തമിഴ്നാട് നിയമസഭാ തിരഞ്ഞെടുപ്പിൽ ആർക്കും വ്യക്തമായ ഭൂരിപക്ഷമില്ലാത്ത സാഹചര്യത്തിൽ സർക്കാർ രൂപീകരണത്തിനായുള്ള രാഷ്ട്രീയ നീക്കങ്ങൾ സജീവമാകുന്നു. ഡിഎംകെ തലവൻ സ്റ്റാലിന്റെ തിരഞ്ഞെടുപ്പ് പരാജയത്തിൽ അപ്രതീക്ഷിത പിന്തുണയുമായി രജനികാന്ത് രംഗത്തെത്തിയതാണ് പുതിയ ചർച്ചകൾക്ക് വഴിവെച്ചത്. കഴിഞ്ഞ ദിവസം സ്റ്റാലിനെ നേരിൽ കണ്ട് ആശ്വസിപ്പിച്ച രജനിയെ, ഇന്ന് ഡിഎംകെ മുതിർന്ന നേതാവ് ഇ.വി. വേലു പോയസ് ഗാർഡനിലെത്തി സന്ദർശിച്ചു. തിരഞ്ഞെടുപ്പ് വേളയിൽ വിജയ്യുടെ രാഷ്ട്രീയ പ്രവേശനത്തെയും പാർട്ടിയെയും രജനി എതിർത്ത പശ്ചാത്തലത്തിൽ, ഈ കൂടിക്കാഴ്ചയെ അതീവ പ്രാധാന്യത്തോടെയാണ് രാഷ്ട്രീയ നിരീക്ഷകർ കാണുന്നത്.
മറുഭാഗത്ത്, മുൻ മുഖ്യമന്ത്രി എടപ്പാടി പളനിസ്വാമി (ഇപിഎസ്) തന്റെ എംഎൽഎമാരെ ഒപ്പം നിർത്താനുള്ള തിരക്കിട്ട നീക്കങ്ങളിലാണ്. പുതുച്ചേരിയിലെ റിസോർട്ടിൽ കഴിയുന്ന എംഎൽഎമാരെ കാണാനായി അദ്ദേഹം ചെന്നൈയിൽ നിന്നും തിരിച്ചിട്ടുണ്ട്. റിസോർട്ടിലെ ചർച്ചകൾക്ക് ശേഷമേ അദ്ദേഹം ഗവർണറെ കാണുകയുള്ളൂ എന്നാണ് പുറത്തുവരുന്ന വിവരം. സ്റ്റാലിന്റെ അപ്രതീക്ഷിത പരാജയത്തിൽ ഇപിഎസ് നിരാശ രേഖപ്പെടുത്തിയതായി എഐഎഡിഎംകെ എംഎൽഎ അൻപഴകൻ വെളിപ്പെടുത്തിയത് രാഷ്ട്രീയ കേന്ദ്രങ്ങളെ അമ്പരപ്പിച്ചിട്ടുണ്ട്. സ്റ്റാലിനെപ്പോലൊരു നേതാവ് പരാജയപ്പെടാൻ പാടില്ലായിരുന്നു എന്നാണ് ഇപിഎസിന്റെ പ്രതികരണമെന്ന് അദ്ദേഹം വ്യക്തമാക്കി.
Also Read; തമിഴകത്ത് രാഷ്ട്രീയ അനിശ്ചിതത്വം; ഗവർണറെ കണ്ട് എടപ്പാടി പളനിസ്വാമി! വിജയ്യെ തടഞ്ഞ് ഭൂരിപക്ഷ കടമ്പ
വിജയ്യുടെ തമിഴക വെട്രി കഴകത്തെ (ടിവികെ) പ്രതിരോധിക്കാൻ ചിരവൈരികളായ ഡിഎംകെയും എഐഎഡിഎംകെയും കൈകോർക്കുമോ എന്ന അഭ്യൂഹങ്ങളും ശക്തമാണ്. എന്നാൽ ഇത്തരമൊരു സഖ്യസാധ്യതയെക്കുറിച്ച് നിലവിൽ പുറത്തുവരുന്ന വാർത്തകൾ വെറും അടിസ്ഥാനരഹിതമായ കാര്യങ്ങളാണെന്ന് ഇരുപാർട്ടികളുടെയും നേതൃത്വം ഔദ്യോഗികമായി അറിയിച്ചു. എങ്കിലും, തമിഴ്നാട് രാഷ്ട്രീയത്തിൽ അപ്രതീക്ഷിതമായ മാറ്റങ്ങൾക്കും കൂട്ടുകെട്ടുകൾക്കും വരുംദിവസങ്ങൾ സാക്ഷ്യം വഹിക്കുമെന്നുറപ്പാണ്.
The post തമിഴ്നാട്ടിൽ രാഷ്ട്രീയ അനിശ്ചിതത്വം; സ്റ്റാലിനുമായി കൈകോർക്കാൻ രജനികാന്ത്? appeared first on Express Kerala.
