ചെന്നൈ: തമിഴ്നാട് രാഷ്ട്രീയത്തിൽ വിജയ്യുടെ തമിഴക വെട്രി കഴകവും ഡിഎംകെയും തമ്മിലാണ് പ്രധാന പോരാട്ടമെന്ന വാദത്തെ തള്ളിക്കളഞ്ഞ് ഉപമുഖ്യമന്ത്രി ഉദയനിധി സ്റ്റാലിൻ. വരാനിരിക്കുന്ന നിയമസഭാ തിരഞ്ഞെടുപ്പിൽ ഡിഎംകെയുടെ പ്രധാന എതിരാളി എഐഎഡിഎംകെ (AIADMK) തന്നെയാണെന്ന് ഉദയനിധി വ്യക്തമാക്കി. ഒരു പ്രമുഖ ദിനപത്രത്തിന് നൽകിയ അഭിമുഖത്തിലാണ് അദ്ദേഹം നിലപാട് വ്യക്തമാക്കിയത്.
എതിരാളി എഐഎഡിഎംകെ തന്നെ
വിജയ്യുടെ പേര് നേരിട്ട് പരാമർശിക്കാതെയായിരുന്നു ഉദയനിധിയുടെ മറുപടി. എഐഎഡിഎംകെ നിലവിൽ ദുർബലമാണെങ്കിലും സംസ്ഥാനത്തെ പ്രധാന പ്രതിപക്ഷ കക്ഷി അവർ തന്നെയാണെന്ന് ഉദയനിധി പറഞ്ഞു. ബിജെപിയെയും ബിജെപിയുടെ ‘ബി’ ടീമുകളെയും ഡിഎംകെ പരാജയപ്പെടുത്തുമെന്നും അദ്ദേഹം കൂട്ടിച്ചേർത്തു. കഴിഞ്ഞ ദിവസം നടന്ന ടിവികെ സമ്മേളനത്തിൽ, ഡിഎംകെയാണ് തങ്ങളുടെ പ്രധാന രാഷ്ട്രീയ ശത്രുവെന്ന് വിജയ് പ്രഖ്യാപിച്ചിരുന്നു. ഇതിനുള്ള പരോക്ഷ മറുപടിയായാണ് ഉദയനിധിയുടെ വാക്കുകൾ വിലയിരുത്തപ്പെടുന്നത്.
Also Read: തിരഞ്ഞെടുപ്പ് ഗോദയിലേക്ക് സുധാകരനും മുല്ലപ്പള്ളിയും? പാർട്ടി പറഞ്ഞാൽ മത്സരിക്കാൻ തയ്യാർ
രാഷ്ട്രീയ തന്ത്രം
പുതുതായി രാഷ്ട്രീയത്തിലിറങ്ങിയ വിജയ്യുടെ പാർട്ടിയെ പ്രധാന എതിരാളിയായി അംഗീകരിക്കാൻ ഡിഎംകെ തയ്യാറല്ലെന്ന സൂചനയാണ് ഉദയനിധി നൽകുന്നത്. വിജയ്യുടെ രാഷ്ട്രീയ പ്രവേശനത്തെ കുറിച്ച് നേരിട്ടുള്ള ചോദ്യങ്ങൾ അഭിമുഖത്തിൽ ഉണ്ടായിരുന്നില്ലെങ്കിലും, ബിജെപിയുടെ ബി ടീം എന്ന് വിശേഷിപ്പിച്ചത് ടിവികെയെ ഉദ്ദേശിച്ചാണെന്ന ചർച്ചകൾ തമിഴ് രാഷ്ട്രീയത്തിൽ സജീവമായിട്ടുണ്ട്.
The post വിജയ് അല്ല എതിരാളി! തമിഴ്നാട്ടിൽ ഡിഎംകെ നേരിടുന്നത് ആരെ? നിലപാട് വ്യക്തമാക്കി ഉദയനിധി സ്റ്റാലിൻ appeared first on Express Kerala.
