മുംബൈ: ട്വന്റി20 ലോകകപ്പ് ക്രിക്കറ്റില് ഭാരതത്തിന് വിജയത്തുടക്കം. ആദ്യ മത്സരത്തില് അമേരിക്കയെ 29 റണ്സിന് തോല്പ്പിച്ചു. ആദ്യം ബാറ്റ് ചെയ്ത ഭാരതം 20 ഓവറില് ഒമ്പത് വിക്കറ്റ് നഷ്ടത്തില് 161 റണ്സെടുത്തു. ഇതിനെതിരെ അമേരിക്ക 20 ഓവറില് എട്ട് വിക്കറ്റ് നഷ്ടത്തില് 132 റണ്സെടുത്തു.
റണ്ണൊഴുക്ക് കുറഞ്ഞ സ്ഥിതിയിലായ വാംഖഡെയിലെ പിച്ചില് സൂര്യകുമാര് യാദവിന്റെ തട്ടുപൊളിപ്പന് പ്രകടനത്തിന്റെ ബലത്തിലാണ് ഭാരതത്തിന് വിജയിക്കാനായത്. കുറഞ്ഞ സ്കോറില് അവസാനിക്കേണ്ടതായിരുന്ന മത്സരം സൂര്യയുടെ ഉത്തരവാദിത്ത പൂര്ണമായ ചെറുത്തു നില്പ്പും അവസാന ഓവറുകളിലെ കൃത്യമായി വെടിക്കെട്ട് ബാറ്റിങ്ങും ചേര്ന്നപ്പോഴാണ് എതിരാളികള്ക്ക് മുന്നില് വെല്ലുവിളിയുയര്ത്താവുന്ന ടോട്ടല് ഭാരതം സ്വന്തമാക്കിയത്.
മത്സരത്തില് അമേരിക്കയ്ക്ക് ആയിരുന്നു ടോസ്. ഭാരതത്തെ ആദ്യം ബാറ്റ് ചെയ്യാന് വിട്ടു. വളരെ ഇഴഞ്ഞാണ് ഇന്നിങ്സ് നീങ്ങിയത്. 5.2 ഓവറില് നാലാമനായി സൂര്യ ക്രീസിലേക്കെത്തുമ്പോള് ഭാരത സ്കോര് 45. മറുവശത്ത് വിക്കറ്റുകള് തുടരെ വീണുകൊണ്ടിരിക്കുമ്പോഴും സൂര്യ ക്ഷമയോടെ പൊരുതി നിന്നു. ഒടുവില് തകര്പ്പന് പ്രകടനത്തിലൂടെ ഭാരത സ്കോര് 150നപ്പുറം എത്തിക്കുകയായിരുന്നു. 20 ഓവറില് അഞ്ച് വിക്കറ്റ് നഷ്ടത്തില് 161 റണ്സ് ആണ് ഭാരതം നേടിയത്. പുറത്താകാതെ നിന്ന സൂര്യകുമാര് യാദവ് 49 പന്തുകള് നേരിട്ട് 84 റണ്സെടുത്തു.
