാൽ പുതിയ ടെക്നോളജികൾ കണ്ടുപിടിക്കാനുള്ള ബുദ്ധിയോ വിവരമോ തനിക്കുണ്ടെന്ന ധാരണ ആർക്കെങ്കിലും ഉണ്ടെങ്കിൽ അത് തിരുത്തേണ്ട കാലമായെന്നും അദ്ദേഹം തമാശരൂപേണ പറഞ്ഞു.
Also Read: ‘പേട്രിയറ്റ്’ നാളെ വെള്ളിത്തിരയിൽ; റിലീസ് തലേന്ന് ഇൻസ്റ്റാഗ്രാമിൽ ആവേശം വിതറി മമ്മൂട്ടിയും മോഹൻലാലും
തന്റെ പുതിയ ചിത്രമായ ‘പേട്രിയറ്റ്’ കൈകാര്യം ചെയ്യുന്ന വിഷയത്തെക്കുറിച്ചും മമ്മൂട്ടി സംസാരിച്ചു. ഇൻഫർമേഷൻ ടെക്നോളജിയുമായി ബന്ധപ്പെട്ട, ഭാവിയിൽ നമ്മൾ വളരെ ശ്രദ്ധയോടെ കൈകാര്യം ചെയ്യേണ്ട ഗൗരവകരമായ ഒരു വിഷയമാണ് ചിത്രം ചർച്ച ചെയ്യുന്നത്. ഇതൊരു പ്രൊപ്പഗണ്ട സിനിമയല്ലെന്നും, പുതിയ കാലത്ത് സാങ്കേതിക വിദ്യകൾ ദുരുപയോഗം ചെയ്യപ്പെടാൻ സാധ്യതയുള്ള കാര്യങ്ങളെക്കുറിച്ച് ബോധവൽക്കരണം നൽകുന്ന സിനിമയാണെന്നും അദ്ദേഹം പറഞ്ഞു. പതിവ് ശൈലിയിലുള്ള കഥയല്ല ചിത്രം പറയുന്നതെന്നും മമ്മൂട്ടി വ്യക്തമാക്കി.
The post “ആ ധാരണ തിരുത്താൻ കാലമായി”; വിഷ്വൽ ടെക്നോളജിയോടുള്ള ഇഷ്ടം വെളിപ്പെടുത്തി മെഗാസ്റ്റാർ appeared first on Express Kerala.
