തൃശൂര്: പ്രമുഖ സസ്യശാസ്ത്രജ്ഞന് ഡോ. കെ.എസ്. മണിലാല്(86) അന്തരിച്ചു. തൃശൂരിലെ സ്വകാര്യ ആശുപത്രിയിലായിരുന്നു അന്ത്യം. ഏറെനാളുകളായി രോഗബാധിതനായി ചികിത്സയിലായിരുന്നു. കേരളത്തിലെ സസ്യ സമ്പത്തിനെക്കുറിച്ചുള്ള ഹോർത്തൂസ് മലബാറിക്കസ് എന്ന പ്രാചീന ലാറ്റിന്ഗ്രന്ഥം ഇംഗ്ലീഷിലേക്കും മലയാളത്തിലേക്കും വിവർത്തനം ചെയ്തിരുന്നു.
2020ൽ രാജ്യം മണിലാലിനെ പത്മശ്രീ പുരസ്കാരം നൽകി ആദരിച്ചിരുന്നു. സംസ്കാരം ബുധനാഴ്ച വൈകുന്നേരം മൂന്ന് മണിക്ക് തൃശൂരിലെ വടൂക്കര ശ്രീനാരായണ സമാജം ശ്മശാനത്തില് നടക്കും. കാലിക്കറ്റ് സര്വകലാശാലയിലെ ബോട്ടണി വകുപ്പ് മുന്മേധാവിയുമായിരുന്നു കാട്ടുങ്ങല് സുബ്രഹ്മണ്യം മണിലാല് എന്ന കെ.എസ്.മണിലാല്. കോഴിക്കോട്ടെയും സൈലന്റ് വാലിയിലെയും സസ്യവൈവിധ്യത്തെക്കുറിച്ച് മണിലാലിന്റെ നേതൃത്വത്തില് നടന്ന വര്ഷങ്ങള് നീണ്ട പഠനങ്ങളും പ്രസിദ്ധമാണ്.
കാട്ടുങ്ങല് എ.സുബ്രഹ്മണ്യത്തിന്റെയും കെ.കെ.ദേവകിയുടെയും മകനായി 1938 സപ്തംബര് 17ന് പറവൂര് വടക്കേക്കരയിലായിരുന്നു ജനനം. എറണാകുളം മഹാരാജാസ് കോളേജില്നിന്ന് ബിരുദപഠനം പൂര്ത്തിയാക്കിയശേഷം മധ്യപ്രദേശിലെ സാഗര് സര്വകലാശാലയില് നിന്ന് 1964 ല് സസ്യശാസ്ത്രത്തില് പി.എച്ച്.ഡി.നേടി. ആ വര്ഷംതന്നെ കേരള സര്വകലാശാലയുടെ കാലിക്കറ്റ് സെന്ററില് ബോട്ടണി വകുപ്പില് അധ്യാപനായി ചേര്ന്ന അദ്ദേഹം, പിന്നീട് കാലിക്കറ്റ് സര്വകലാശാല നിലവില് വന്നപ്പോള് അവിടെ ബോട്ടണി വകുപ്പിന്റെ ഭാഗമായി. 1976 ല് പ്രൊഫസറായി സ്ഥാനക്കയറ്റം കിട്ടിയ മണിലാല്, 1986 ല് സീനിയര് പ്രൊഫസറും വകുപ്പ് മേധാവിയുമായി.
‘റോയല് സൊസൈറ്റി നഫീല്ഡ് ഫൗണ്ടേഷന് ഫെലോ’ ആയി തിരഞ്ഞെടുക്കപ്പെട്ട മണിലാല് 1971 ല് ബ്രിട്ടനില് സസ്യശാസ്ത്ര ഗവേഷണം നടത്തി. ഹോര്ത്തൂസ് ഇംഗ്ലീഷ്, മലയാളം പതിപ്പുകള് ഉള്പ്പടെ ഒരു ഡസനിലേറെ ഗ്രന്ഥങ്ങള് മണിലാല് രചിച്ചിട്ടുണ്ട്. ‘ഫ്ളോറ ഓഫ് കാലിക്കറ്റ്'(1982), ‘ഫ്ളോറ ഓഫ് സൈലന്റ് വാലി’ (1988), ‘ബോട്ടണി ആന്ഡ് ഹിസ്റ്ററി ഓഫ് ഹോര്ത്തൂസ് മലബാറിക്കൂസ്'(1980), ‘ആന് ഇന്റര്പ്രട്ടേഷന് ഓഫ് വാന് റീഡ്സ് ഹോര്ത്തൂസ് മലബാറിക്കൂസ്'(1988), ‘ഹോര്ത്തൂസ് മലബാറിക്കൂസ് ആന്ഡ് ദി സോഷ്യോ-കള്ച്ചറല് ഹെറിറ്റേജ് ഓഫ് ഇന്ത്യ’ (2012) എന്നീ ഗ്രന്ഥങ്ങള് അതില് ഉള്പ്പെടുന്നു.
200 ലേറെ ഗവേഷണ പ്രബന്ധങ്ങള് പ്രസിദ്ധീകരിച്ചിട്ടുള്ള മണിലാല്, 19 പുതിയ സസ്യയിനങ്ങളെ ശാസ്ത്രലോകത്തിന് പരിചയപ്പെടുത്തി. നാല് സസ്യയിനങ്ങള് അദ്ദേഹത്തിന്റെ പേരിലാണ് അറിയപ്പെടുന്നത്. സസ്യവര്ഗീകരണ ശാസ്ത്രത്തിന് നല്കിയ സമഗ്ര സംഭാവനകള് മുന്നിര്ത്തി 2003ൽ കേന്ദ്ര വനം-പരിസ്ഥിതി മന്ത്രാലയം ഇ.കെ.ജാനകി അമ്മാള് പുരസ്കാരവും സമ്മാനിച്ചിട്ടുണ്ട്.
നെതര്ലന്ഡ്സിന്റെ ഉന്നത സിവിലിയന് പുരസ്കാരമായ ‘ഓഫീസര് ഇന് ദ ഓര്ഡര് ഓഫ് ഓറഞ്ച്നാസ്സൗ’ 2012 ല് മണിലാലിനെ തേടിയെത്തി. ഈ പുരസ്കാരം ലഭിക്കുന്ന ആദ്യ ഏഷ്യക്കാരനാണ് മണിലാല്. കൂടാതെ, ഇന്ത്യന് ബൊട്ടാണിക്കല് സൊസൈറ്റിയുടെ ‘വിശ്വംഭര് പുരി മെഡല്’ (1990), ഇന്ത്യന് അസോസിയേഷന് ഫോര് ആന്ജിയോസ്പേം ടാക്സോണമി ഏര്പ്പെടുത്തിയിട്ടുള്ള ‘വൈ.ഡി.ത്യാഗി ഗോള്ഡ് മെഡല്’ (1998) എന്നിവയും ലഭിച്ചിട്ടുണ്ട്. ഇന്ത്യന് ബൊട്ടാണിക്കല് സൊസൈറ്റിയുടെ പ്രസിഡന്റായി 1999 ല് അദ്ദേഹം തിരഞ്ഞെടുക്കപ്പെട്ടു. സംഘടനയുടെ ട്രഷറര് ആയും (1984-1986) പ്രവര്ത്തിച്ചിട്ടുണ്ട്.
ഭാര്യ: ജ്യോത്സ്ന. മകൾ: അനിത. മരുമകൻ: കെ.പി.പ്രീതന്.
