ബെംഗളൂരു: മറ്റുള്ള ഇന്ത്യന് മേഖലകളെ അപേക്ഷിച്ച് വര്ഷം മുഴുവന് താരതമ്യേന സുഖകരമായ കാലാവസ്ഥയുള്ള നഗരമാണ് ബെംഗളൂരു. നവംബറിനും ഫെബ്രുവരിക്കും ഇടയിലുള്ള ശൈത്യകാലമാണ് ഇവിടുത്തെ ഏറ്റവും മികച്ച കാലാവസ്ഥ.
പിന്നീട് വേനലിലേക്കെത്തുമ്പോള് ക്രമാനുഗതമായി ചൂട് കൂടാറുണ്ട്. എങ്കിലും മറ്റുള്ള ഇന്ത്യന് നഗരങ്ങളെ അപേക്ഷിച്ച് സഹിക്കാവുന്ന താപനിലയേ അനുഭവപ്പെടാറുണ്ടായിരുന്നുള്ളൂ. അതിനുശേഷം മണ്സൂണ് ലഭിക്കുന്നതുമാണ് ബെംഗളൂരുവിന്റ പൊതു കാലാവസ്ഥാ ചിത്രം.
നിലവില് 31 മുതല് 33 ഡിഗ്രി സെല്ഷ്യസ് വരെയാണ് ഈ മെട്രോ നഗരത്തിലെ താപനില. എന്നാല് ഇക്കുറി ബെംഗളൂരുവില് ചൂട് കൂടുതല് അനുഭവപ്പെടുന്നതായി വിലയിരുത്തപ്പെടുകയാണ്. എന്തുകൊണ്ടാണ് ബെംഗളൂരുവില് താപനില കൂടിയതെന്ന് ആളുകള് സമൂഹ മാധ്യമങ്ങളിലും മറ്റും ചോദ്യമുയര്ത്തുന്നുണ്ട്.
സുഖകരവും മിതമായതുമായ കാലാവസ്ഥയ്ക്ക് പേരുകേട്ട ബെംഗളൂരുവില്, സാധാരണ നിലയില് താപനില കൂടേണ്ട മാസങ്ങള് ആകും മുന്പേ ചൂട് കൂടിയെന്ന് ചൂണ്ടിക്കാട്ടിയാണ് ചര്ച്ച. ഇത് കാലാവസ്ഥാമാറ്റത്തിന്റെ സൂചനയായും ചിലര് വിലയിരുത്തുന്നു.
അതേസമയം, വര്ഷം ചെല്ലുന്തോറും നഗരത്തില് ചൂട് കൂടുകയാണെന്ന് ചില താമസക്കാര് സാക്ഷ്യപ്പെടുത്തുന്നു. ആകാംക്ഷ എന്ന യുവതി എക്സില് കുറിച്ചത് ഇങ്ങനെ.
‘ഞാന് ബെംഗളൂരുവില് വരുമ്പോള്, വര്ഷം മുഴുവനും സുഖകരമായ കാലാവസ്ഥ അനുഭവിക്കാമെന്നും ഡഹിയിലെയും മുംബൈയിലെയും കഠിനമായ ചൂടിനോട് വിട പറയാമെന്നും കരുതി.
എന്നാല് ഇപ്പോള് എന്തുകൊണ്ടാണ് ബെംഗളൂരുവിന്റെ കാലാവസ്ഥ എന്നെ പരീക്ഷിക്കുന്നത്, എന്തൊരു ചൂടാണിത്’ – യുവതി ചോദിക്കുന്നു. ഈ പോസ്റ്റ് എക്സില് ഒരു സംവാദത്തിന് തന്നെ തിരികൊളുത്തിയിരിക്കുകയാണ്.
നഗരത്തിന്റെ കാലാവസ്ഥ മാറിയോ അതോ ഇത് വെറും സീസണല് മാറ്റം മാത്രമാണോ എന്ന് പലരും ചോദ്യമുന്നയിക്കുന്നു. ‘ഞാനിവിടെ ജനിച്ചുവളര്ന്ന ഒരാളാണ്. 80കള് മുതല് ഇവിടെ ഇങ്ങനെയൊക്കെയുള്ള കാലാവസ്ഥയാണ്.
ചൂട് മാര്ച്ച് മാസത്തില് തുടങ്ങി ഏപ്രിലില് അതിന്റെ ഉയര്ച്ചയിലെത്തും. മെയ് മാസത്തില് ഇടയ്ക്കിടെ ഇടിയോടുകൂടിയ മഴയുണ്ടാകും. അധികം പ്രതീക്ഷകളൊന്നും വെച്ച് പുലര്ത്താതിരുന്നാല് മതി’ – ഒരു ബെംഗളൂരു നിവാസി അഭിപ്രായപ്പെട്ടു.
Also Read: എന്തുകൊണ്ടാണ് ബാംഗ്ലൂരില് തണുപ്പും മികച്ച കാലാവസ്ഥയും ? ; അറിഞ്ഞിരിക്കേണ്ട 4 കാര്യങ്ങള്
‘മാര്ച്ചും ഏപ്രിലുമൊക്കെ സാധാരണയായി ചൂടുള്ള മാസങ്ങളാണ്. ഇന്ത്യയുടെ മറ്റു ഭാഗങ്ങളില് കൊടും ചൂട് അനുഭവപ്പെടുമ്പോള് ബെംഗളൂരുവിലായിരിക്കുന്നത് ഭാഗ്യമാണ്. മെയ് പകുതിയോടെ കാര്യങ്ങള് മെച്ചപ്പെടാന് തുടങ്ങും’ – അദ്ദേഹം കൂട്ടിച്ചേര്ത്തു.
അതായത്, ചൂടുള്ള ദിവസങ്ങള് താത്കാലികമാണെന്ന് ചിലര് പുതിയ താമസക്കാരെ ആശ്വസിപ്പിക്കുന്നുണ്ട്.’ചൂട് ഇങ്ങനെയൊക്കെത്തന്നെയാണ്, പക്ഷേ കുറഞ്ഞ ദിവസങ്ങള് മാത്രമേ ഉണ്ടാകൂ. ഈ ചൂട് മഴയ്ക്ക് കാരണമാകും, മെയ് വരെ കാത്തിരിക്കുക’ – വേറൊരാള് കുറിച്ചു.
നഗരവത്കരണമോ കാരണം ?
നഗരവത്കരണമാണ് ചൂട് കൂടാന് കാരണമാകുന്നതെന്ന് നിരവധി പേര് അഭിപ്രായപ്പെടുന്നുണ്ട്. കെട്ടിട നിര്മ്മാണങ്ങള്ക്കും റോഡ്, മെട്രോ റെയില് വികസനത്തിനുമെല്ലാമായി മരങ്ങള് വ്യാപകമായി മുറിച്ചുമാറ്റുന്നത് ചൂടുകൂടാന് കാരണമാകുന്നതായി നിരവധി പേര് ചൂണ്ടിക്കാട്ടുന്നു.
ജനസാന്ദ്രതയേറുന്നതും പ്രധാന കാരണമായി പലരും എടുത്തുപറയുന്നു. എയര് കണ്ടീഷണറുകള് ആവശ്യമില്ലെന്ന് ബെംഗളൂരു നഗരം അഭിമാനിച്ചിരുന്ന കാലം മാറിയെന്നാണ് മറ്റൊരാള് അഭിപ്രായപ്പെട്ടത്.
‘ഞാന് 2018ല് ഇവിടെ ആദ്യമായി വന്നപ്പോള് ഹോസ്റ്റല് ഉടമ എന്റെ അമ്മയോട് ഇവിടെ എ.സി.യുടെ ആവശ്യമില്ലെന്ന് പറഞ്ഞിരുന്നു. പക്ഷേ ഇപ്പോള് ഒരെണ്ണം അത്യാവശ്യമാണെന്ന് തോന്നുന്നു’ – അദ്ദേഹം കൂട്ടിച്ചേര്ത്തു.
ജനസംഖ്യാ വര്ദ്ധനവ് പരിസ്ഥിതിയില് ഉണ്ടാക്കുന്ന ആഘാതത്തെക്കുറിച്ച് വിശദീകരിക്കുന്ന ഒരു കമന്റും ശ്രദ്ധ നേടി. ‘അടുത്തുള്ള താമസക്കാര്ക്ക് വെള്ളം നല്കുന്ന ഒരു തടാകം നിങ്ങള് സങ്കല്പ്പിക്കുക.
മറ്റ് സ്ഥലങ്ങളില് നിന്നുള്ള ആളുകള് ഇതിനെക്കുറിച്ച് കേട്ടറിഞ്ഞ് വെള്ളത്തിനായി അവിടേക്ക് താമസം മാറും. കൂടുതല് ആളുകള് വരും തോറും തടാകം വറ്റിപ്പോകും. അത് തന്നെയാണ് ഇവിടെയും സംഭവിക്കുന്നത്’ – അദ്ദേഹം അഭിപ്രായപ്പെട്ടു.
