ഡൽഹിയിലെ പീർഗടി പാലത്തിന് സമീപം നിർത്തിയിട്ട കാറിനുള്ളിൽ ഒരു സ്ത്രീയും രണ്ട് പുരുഷന്മാരും ഉൾപ്പെടെ മൂന്ന് പേരെ മരിച്ച നിലയിൽ കണ്ടെത്തി. റാൻഹോള സ്വദേശികളായ രൺധീർ (62), ശിവനരേഷ് (40), ജഹാംഗീർപുരി സ്വദേശിയായ ലക്ഷ്മി (40) എന്നിവരാണ് മരിച്ചത്. രൺധീറിന്റെ ഉടമസ്ഥതയിലുള്ള വെളുത്ത ടാറ്റ ടിയാഗോ കാറിനുള്ളിലാണ് മൃതദേഹങ്ങൾ കണ്ടെത്തിയത്.
വിഷവസ്തുക്കൾ ഉള്ളിൽച്ചെന്നതാണ് മരണകാരണമെന്നാണ് പ്രാഥമിക നിഗമനം. പീർഗടി പാലത്തിന് മുകളിൽ അസ്വാഭാവിക സാഹചര്യത്തിൽ കാർ കിടക്കുന്നത് ശ്രദ്ധയിൽപ്പെട്ട അഗ്നിശമന സേനയാണ് പോലീസിനെ വിവരമറിയിച്ചത്. തുടർന്ന് നടത്തിയ പരിശോധനയിൽ കാറിനുള്ളിൽ മൂന്ന് മൃതദേഹങ്ങളും കണ്ടെത്തുകയായിരുന്നു.
Also Read: ബംഗ്ലാദേശിലെ ഹിന്ദുക്കൾ പോരാടിയാൽ ലോകത്തെ എല്ലാ ഹിന്ദുക്കളും കൂടെയുണ്ടാകും; മോഹൻ ഭാഗവത്
മരിച്ചവരുടെ ശരീരത്തിൽ മുറിവുകളോ മറ്റ് ബലപ്രയോഗത്തിന്റെ അടയാളങ്ങളോ ഉണ്ടായിരുന്നില്ലെന്ന് പോലീസ് വ്യക്തമാക്കി. കൂടാതെ, കാറിനുള്ളിലുണ്ടായിരുന്ന മൊബൈൽ ഫോണുകൾ ഉൾപ്പെടെയുള്ള വിലപിടിപ്പുള്ള വസ്തുക്കളൊന്നും നഷ്ടപ്പെട്ടിട്ടില്ല. ആത്മഹത്യയാണോ എന്ന സംശയത്തിലാണ് പോലീസ് ഇപ്പോൾ അന്വേഷണം നടത്തുന്നത്. ഫോറൻസിക് സംഘം സ്ഥലത്തെത്തി ശാസ്ത്രീയ പരിശോധനകൾ പൂർത്തിയാക്കി. പോസ്റ്റ്മോർട്ടം റിപ്പോർട്ട് ലഭിച്ചാൽ മാത്രമേ മരണകാരണത്തിൽ വ്യക്തത വരികയുള്ളൂ.
The post ഡൽഹിയിൽ മൂന്ന് പേരെ കാറിൽ മരിച്ച നിലയിൽ കണ്ടെത്തി; കൂട്ട ആത്മഹത്യയെന്ന് പ്രാഥമിക നിഗമനം appeared first on Express Kerala.
