വാലന്റൈന്സ് ദിനത്തെ (Valentine’s Day) വരവേല്ക്കാനൊരുങ്ങുകയാണ് ഏവരും. എന്നാല് ഓരോ ആഘോഷവേളയെയും പണം പിടുങ്ങാനുള്ള അവസരമായി കാണുന്ന തട്ടിപ്പുകാര് ചുറ്റുമുണ്ടെന്ന് ഓര്ക്കണം.
അവര് വല വിരിച്ച് കാത്തിരിക്കുകയാണ്, ഓരോ വിശേഷ വേളയ്ക്ക് അനുസരിച്ചും അതീവ തന്ത്രപൂര്വ്വമായായിരിക്കും കെണിയൊരുക്കുക. പ്രണയദിനത്തോട് അനുബന്ധിച്ച്, ഡേറ്റിങ് ആപ്പുകളിലൂടെയടക്കമാണ് അവര് ആളുകളെ ചതിയില് കുരുക്കുക.
എഐയുടെ വരവോടെ ഇത് ഏറെ എളുപ്പവുമാണ്. അതിനാല്, ഈ വാലന്റൈന്സ് (Valentine’s Week) വീക്കില് ശ്രദ്ധയോടെ വേണം ഡേറ്റിങ് ആപ്പുകള് ഉള്പ്പടെ കൈകാര്യം ചെയ്യാന്.
പണം ആവശ്യപ്പെട്ടുള്ള തട്ടിപ്പ്
ഒരു ഡേറ്റിങ് ആപ്പിലോ സോഷ്യല് മീഡിയ പ്ലാറ്റ്ഫോമിലോ ഒരാളുമായി നിങ്ങള് കണക്ട് ചെയ്യപ്പെടുന്നു എന്ന് കരുതുക. ആശയവിനിമയത്തിലൂടെ അവരുമായി കൂടുതല് അടുക്കുന്നു. പക്ഷേ ഒരിക്കലും നിങ്ങള് തമ്മില് നേരില് കാണുന്നില്ല.
അപ്പുറത്തുള്ളയാളെ നേരില് കാണാന് നിങ്ങള് ആഗ്രഹമറിയിച്ചിട്ടുണ്ടാകും. എന്നാല് തിരക്കുകള് പറഞ്ഞ് പിന്നീടൊരിക്കലാകാമെന്ന് അയാള് തിയ്യതികള് മാറ്റിയിട്ടുമുണ്ടാകും.
ഇതിനിടെ നിങ്ങളുടെ വിശ്വാസം ഊട്ടിയുറപ്പിക്കാന് അയാള് അതിശയിപ്പിക്കുന്ന കാര്യങ്ങള് പറയും. നിങ്ങളെ സന്തോഷിപ്പിക്കുകയും, വലിയ പദ്ധതികള് പങ്കുവയ്ക്കുകയും ചെയ്യും.
മറ്റാരേക്കാളും സ്നേഹപൂര്ണമായി ഇടപെട്ട് നിങ്ങളെ അയാളിലേക്ക് വലിച്ചടുപ്പിക്കുകയും ചെയ്യും. ഈ ഘട്ടമെത്തുമ്പോള് വ്യക്തിപരമായ കാരണങ്ങള്, വിസ പ്രശ്നങ്ങള്, യാത്രാ പ്രയാസങ്ങള് അല്ലെങ്കില് മെഡിക്കല് എമര്ജന്സി എന്നിവ ചൂണ്ടിക്കാട്ടി നിങ്ങളില് നിന്ന് പണം ആവശ്യപ്പെടാന് തുടങ്ങും.
ഇതൊരു കെണിയാണ്. ആളുകളെ അമിതമായി വിശ്വസിച്ചാല് നിങ്ങളുടെ പണം നഷ്ടപ്പെടുന്ന അവസ്ഥയുണ്ടാകും.
എഐയും ഡീപ്ഫേക്ക് കോളുകളും
നിങ്ങള് ഒരു ഡേറ്റിങ് ആപ്പില് ഒരാളുമായി കണക്ട് ചെയ്യപ്പെടുന്നു എന്ന് കരുതുക, ഒരുപാട് നേരം സംസാരിച്ച ശേഷം നിങ്ങള് വീഡിയോ കോളിന് സമ്മതമറിയിക്കുന്നു. തുടര്ന്നുള്ള കാര്യങ്ങളെല്ലാം ഒരുപക്ഷേ എഐ സംവിധാനങ്ങളുടെ നിയന്ത്രണത്തിലായിരിക്കും.
നിമിഷ വേഗത്തില് നിങ്ങളുടെ മോശം വീഡിയോകള് എഐ വഴി നിര്മ്മിക്കപ്പെടുകയും അതുപയോഗിച്ച് നിങ്ങളെ അപ്പുറത്തുള്ളയാള്, വീഡിയോ പ്രചരിപ്പിക്കാതിരിക്കാന് വന് തുക ആവശ്യപ്പെട്ട് ബ്ലാക്ക് മെയില് ചെയ്യാന് തുടങ്ങുകയും ചെയ്തേക്കാം.
വ്യാജ ഡേറ്റിങ് ആപ്പ് ലിങ്കുകള്
വാലന്റൈന്സ് ദിനത്തോടനുബന്ധിച്ച് വ്യാജ ഡേറ്റിങ് ആപ്പ് മെമ്പര്ഷിപ്പ് ലിങ്കുകള് പ്രചരിപ്പിക്കപ്പെടുന്നുണ്ട്. കുറഞ്ഞ വിലയ്ക്ക് പ്രീമിയം ഡേറ്റിങ് ആപ്പ് മെമ്പര്ഷിപ്പ് വാഗ്ദാനം ചെയ്യുന്ന ഏതെങ്കിലും തട്ടിപ്പ് ലിങ്കില് നിങ്ങള് ക്ലിക്ക് ചെയ്താല്, അത് അപകട വാതിലാകും.
Also Read: ഫെബ്രുവരി 14 ന് വാലന്റൈൻസ് ദിനം ആഘോഷിക്കുന്നത് എന്തുകൊണ്ട്?
അതുവഴി വ്യക്തിഗത വിവരങ്ങള് ചോര്ത്തപ്പെട്ടേക്കാം. അതുപയോഗിച്ച് തട്ടിപ്പുകാര് നിങ്ങളുടെ അക്കൗണ്ടിലെ തുക മുഴുവനും കൊള്ളയടിക്കാനും ഇടയുണ്ട്.
നിക്ഷേപ തട്ടിപ്പ്
സോഷ്യല് മീഡിയയിലോ ഡേറ്റിങ് ആപ്പുകളിലോ നിങ്ങള് ഒരു പങ്കാളിയെ കണ്ടെത്തുന്നു എന്ന് കരുതുക, നിങ്ങള് അവരെ നേരില് കണ്ടിട്ടില്ല. കൂടുതല് അടുത്ത ശേഷം അപ്പുറത്തുള്ളയാള് ഒരു നിക്ഷേപ പദ്ധതി അവതരിപ്പിക്കുകയാണെങ്കില് കരുതലെടുക്കണം.
പണം ഇരട്ടിപ്പ് പോലുള്ള അദ്ഭുതപ്പെടുന്ന വാഗ്ദാനങ്ങളായിരിക്കും നല്കുക. അതിന്റെ ഭാഗമായാല് ആദ്യ ഘട്ടത്തില് അതിശയിപ്പിക്കും വിധം വലിയ പ്രതിഫലം ലഭ്യമാവുകയും ചെയ്തേക്കാം.
പക്ഷേ അടുത്ത പടിയായി കൂടുതല് തുക നിക്ഷേപിക്കാന് നിങ്ങള് നിര്ബന്ധിതമാവും. അതോടെ കൈയ്യിലുള്ള പണം മുഴുവന് നഷ്ടപ്പെട്ടേക്കാം.
