ഇറാൻ തലസ്ഥാനമായ ടെഹ്റാനിലുണ്ടായ ശക്തമായ വ്യോമാക്രമണത്തിൽ 13 പേർ കൊല്ലപ്പെട്ടു. ഇന്നലെ രാത്രിയോടെ നഗരത്തിന്റെ തെക്കുപടിഞ്ഞാറൻ മേഖലയിലുള്ള ജനവാസ കേന്ദ്രങ്ങളിലാണ് ഒന്നിനുപിറകെ ഒന്നായി ആക്രമണമുണ്ടായത്. ഇസ്ലാംഷറിന് സമീപമുണ്ടായ ഈ സ്ഫോടനങ്ങളിൽ നിരവധി പേർക്ക് പരിക്കേൽക്കുകയും ചെയ്തു. ഹോർമുസ് കടലിടുക്ക് തുറന്നില്ലെങ്കിൽ ഇറാനെ തകർക്കുമെന്ന അമേരിക്കൻ പ്രസിഡന്റ് ഡോണൾഡ് ട്രംപിന്റെ ഭീഷണിക്ക് പിന്നാലെയാണ് ഈ ആക്രമണങ്ങൾ നടന്നത്. എന്നാൽ സംഭവത്തിന്റെ ഉത്തരവാദിത്തം അമേരിക്കയോ ഇസ്രയേലോ ഇതുവരെ ഏറ്റെടുത്തിട്ടില്ല.
ഇറാന്റെ ബാലിസ്റ്റിക് മിസൈൽ ഗവേഷണങ്ങൾ നടക്കുന്നുണ്ടെന്ന് കരുതപ്പെടുന്ന പ്രശസ്തമായ ഷരീഫ് സർവ്വകലാശാലയ്ക്കും നേരെ പുലർച്ചയോടെ ആക്രമണമുണ്ടായി. സർവ്വകലാശാലയ്ക്ക് സമീപമുള്ള പ്രകൃതി വാതക വിതരണ കേന്ദ്രത്തിനും സ്ഫോടനത്തിൽ കാര്യമായ കേടുപാടുകൾ സംഭവിച്ചിട്ടുണ്ട്. ഏത് കെട്ടിടങ്ങളെ ലക്ഷ്യമിട്ടാണ് ആക്രമണം നടന്നതെന്ന കാര്യത്തിൽ വ്യക്തത വന്നിട്ടില്ലെങ്കിലും, മേഖലയിൽ സംഘർഷാവസ്ഥ അതീവ ഗുരുതരമായി തുടരുകയാണ്. ഇറാനിലെ വാർത്താ ഏജൻസികളായ ഫാർസും നൗർ ന്യൂസും ആക്രമണ വിവരം സ്ഥിരീകരിച്ചിട്ടുണ്ട്.
The post ഇറാൻ തലസ്ഥാനത്ത് വ്യോമാക്രമണം! 13 മരണം, ഷരീഫ് സർവ്വകലാശാലയ്ക്കും നേരെ ആക്രമണം appeared first on Express Kerala.
