രാജ്യത്തെ സ്കൂൾ വിദ്യാഭ്യാസത്തിന്റെ ഗുണനിലവാരവും കാര്യക്ഷമതയും വിലയിരുത്തുന്ന കേന്ദ്ര വിദ്യാഭ്യാസ മന്ത്രാലയത്തിന്റെ പെർഫോമൻസ് ഗ്രേഡിങ് ഇൻഡക്സിൽ കേരളത്തിന് മികച്ച മുന്നേറ്റം. കഴിഞ്ഞ വർഷത്തെ അപേക്ഷിച്ച് കേരളം ഗ്രേഡിങ്ങിൽ സ്ഥാനക്കയറ്റം നേടുകയും സ്കോറിൽ വലിയ വർധനവ് രേഖപ്പെടുത്തുകയും ചെയ്തതായി വി. ശിവൻകുട്ടി അറിയിച്ചു. ബുധനാഴ്ച പുറത്തിറക്കിയ വാർത്താക്കുറിപ്പിലാണ് സംസ്ഥാനം കൈവരിച്ച ഈ സുപ്രധാന നേട്ടത്തെക്കുറിച്ച് വ്യക്തമാക്കിയത്.
കേന്ദ്ര മന്ത്രാലയത്തിന്റെ ഏറ്റവും പുതിയ റിപ്പോർട്ട് പ്രകാരം, കഴിഞ്ഞ വർഷം ‘പ്രചേസ്ത-3’ വിഭാഗത്തിലായിരുന്ന കേരളം ഇത്തവണ ഒരു പടി കൂടി ഉയർന്ന് ‘പ്രചേസ്ത-2’ ഗ്രേഡിലേക്ക് പ്രവേശിച്ചു. പ്രകടന നിലവാരത്തിന്റെ അടിസ്ഥാനത്തിൽ കേന്ദ്രം നിശ്ചയിച്ചിട്ടുള്ള ഉയർന്ന ഗ്രേഡുകളിൽ ഒന്നാണിത്. കേരളത്തിനൊപ്പം പഞ്ചാബ്, ചണ്ഡീഗഡ് തുടങ്ങിയ സംസ്ഥാനങ്ങളും കേന്ദ്രഭരണ പ്രദേശങ്ങളും മാത്രമാണ് നിലവിൽ ഈ ഉയർന്ന ഗ്രേഡിങ് പദവിയിൽ ഇടംപിടിച്ചിട്ടുള്ളത് എന്നത് നേട്ടത്തിന്റെ മാറ്റ് കൂട്ടുന്നു.
Also Read: ഖാർഗെ-രാഹുൽ കൂടിക്കാഴ്ച്ച! ഇന്ന് വൈകിട്ട് 5:30ന്
കണക്കുകൾ പരിശോധിക്കുമ്പോൾ കേരളത്തിന്റെ സ്കോറിലുണ്ടായ കുതിച്ചുചാട്ടം ശ്രദ്ധേയമാണ്. കഴിഞ്ഞ വർഷം 594.2 പോയിന്റായിരുന്ന കേരളത്തിന്റെ പിജിഐ സ്കോർ, ഇത്തവണ 687.7 ആയി ഉയർന്നു. ചുരുങ്ങിയ കാലയളവിനുള്ളിൽ 93.5 പോയിന്റുകളുടെ വർധനവാണ് സംസ്ഥാനം കൈവരിച്ചത്. പഠനനിലവാരം, സ്കൂളുകളിലെ അടിസ്ഥാന സൗകര്യ വികസനം, തുല്യനീതി തുടങ്ങി വിവിധ മാനദണ്ഡങ്ങൾ മുൻനിർത്തിയാണ് കേന്ദ്ര മന്ത്രാലയം ഈ സ്കോറുകൾ നിശ്ചയിക്കുന്നത്.
പൊതുവിദ്യാഭ്യാസ മേഖലയിൽ സംസ്ഥാന സർക്കാർ നടപ്പിലാക്കി വരുന്ന ശാസ്ത്രീയവും സമഗ്രവുമായ പദ്ധതികൾക്കുള്ള അംഗീകാരമാണിതെന്ന് വി. ശിവൻകുട്ടി പറഞ്ഞു. സ്മാർട്ട് ക്ലാസ് റൂമുകൾ മുതൽ പഠന രീതികളിൽ വരുത്തിയ ആധുനികവൽക്കരണം വരെ ഈ മുന്നേറ്റത്തിന് കരുത്തുപകർന്നു. ദേശീയ വിദ്യാഭ്യാസ നയം അതേപടി നടപ്പിലാക്കാതെ തന്നെ, സ്വന്തം വിദ്യാഭ്യാസ മാതൃകകളിലൂടെ ഇത്തരമൊരു നേട്ടം കൈവരിക്കാൻ കഴിഞ്ഞത് എൽ.ഡി.എഫ് സർക്കാരിന്റെ വിദ്യാഭ്യാസ നയങ്ങളുടെ വിജയമാണെന്നും അദ്ദേഹം കൂട്ടിച്ചേർത്തു. വരും വർഷങ്ങളിൽ കൂടുതൽ മികവോടെ ഒന്നാം സ്ഥാനത്തേക്ക് എത്താനാണ് വിദ്യാഭ്യാസ വകുപ്പ് ലക്ഷ്യമിടുന്നത്.
The post ദേശീയ വിദ്യാഭ്യാസ സൂചികയിൽ കേരളത്തിന് തിളക്കമാർന്ന നേട്ടം; സ്കോറിൽ വൻ കുതിച്ചുചാട്ടം appeared first on Express Kerala.
