അഹമ്മദാബാദ് ∙ ഇന്ത്യൻ ക്രിക്കറ്റ് ചരിത്രത്തിൽ പുതിയ സ്വർണാധ്യായം എഴുതിക്കൊണ്ട് ലോകക്രിക്കറ്റിൽ വീണ്ടും ആധിപത്യം സ്ഥാപിച്ചിരിക്കുകയാണ് ഇന്ത്യ. മൂന്നാം കിരീടനേട്ടത്തിലൂടെ T 20 ലോകകപ്പിൽ ഏറ്റവും കൂടുതൽ തവണ ചാംപ്യന്മാരായ ടീമെന്ന ഖ്യാതി ഇനി ഇന്ത്യയ്ക്ക് സ്വന്തം. ഫൈനലിലെ നിർണായക ജയത്തോടെ ഇന്ത്യ ഈ നേട്ടം കൈവരിച്ചതോടെ രണ്ടു കിരീടങ്ങളുമായി ഒപ്പമുണ്ടായിരുന്ന വെസ്റ്റിൻഡീസിനെയും ഇംഗ്ലണ്ടിനെയും മറികടന്നു.
T20 ലോകകപ്പ് ചരിത്രത്തിൽ കിരീടം നിലനിർത്തുന്ന ആദ്യ ടീമെന്ന റെക്കോർഡും ഇന്ത്യ സ്വന്തമാക്കി. മുൻപ് നേടിയ കിരീടത്തിന്റെ തുടർച്ചയായി വീണ്ടും ചാംപ്യന്മാരാകുക എന്നത് ഏത് ടീമിനും അത്യന്തം ദുഷ്കരമായ ദൗത്യമാണ്. എന്നാൽ ആത്മവിശ്വാസവും കൂട്ടായ്മയും കാത്തുസൂക്ഷിച്ച ഇന്ത്യ അതിനെ വിജയകരമായി മറികടന്നു. ഇതോടെ ഇന്ത്യൻ ക്രിക്കറ്റിന്റെ ശക്തിയും സ്ഥിരതയും വീണ്ടും ലോകത്തിനു മുന്നിൽ തെളിഞ്ഞു.
സ്വന്തം നാട്ടിൽ ലോകകപ്പ് നേടുന്ന ആദ്യ ടീമെന്ന നേട്ടവും ഇന്ത്യയുടെ പേരിലായി. ഇന്ത്യൻ ആരാധകരുടെ ആവേശവും പിന്തുണയും നിറഞ്ഞ അന്തരീക്ഷത്തിൽ നേടിയ ഈ വിജയം രാജ്യത്തെ ക്രിക്കറ്റ് ചരിത്രത്തിൽ സ്മരണീയ നിമിഷമായി മാറി. സ്റ്റേഡിയങ്ങളിൽ നിന്നുമാരംഭിച്ച് വീടുകളിലേക്കു വരെ ആഘോഷം നിറഞ്ഞ കാഴ്ചകളാണ് ഇന്ത്യ കണ്ടത്.
അന്താരാഷ്ട്ര ക്രിക്കറ്റ് കൗൺസിലിന്റെ മത്സരങ്ങളിൽ ഇന്ത്യയുടെ തുടർച്ചയായ മൂന്നാമത്തെ കിരീടമാണിത്. 2024-ലെ ഇരുപത്-ഇരുപത് ലോകകപ്പ് വിജയത്തോടെ ആരംഭിച്ച കിരീടയാത്ര 2025-ലെ ചാംപ്യൻസ് ട്രോഫി വിജയത്തിലൂടെ കൂടുതൽ ശക്തമായി തുടരുകയും ഇപ്പോൾ 2026-ലെ ഇരുപത്-ഇരുപത് ലോകകപ്പ് വിജയത്തോടെ ഹാട്രിക് നേട്ടമായി മാറുകയും ചെയ്തു. അന്താരാഷ്ട്ര ക്രിക്കറ്റ് മത്സരങ്ങളിൽ തുടർച്ചയായി മൂന്ന് കിരീടങ്ങൾ നേടുക എന്നത് ഇന്ത്യൻ ടീമിന്റെ ആധിപത്യത്തെ അടിവരയിടുന്ന നേട്ടമാണ്.
ഈ വിജയങ്ങൾക്ക് പിന്നിൽ ടീമിന്റെ ശക്തമായ കൂട്ടായ്മയും യുവതാരങ്ങളും പരിചയസമ്പന്നരായ കളിക്കാരും ചേർന്നുള്ള സമന്വയവുമാണ്. ബാറ്റിംഗിലും ബൗളിംഗിലും ഫീൽഡിംഗിലും ഒരുപോലെ മികവ് പുലർത്തുന്ന സമഗ്രമായ ടീമെന്ന നിലയിലാണ് ഇന്ത്യ ഇന്ന് ലോകക്രിക്കറ്റിൽ മുന്നിൽ നിൽക്കുന്നത്.
ഇന്ത്യയുടെ ക്രിക്കറ്റ് ചരിത്രം ലോകകപ്പുകളിലെ ശ്രദ്ധേയമായ വിജയങ്ങളാൽ സമ്പന്നമാണ്. ഏകദിനം,T 20 എന്നീ രണ്ട് പ്രധാന ക്രിക്കറ്റ് ലോകകപ്പുകളിലും ഇന്ത്യ നിരവധി തവണ കിരീടം നേടിയിട്ടുണ്ട്. കൂടാതെ ടെസ്റ്റ് ക്രിക്കറ്റിലും ലോകതലത്തിൽ മികച്ച നേട്ടങ്ങൾ കൈവരിച്ചിട്ടുള്ള രാജ്യമാണ് ഇന്ത്യ.
ഇന്ത്യയുടെ ആദ്യ ലോകകപ്പ് വിജയം 1983-ലാണ്. അന്ന് നടന്ന ഏകദിന ലോകകപ്പിൽ ശക്തരായ വെസ്റ്റിൻഡീസിനെ തോൽപ്പിച്ചാണ് ഇന്ത്യ ചരിത്രവിജയം നേടിയത്. കപിൽ ദേവിന്റെ നേതൃത്വത്തിൽ നേടിയ ആ വിജയം ഇന്ത്യൻ ക്രിക്കറ്റിന്റെ വഴിത്തിരിവായി കണക്കാക്കപ്പെടുന്നു. അതിനു ശേഷം 2011-ൽ സ്വന്തം നാട്ടിൽ നടന്ന ഏകദിന ലോകകപ്പിൽ ശ്രീലങ്കയെ തോൽപ്പിച്ച് ഇന്ത്യ രണ്ടാം കിരീടം നേടി. മഹേന്ദ്രസിംഗ് ധോണിയുടെ നേതൃത്വത്തിൽ നേടിയ ഈ വിജയം ഇന്ത്യൻ ആരാധകർക്ക് മറക്കാനാകാത്ത നിമിഷമായി മാറി.
.2007 ധോണിയുടെ നേതൃത്വത്തിലുള്ള യുവതാരങ്ങൾ പാകിസ്താനെ ഫൈനലിൽ തോൽപ്പിച്ചാണ് T 20 കിരീടം സ്വന്തമാക്കിയത്. തുടർന്ന് 2024-ൽ ഇന്ത്യ വീണ്ടും t 20 ലോകകപ്പ് നേടി. ഇപ്പോൾ 2026-ൽ മൂന്നാം കിരീടം .
ടെസ്റ്റ് ക്രിക്കറ്റിലും ഇന്ത്യ വലിയ നേട്ടങ്ങൾ കൈവരിച്ചിട്ടുണ്ട്. ലോക ടെസ്റ്റ് ചാംപ്യൻഷിപ്പ് മത്സരങ്ങളിൽ ഇന്ത്യ പലതവണ ഫൈനലിലെത്തിയിട്ടുണ്ട്. ശക്തമായ ബാറ്റിംഗ് നിരയും മികച്ച ബൗളർമാരും യുവതാരങ്ങളുടെ ഉയർച്ചയും ഇന്ത്യൻ ക്രിക്കറ്റിനെ ലോകത്തിലെ ഏറ്റവും ശക്തമായ ടീമുകളിൽ ഒന്നാക്കി മാറ്റിയിട്ടുണ്ട്.
ഇങ്ങനെ ലോകകപ്പുകളിലും മറ്റ് അന്താരാഷ്ട്ര മത്സരങ്ങളിലുമുള്ള തുടർച്ചയായ വിജയങ്ങൾ ഇന്ത്യയെ ലോകക്രിക്കറ്റിലെ ഏറ്റവും ശക്തമായ രാജ്യങ്ങളിൽ ഒന്നായി ഉയർത്തിയിരിക്കുകയാണ്. ആരാധകരുടെ പിന്തുണയും താരങ്ങളുടെ പ്രതിഭയും ചേർന്നപ്പോൾ ഇന്ത്യൻ ക്രിക്കറ്റ് തുടർച്ചയായി പുതിയ ഉയരങ്ങളിലേക്ക് മുന്നേറുകയാണ്.
