മദ്യപാനം ആരോഗ്യത്തിന് ഹാനികരമാണെന്നും വിവിധ തരം അർബുദങ്ങൾക്കും ജീവിതശൈലീ രോഗങ്ങൾക്കും കാരണമാകുമെന്നും എല്ലാവർക്കും അറിയാവുന്ന കാര്യമാണ്. എങ്കിലും സാമൂഹികമായ ഒത്തുചേരലുകളുടെ ഭാഗമായും ശീലമായും മദ്യം ഉപയോഗിക്കുന്നവർ നിരവധിയാണ്. മദ്യപാനം പൂർണ്ണമായും ഒഴിവാക്കുന്നതാണ് ഉത്തമമെങ്കിലും, അത് തുടരുന്നവർ ആരോഗ്യനില കൂടുതൽ വഷളാകാതിരിക്കാൻ ശ്രദ്ധിക്കേണ്ട അഞ്ച് പ്രധാന കാര്യങ്ങൾ പങ്കുവെക്കുകയാണ് ഗുരുഗ്രാമിൽ നിന്നുള്ള പ്രമുഖ ഓങ്കോളജിസ്റ്റ് ഡോ. വർതിക വിശ്വാനി.
ചുരുങ്ങിയ സമയത്തിനുള്ളിൽ അമിതമായി മദ്യപിക്കുന്ന രീതി ഒഴിവാക്കണമെന്നതാണ് ഏറ്റവും പ്രധാനമെന്ന് ഡോക്ടർ പറയുന്നു. ഇത്തരം ശീലം കരളിൽ ‘അസറ്റാൽഡിഹൈഡ്’ എന്ന വിഷാംശമുള്ള ഉപോത്പന്നം രൂപപ്പെടാൻ കാരണമാകും. ഇത് കഠിനമായ ഹാങ് ഓവറിനും കരൾ രോഗങ്ങൾക്കും പുറമെ അർബുദത്തിനും പ്രധാന കാരണമാകുന്നു. ശരീരത്തിൽ ഇതിന്റെ അളവ് കൂടുന്നത് തലവേദന, ഛർദി, അമിതമായ ഹൃദയമിടിപ്പ്, തളർച്ച എന്നിവയ്ക്കും വഴിതെളിക്കും.
മദ്യപാനത്തോടൊപ്പം പുകവലിക്കുന്നത് ഇരട്ടി അപകടമുണ്ടാക്കുന്ന കാര്യമാണെന്ന് ഡോ. വർതിക മുന്നറിയിപ്പ് നൽകുന്നു. പുകയിലയും മദ്യവും വെവ്വേറെ ഉപയോഗിക്കുന്നതിനേക്കാൾ ഗുരുതരമായ പ്രത്യാഘാതമാണ് ഇവ ഒന്നിച്ച് ഉപയോഗിക്കുമ്പോൾ ശരീരത്തിലുണ്ടാകുന്നത്. ചിലർ പുകവലിക്ക് പകരമായി തിരഞ്ഞെടുക്കുന്ന ‘വേപ്പിംഗും’ ഇത്തരത്തിൽ അപകടകാരി തന്നെയാണ്. ശ്വാസകോശത്തെയും ഹൃദയത്തെയും ഇവ ഗുരുതരമായി ബാധിക്കുമെന്നതിനാൽ മദ്യപിക്കുമ്പോൾ പുകയില ഉൽപ്പന്നങ്ങൾ പൂർണ്ണമായും ഒഴിവാക്കണം.
ഒരിക്കലും വെറുംവയറ്റിൽ മദ്യപിക്കരുത് എന്നത് മറ്റൊരു പ്രധാന നിർദ്ദേശമാണ്. ആഹാരം കഴിക്കാതെ മദ്യം ഉള്ളിലെത്തുമ്പോൾ ശരീരം അത് വളരെ വേഗത്തിൽ ആഗിരണം ചെയ്യുകയും ആരോഗ്യനില പെട്ടെന്ന് തകരാറിലാകുകയും ചെയ്യും. കൂടാതെ, വ്യത്യസ്ത തരം മദ്യങ്ങൾ കലർത്തി ഉപയോഗിക്കുന്നതും ഒഴിവാക്കണം. സ്പിരിറ്റുകൾ മിക്സ് ചെയ്യുന്നത് ശരീരത്തിലെ വിഷാംശത്തിന്റെ അളവ് വർദ്ധിപ്പിക്കാൻ കാരണമാകുമെന്നും ഡോക്ടർ ഇൻസ്റ്റഗ്രാമിൽ പങ്കുവെച്ച വീഡിയോയിലൂടെ വ്യക്തമാക്കുന്നു.
The post മദ്യപിക്കുന്നവർ ശ്രദ്ധിക്കുക; അർബുദ സാധ്യത കുറയ്ക്കാൻ ഡോക്ടർ നിർദ്ദേശിക്കുന്ന 5 കാര്യങ്ങൾ appeared first on Express Kerala.
