തിരുവനന്തപുരം: സപ്ലൈകോയുടെ വില്‍പ്പനശാലകളില്‍ നിന്നും 2025 സെപ്റ്റംബര്‍ 3, 4 തീയതികളില്‍ 1500 രൂപയ്ക്കോ അതില്‍ അധികമോ സബ്സിഡി ഇതര ഉത്പന്നങ്ങള്‍ വാങ്ങുന്ന ഉപഭോക്താക്കള്‍ക്ക് ഒരു ലിറ്ററിന് 389 വിലയുള്ള വെളിച്ചെണ്ണ 339 രൂപ വിലയ്ക്ക് അതായത് ഒരു ലിറ്ററിന് 50 രൂപ വിലക്കുറവില്‍ സ്പെഷ്യല്‍ ഓഫറായി ലഭിക്കുന്നതാണ്.
അതെ സമയം, ഈ ഓണക്കാലത്ത് റെക്കോർഡ് വിൽപ്പനയാണ് സപ്ലൈകോ കൈവരിച്ചത്. 300 കോടി രൂപയുടെ വിൽപ്പനയാണ് സപ്ലൈകോ ഈ വർഷം ലക്ഷ്യമിട്ടിരുന്നതെങ്കിലും, ഇതുവരെ 319.3 കോടി രൂപയുടെ ഉൽപ്പന്നങ്ങളാണ് വിറ്റഴിച്ചത്. കഴിഞ്ഞ ദിവസത്തെ മാത്രം വിൽപ്പന 21 കോടിയിലധികം രൂപയെന്നത് സപ്ലൈകോയുടെ ചരിത്രത്തിലെ ഏറ്റവും ഉയർന്ന പ്രതിദിന വിൽപ്പനയാണ്. ഏകദേശം 49 ലക്ഷം ഉപഭോക്താക്കളാണ് ഓണക്കാലത്ത് സപ്ലൈകോയുടെ വിൽപ്പനശാലകൾ സന്ദർശിച്ചത്.
ALSO READ: എങ്ങോട്ടാ ഈ പോക്ക്! സ്വര്‍ണ വില 78,000ത്തിന് അരികെ
സംസ്ഥാന സർക്കാർ സമയബന്ധിതമായി വിപണിയിൽ നടത്തിയ ഇടപെടലുകളാണ് വിലക്കയറ്റം നിയന്ത്രിക്കാനും അവശ്യസാധനങ്ങൾ സുലഭമായി ലഭ്യമാക്കാനും സഹായിച്ചതെന്ന് ഭക്ഷ്യ, പൊതുവിതരണ വകുപ്പ് മന്ത്രി ജി.ആർ. അനിൽ പറഞ്ഞു. ഒരു ഉപഭോക്തൃ സംസ്ഥാനമായ കേരളത്തിൽ ഉത്സവകാലങ്ങളിൽ സാധാരണയായി ഭക്ഷ്യവസ്തുക്കൾക്ക് വില കൂടാൻ സാധ്യതയുണ്ട്. എന്നാൽ ഈ സാഹചര്യം മുൻകൂട്ടി കണ്ട് സപ്ലൈകോയും പൊതുവിതരണ വകുപ്പും വിപണിയിൽ ഫലപ്രദമായി ഇടപെട്ടത് ജനങ്ങൾക്ക് വലിയ ആശ്വാസമായി.
സാധാരണയായി റേഷൻ കാർഡിന് 8 കിലോഗ്രാം അരിയാണ് സബ്സിഡി നിരക്കിൽ സപ്ലൈകോ വഴി ലഭിച്ചിരുന്നത്. ഓണത്തോടനുബന്ധിച്ച് ഇതിനു പുറമേ 25 രൂപ നിരക്കിൽ 20 കിലോഗ്രാം പച്ചരിയോ പുഴുക്കലരിയോ പ്രത്യേകമായി നൽകി. ഈ മാസം മാത്രം 92.8 ലക്ഷം കിലോഗ്രാം അരിയാണ് ഇങ്ങനെ വിറ്റഴിച്ചത്. പ്രമുഖ റീട്ടെയിൽ ശൃംഖലകളോട് മത്സരിക്കാൻ കഴിയുന്ന തരത്തിൽ ഇത്തവണ ബ്രാൻഡഡ് എഫ്.എം.സി.ജി. (FMCG) ഉൽപ്പന്നങ്ങളുടെ വലിയ ശേഖരം സപ്ലൈകോ ഒരുക്കിയിരുന്നു. 250-ൽ അധികം ബ്രാൻഡഡ് ഉൽപ്പന്നങ്ങൾക്ക് പ്രത്യേക വിലക്കുറവും ഓഫറുകളും ഓണത്തിന് നൽകി. സപ്ലൈകോ പുറത്തിറക്കിയ ‘ഓണം ഗിഫ്റ്റ്’ പദ്ധതിക്കും മികച്ച പ്രതികരണമാണ് ലഭിച്ചതെന്ന് മന്ത്രി അറിയിച്ചു.
The post സെപ്റ്റംബര്‍ 3, 4 തീയതികളില്‍ സപ്ലൈകോയിൽ സ്പെഷ്യല്‍ ഓഫർ! appeared first on Express Kerala.
