കണ്ണൂർ ∙ തളാപ്പ് മക്കാനിക്ക് സമീപം ദേശീയ പാതയിൽ ബൈക്ക് നിയന്ത്രണം വിട്ട് ഡിവൈഡറിൽ ഇടിച്ച് മറിഞ്ഞുണ്ടായ അപകടത്തിൽ യുവാവ് മരിച്ചു. പറശിനിക്കടവ് നണിച്ചേരി സ്വദേശി രാഹുൽ കല്ലൂരി (40) ആണ് മരിച്ചത്. രാത്രി 12 മണിയോടെയായിരുന്നു സംഭവം. കണ്ണൂർ ടൗൺ ഭാഗത്ത് നിന്ന് പറശിനിക്കടവ് ഭാഗത്തേക്ക് പോകുന്നതിനിടെ റോഡിലെ ഡിവൈഡറിൽ ഇടിച്ചാണ് അപകടം ഉണ്ടായത്.
ഇടിയുടെ ആഘാതത്തിൽ സമീപത്തു കൂടി കടന്നു പോവുകയായിരുന്നു ലോറിയുടെ അടിയിലേക്ക് യുവാവ് തെറിച്ചു വീണു. വയറിനും തലയ്ക്കും സാരമായി പരുക്കേറ്റ രാഹുൽ സംഭവസ്ഥലത്ത് വച്ച് തന്നെ മരിച്ചു. മൃതദേഹം എകെജി ആശുപത്രി മോർച്ചറിയിലേക്ക് മാറ്റി. കണ്ണൂർ ടൗൺ പൊലീസ് സ്ഥലത്തെത്തി തുടർ നടപടികൾ സ്വീകരിച്ചു.
വെള്ളിയാഴ്ച രാത്രി തലശ്ശേരി, ചിറക്കര, പള്ളിത്താഴയില്‍ ബൈക്കുകള്‍ കൂട്ടിയിടിച്ചുണ്ടായ അപകടത്തില്‍ പൊന്ന്യം, കുണ്ടുചിറയിലെ മുസമ്മില്‍ (30) മരിച്ചു. റോഡിലേക്ക് തെറിച്ചു വീണ മുസമ്മലിന്റെ ദേഹത്തു കൂടി അതുവഴിയെത്തിയ കാര്‍ കയറിയിറങ്ങിയാണ് മരണം സംഭവിച്ചത്. അലി-ബുഷ്‌റ ദമ്പതികളുടെ മകനാണ് മുസമ്മില്‍. മകന്‍: ഐദിന്‍ ആദം. സഹോദരങ്ങള്‍: ഫാത്തിമത്തില്‍ നൂറ, ഫാത്തിമത്തില്‍ ഉസ്‌ന.
