മനാമ: ഹോപ്പ് ബഹ്റൈൻ പത്താം വാർഷികാഘോഷങ്ങളുടെ ഭാഗമായി പ്രശസ്ത വയലിനിസ്റ്റ് അപർണ്ണ ബാബു ബഹ്റൈനിൽ എത്തി. ഹോപ്പിന്റെ ഭാരവാഹികൾ അപർണാ ബാബുവിനെ എയർപോർട്ടിൽ സ്വീകരിച്ചു. ബഹ്‌റൈനിലെ ജീവകാരുണ്യ കൂട്ടായ്‌മയായ ഹോപ്പ് അഥവാ പ്രതീക്ഷ ബഹ്റൈന്റെ പത്താം വാർഷികാഘോഷം മെയ് 16 ന് വെള്ളിയാഴ്ച ഇന്ത്യൻ ക്ലബ്ബിൽ വച്ചാണ് സംഘടിപ്പിച്ചിരിക്കുന്നത്.
ദുബൈയിലെ പ്രശസ്ത സാമൂഹിക പ്രവർത്തകൻ അഷ്‌റഫ് താമരശ്ശേരി പരിപാടിയിൽ മുഖ്യാഥിതി ആയി പങ്കെടുക്കും. ബഹ്‌റൈനിലെ ജീവകാരുണ്യ രംഗത്ത് പ്രവർത്തിച്ചിരുന്ന സാമൂഹിക പ്രവർത്തകൻ ചന്ദ്രൻ തിക്കോടിയും ഈ പ്രോഗ്രാമിന്റെ ഭാഗമായി ബഹ്റൈനിൽ എത്തിയിട്ടുണ്ട്. മെയ് 16 വെള്ളിയാഴ്ച്ച വൈകിട്ട് 7.00 മണിക്കാണ് പ്രോഗ്രാം. പരിപാടിയുടെ ഭാഗമായി പ്രശസ്ത വയലിനിസ്റ്റ് അപർണ്ണ ബാബുവിന്റെ നേതൃത്വത്തിൽ ലൈവ് മ്യൂസിക്കൽ ഷോയും മറ്റ് കലാ പരിപാടികളും അരങ്ങേറും. സുബി ഹോംസ് ഇവൻറ്സിന്റെ സഹകരണത്തോടെയാണ് പ്രോഗ്രാം സംഘടിപ്പിച്ചിരിക്കുന്നത്.
വാർഷികത്തോട് അനുബന്ധിച്ച് ഹോപ്പിന്റെ പത്തുവർഷത്തെ പ്രവർത്തനങ്ങൾ ഉൾക്കൊള്ളിച്ചുകൊണ്ടുള്ള സുവനീർ പ്രകാശനവും ഉണ്ടായിരിക്കും. ഹോപ്പിന്റെ പ്രസിഡന്റും പ്രോഗ്രാം കൺവീനറുമായ ഷിബു പത്തനംതിട്ടയും, സെക്രട്ടറി ജയേഷ് കുറുപ്പും ഏവരെയും ഈ പ്രോഗ്രാമിലേയ്ക്ക് സ്വാഗതം ചെയ്യുന്നതായി അറിയിച്ചു.
