ദുബായ്: യു.എ.ഇ. കേന്ദ്രമാക്കി പ്രവർത്തിക്കുന്ന ലോകത്തെ ഏറ്റവും വലിയ അതിസമ്പന്നരുടെ പുതിയ പട്ടിക ഫോർബ്സ് മിഡിൽ ഈസ്റ്റ് പുറത്തുവിട്ടു. ആഗോള ക്രിപ്റ്റോകറൻസി വിപണിയിലെ കരുത്തനായ ബിനാൻസ് സ്ഥാപകൻ ചാങ്പെങ് ഷാവോയാണ് 110 ബില്യൺ ഡോളർ ആസ്തിയോടെ പട്ടികയിൽ ഒന്നാം സ്ഥാനം കരസ്ഥമാക്കിയത്. യു.എ.ഇ.യുടെ സാമ്പത്തിക വളർച്ചയിൽ നിർണ്ണായക പങ്കുവഹിക്കുന്ന വിദേശി നിക്ഷേപകരെയും സംരംഭകരെയുമാണ് ഈ റാങ്കിംഗിൽ ഉൾപ്പെടുത്തിയിരിക്കുന്നത്. റീട്ടെയിൽ, നിർമ്മാണം, റിയൽ എസ്റ്റേറ്റ്, ആരോഗ്യം, വിദ്യാഭ്യാസം തുടങ്ങിയ വിവിധ മേഖലകളിലെ പ്രകടനം വിലയിരുത്തിയാണ് ഈ പട്ടിക തയ്യാറാക്കിയിരിക്കുന്നത്.
പട്ടികയിലെ ഇന്ത്യക്കാരുടെ സാന്നിധ്യത്തിൽ ലുലു ഗ്രൂപ്പ് ചെയർമാൻ എം.എ. യൂസഫലി ഏറ്റവും സമ്പന്നനായ മലയാളിയായി വീണ്ടും തിരഞ്ഞെടുക്കപ്പെട്ടു. 5.8 ബില്യൺ ഡോളർ ആസ്തിയുള്ള അദ്ദേഹം പട്ടികയിൽ ആറാം സ്ഥാനത്താണുള്ളത്. ഗൗതം അദാനിയുടെ മൂത്ത സഹോദരൻ വിനോദ് അദാനിയാണ് 20.8 ബില്യൺ ഡോളർ ആസ്തിയോടെ പട്ടികയിൽ രണ്ടാമത്. റഷ്യൻ സ്വദേശിയും എനർജി കമ്പനിയായ SUEK-ന്റെ സ്ഥാപകനുമായ ആൻഡ്രി മെൽനിചെങ്കോ 20.4 ബില്യൺ ഡോളറുമായി മൂന്നാം സ്ഥാനത്തെത്തി.
Also Read: ഹജ്ജ് രേഖകളിൽ കൃത്രിമം! 18 വിദേശികൾ പിടിയിൽ, കർശന പരിശോധനയുമായി സുരക്ഷാ സേന
ഇന്ത്യൻ വംശജരുടെ വലിയൊരു നിര തന്നെ ഇത്തവണയും ഫോർബ്സ് പട്ടികയിൽ ഇടംപിടിച്ചിട്ടുണ്ട്. ലാൻഡ്മാർക്ക് ഗ്രൂപ്പ് ചെയർവുമൺ രേണുക ജഗതിയാനി, ആർ.പി. ഗ്രൂപ്പ് സ്ഥാപകൻ രവി പിള്ള, ജെംസ് എജുക്കേഷൻ മേധാവി സണ്ണി വർക്കി, ശോഭ ഗ്രൂപ്പ് സ്ഥാപകൻ പി.എ.സി. മേനോൻ, ബുർജീൽ ഹോൾഡിങ്സ് ചെയർമാൻ ഷംഷീർ വയലിൽ എന്നിവരാണ് പട്ടികയിലുള്ള മറ്റ് പ്രമുഖ ഇന്ത്യക്കാർ. ആകെ ഒൻപത് ഇന്ത്യക്കാരാണ് ഇത്തവണ ആദ്യ സ്ഥാനങ്ങളിൽ ഇടം നേടിയത്. ഇവരുടെ ആകെ ആസ്തി 49.9 ബില്യൺ ഡോളറോളം വരും.
യുവസംരംഭകരുടെ സാന്നിധ്യവും ഇത്തവണത്തെ പട്ടികയെ ശ്രദ്ധേയമാക്കുന്നു. ടെലഗ്രാം സ്ഥാപകൻ പവെൽ ദുറോവ്, ഫിൻടെക് കമ്പനിയായ റിവൊലുട് സ്ഥാപകൻ നിക് സ്റ്റോറോൻസ്കി എന്നിവരാണ് പട്ടികയിലെ പ്രായം കുറഞ്ഞ അതിസമ്പന്നർ, 41 വയസ്സാണ് ഇവരുടെ പ്രായം. അതേസമയം, 81 വയസ്സുള്ള ത്രിവേണി ഗ്രൂപ്പ് ചെയർമാൻ ധ്രുവ് സാഹ്നിയാണ് പട്ടികയിലെ ഏറ്റവും പ്രായം കൂടിയ വ്യക്തി. റിയൽ എസ്റ്റേറ്റ്, നിക്ഷേപ മേഖലകളിൽ നിന്നുള്ളവരുടെ മാത്രം ആസ്തി 136.3 ബില്യൺ ഡോളറാണെന്നത് യു.എ.ഇ.യിലെ ഈ മേഖലകളുടെ വളർച്ചയെ അടിവരയിടുന്നു.
The post യു.എ.ഇ.യിലെ ശതകോടീശ്വരന്മാരിൽ ഇന്ത്യക്കാരുടെ പടയോട്ടം; വിനോദ് അദാനിയും യൂസഫലിയും പട്ടികയിൽ മുന്നിൽ appeared first on Express Kerala.
