ന്യൂസിലൻഡിനെതിരായ ഏകദിന പരമ്പരയ്ക്കുള്ള ഇന്ത്യൻ ടീം പ്രഖ്യാപനം ചർച്ചയാകുന്നത് സെലക്ഷനിലെ ചില കടുത്ത തീരുമാനങ്ങൾ കൊണ്ടാണ്. അവസാന ഏകദിനത്തിൽ സെഞ്ച്വറി നേടിയിട്ടും റുതുരാജ് ഗെയ്ക്വാദിന് ടീമിന് പുറത്തുപോകേണ്ടി വന്നതും, മികച്ച ഫോമിലുള്ള യശസ്വി ജയ്സ്വാളിന് പുറത്തിരിക്കേണ്ടി വരുന്നതും ആരാധകർക്കിടയിൽ പ്രതിഷേധമുയർത്തുന്നുണ്ട്. രോഹിത് ശർമ്മ – വിരാട് കോഹ്ലി സഖ്യത്തിന്റെ (രോ-കോ) മടങ്ങിവരവും ശുഭ്മാൻ ഗിൽ, ശ്രേയസ് അയ്യർ എന്നിവരുടെ തിരിച്ചുവരവുമാണ് ടീമിലെ പ്രധാന മാറ്റങ്ങൾ. എന്നാൽ ഈ പരമ്പര ഏറ്റവും നിർണ്ണായകമാകുന്നത് ഗില്ലിനും ശ്രേയസിനും തന്നെയാണ്.
കഴിഞ്ഞ കുറച്ചു കാലമായി വലിയ വിമർശനങ്ങളിലൂടെയാണ് ഇന്ത്യൻ ക്രിക്കറ്റിലെ ഭാവി നായകനെന്ന് വിശേഷിപ്പിക്കപ്പെടുന്ന ശുഭ്മാൻ ഗിൽ കടന്നുപോകുന്നത്. അഞ്ച് മാസം മുൻപ് ടി20 ടീമിൽ ഉപനായകനായി എത്തിയ ഗില്ലിന്, മോശം സ്ട്രൈക്ക് റേറ്റിന്റെയും ഫോമില്ലായ്മയുടെയും പേരിൽ ടീമിൽ നിന്ന് പുറത്തുപോകേണ്ടി വന്നു. ഏകദിന ഫോർമാറ്റിലും സ്ഥിതി വ്യത്യസ്തമല്ല. 2025 ചാമ്പ്യൻസ് ട്രോഫിയിൽ പാകിസ്ഥാനെതിരെ നേടിയ റൺസിന് ശേഷം കളിച്ച ആറ് ഇന്നിങ്സുകളിൽ ഗില്ലിന് തിളങ്ങാനായിട്ടില്ല. ഓസ്ട്രേലിയൻ പര്യടനത്തിലെ മൂന്ന് മത്സരങ്ങളിൽ നിന്ന് വെറും 43 റൺസ് മാത്രമാണ് സമ്പാദ്യം. 2027 ലോകകപ്പിൽ ഇന്ത്യയെ നയിക്കാൻ സാധ്യതയുള്ള താരം എന്ന നിലയിൽ വലിയ സമ്മർദ്ദത്തിലാണ് ഗിൽ ഇപ്പോൾ ക്രീസിലെത്തുന്നത്.
Also Read: ബ്ലാസ്റ്റേഴ്സിന് ‘കണ്ണീർ’ സീസൺ? ഇത്തവണ കളത്തിലിറങ്ങിയാൽ 30 കോടിയുടെ നഷ്ടം; ആശങ്കയിൽ ആരാധകർ!
മറുവശത്ത് ശ്രേയസ് അയ്യരുടെ മടങ്ങിവരവ് റുതുരാജ് ഗെയ്ക്വാദിന്റെ ടീമിലെ സ്ഥാനത്തിന് ഇളക്കം തട്ടിച്ചു. ദക്ഷിണാഫ്രിക്കയ്ക്കെതിരായ പരമ്പരയിൽ ശ്രേയസിന്റെ അഭാവത്തിൽ നാലാം നമ്പറിൽ ഇറങ്ങി സെഞ്ച്വറി നേടിയ റുതുരാജിനെ പുറത്തിരുത്തിയത് അനീതിയെന്ന് തോന്നിയേക്കാം. എങ്കിലും ഏകദിനത്തിൽ ശ്രേയസ് അയ്യർ മുൻപ് കാഴ്ചവെച്ച സ്ഥിരതയാർന്ന പ്രകടനങ്ങളെ തള്ളിക്കളയാൻ ബിസിസിഐക്ക് കഴിയില്ല. ഗില്ലിന് തന്റെ ആത്മവിശ്വാസം വീണ്ടെടുക്കാനും ശ്രേയസിന് തന്റെ സ്ഥാനം ഉറപ്പിക്കാനും ഈ ന്യൂസിലൻഡ് പരമ്പര ജീവൻമരണ പോരാട്ടമാണ്.
The post സെഞ്ച്വറി അടിച്ചിട്ടും റുതുരാജ് പുറത്ത്! ഗില്ലിനും ശ്രേയസിനും ഇത് ‘അഗ്നിപരീക്ഷ’; ടീം ഇന്ത്യയിലെ മാറ്റങ്ങൾ ഇങ്ങനെ appeared first on Express Kerala.
