ലണ്ടന്: നാല് മിനിറ്റിനിടയിലെ രണ്ട് അത്യുഗ്രന് ഹെഡ്ഡര് ഗോളിലൂടെ മാഞ്ചസ്റ്ററുകാരന് നിക്കോ ഒ’റെയ്ലി സിറ്റിക്ക് ഇഎഫ്എല് കിരീടം(കരബാവോ കപ്പ്) സമ്മാനിച്ചു. സീസണില് വമ്പന് കുതിപ്പ് തുടരുന്ന ആഴ്സണലിനെ ഫൈനലില് കൊമ്പുകുത്തിച്ച് നേടിയ വിജയത്തിലൂടെ സിറ്റി പരിശീലകന് പെപ്പ് ഗ്വാര്ഡിയോളയും സീസണിലെ നിറംമങ്ങിയ പ്രകടനത്തിന്റെ ക്ഷീണം തീര്ത്തു. ഏതിരില്ലാത്ത രണ്ട് ഗോളുകള്ക്കാണ് സിറ്റിയുടെ ഒമ്പതാം കിരീടനേട്ടം.
ലക്ഷണമൊത്ത ഫൈനല് എങ്കിലും മത്സരത്തില് ആദ്യാവസാനം മേല്കൈ സിറ്റിക്കായിരുന്നു. സ്കോര് കണക്കിനപ്പുറം മുന്നേറ്റത്തിലും അവസരം സൃഷ്ടിക്കുന്നതിലും സിറ്റി ആഴ്സണലിനെ കവച്ചുവയ്ക്കുന്ന കാഴ്ച്ചയാണ് വെംബ്ലി സ്റ്റേഡിയം കണ്ടത്. ഇതേ വേദിയില് കഴിഞ്ഞ രണ്ട് പ്രധാന ഫൈനലുകളില് സിറ്റി നേരിട്ട നീറ്റലിനുള്ള ആശ്വാസം കൂടിയായി ഈ വിജയം.
പ്രീമിയര് ലീഗിലും ചാമ്പ്യന്സ് ലീഗിലും കണ്ട ആഴ്സണലിനെയല്ല കരബാവോ കപ്പ് ഫൈനലില് സിറ്റിക്കെതിരെ കണ്ടത്. സിറ്റി കൂടുതല് സമയം പന്തടക്കം വയ്ക്കുന്നതിനൊപ്പം ആഴ്സണല് പ്രതിരോധത്തിനിടയില് വലിയ വിള്ളലുകള് വീഴ്ത്തി നിരന്തരം അവസരം സൃഷ്ടിച്ചുകൊണ്ടിരുന്നു. പക്ഷെ ആദ്യ പകുതിയില് ഗോള് മാത്രം കണ്ടില്ല.
മത്സരം രണ്ടാം പകുതിയില് പോരാഗമിക്കവെ വലത് മൂലയില് നിന്ന് വലത് വിങ്ങര് റയാന് ചേര്കി ഉയര്ത്തിയിട്ട ക്രോസ് കൈക്കലാക്കുന്നതില് ആഴ്സണല് കാവല്ക്കാരന് കെപ അരിസബലാഗ പരാജയപ്പെട്ടു. തൊട്ടുപുറകില് ക്ലോസ് റേഞ്ചിലായി കാത്തുനിന്ന ഒ’റെയ്ലി ശിരസ് താഴ്ത്തിക്കൊണ്ട് വലയ്ക്ക് നേരപന്ത് തിരിച്ചുവിട്ടു. വെംബ്ലിയിലെ ഗാലറി ഇളകി മറിഞ്ഞു. സൈഡ് ബെഞ്ചില് പെപ്പ് ഗ്വാര്ഡിയോളയും സംഘവും തുള്ളിച്ചാടി.
അധികം താമസിച്ചില്ല. പൊടുന്നനെയുള്ള സിറ്റി മുന്നേറ്റം, ആഴ്സണല് പ്രതിരോധ നിരയും മദ്ധ്യനിരയും വേലിക്കെട്ട് പോലെ സിറ്റി താരങ്ങളെ വളഞ്ഞു. വലത് ഭാഗത്ത് നിന്നും പന്ത് ഉയര്ത്തിവിട്ടത് മറ്റൊരു പ്രതിരോധ താരം മാത്യൂസ് ന്യൂനസ്. പന്തിലേക്ക് ഓടിയെത്തിയ ഒ’റെയ്ലിയുടെ ഹെഡ്ഡറില് വീണ്ടും പന്ത് വലയ്ക്കകത്ത്. വിജയം ഉറപ്പിച്ച ആഹ്ലാദത്തില് സിറ്റി താരങ്ങളും അണിയറക്കാരും ആഘോഷ തിമിര്പ്പിലായി. പിന്നീടൊരു തിരിച്ചുവരവിന് മൈക്കല് ആര്ട്ടേറ്റയുടെ ആഴ്സണലിന് സാധിച്ചില്ല. ബാക്കിസമയം ചടങ്ങ് പോലെ പൂര്ത്തിയായി. അനിവാര്യമായ കിരീടം സിറ്റി സ്വന്തമാക്കി.
അഞ്ച് വര്ഷത്തെ ഇടവേളയ്ക്ക് ശേഷമാണ് സിറ്റി ഇഎഫ്എല് കപ്പ് നേടുന്നത്. 2020-21 സീസണില് ടോട്ടനത്തെ തോല്പ്പിച്ചുകൊണ്ടായിരുന്നു ഇതിന് മുമ്പത്തെ കിരീടനേട്ടം. ഏറ്റവും കൂടുതല് തവണ ഇഎഫ്എല് കപ്പ് ജേതാക്കളായിട്ടുള്ളത് ലിവര്പൂള് ആണ്. പത്ത് തവണ. ഫൈനല് തോല്വിയോടെ 33 വര്ഷത്തെ ഇഎഫ്എല് കീരട ദാഹം തീര്ക്കാനുള്ള അവസരമാണ് ആഴ്സണല് നഷ്ടപ്പെടുത്തിയത്. ഇതിന് മുമ്പ് 1992-93 സീസണിലാണ് ടീം ഇഎഫ്എല് കപ്പില് മുത്തമിട്ടിട്ടുള്ളത്.
