കൈവശം വളരെയധികം ലഗേജ് ഉണ്ടായിരിക്കുകയും എന്നാല്‍ അതുസംബന്ധിച്ച നിയമങ്ങള്‍ കൃത്യമായി അറിയാതിരിക്കുകയും ചെയ്യുമ്പോള്‍ വിമാനയാത്ര സങ്കീര്‍ണമായേക്കാം. അതിനാല്‍, നിങ്ങളുടെ ഹാന്‍ഡ് ലഗേജില്‍ ഏതൊക്കെ തരം പെര്‍ഫ്യൂമുകള്‍, കൊളോണുകള്‍, ദ്രാവകങ്ങള്‍, ജെല്ലുകള്‍ എന്നിവ കൊണ്ടുപോകാമെന്ന് അറിയേണ്ടത് പ്രധാനമാണ്. രാജ്യാന്തര വിമാനത്തിലോ ആഭ്യന്തര വിമാനത്തിലോ പോകുമ്പോള്‍ ഇവ എത്ര അളവ് അനുവദനീയമാണെന്ന് അറിഞ്ഞിരിക്കേണ്ടതുണ്ട്.
വിമാനത്തില്‍ എത്ര അളവ് പെര്‍ഫ്യൂം കൊണ്ടുപോകാം ?
ലോകമെമ്പാടുമുള്ള എയര്‍ലൈന്‍ കമ്പനികള്‍ ഇന്റര്‍നാഷണല്‍ എയര്‍ ട്രാന്‍സ്‌പോര്‍ട്ട് അസോസിയേഷന്റെ മാര്‍ഗനിര്‍ദ്ദേശങ്ങള്‍ അനുസരിച്ചാണ് പ്രവര്‍ത്തിക്കുന്നത്. അതുപ്രകരാം ഹാന്‍ഡ് ലഗേജില്‍ പരമാവധി 100 മില്ലി വരെ പെര്‍ഫ്യൂം കൊണ്ടുപോകാം. കൂടാതെ, പെര്‍ഫ്യൂം ഉള്‍പ്പടെ ദ്രാവകങ്ങളുള്ള എല്ലാ പാത്രങ്ങളും ഒരു ലിറ്റര്‍ പരമാവധി ശേഷിയുള്ള സുതാര്യവും വീണ്ടും സീല്‍ ചെയ്യാവുന്നതുമായ പ്ലാസ്റ്റിക് ബാഗില്‍ വയ്ക്കണം.
നിയന്ത്രണം എന്തുകൊണ്ട് ?
പെര്‍ഫ്യൂം വളരെ എളുപ്പത്തില്‍ തീപിടിക്കുന്ന വസ്തുവാണ്. ചെറിയ തീയിലേക്ക് പെര്‍ഫ്യൂം തളിക്കുമ്പോള്‍ അത് ആളിക്കത്തുമെന്നതിന് ശാസ്ത്രീയ തെളിവുകളുമുണ്ട്. വിമാനത്തിന്റെ ഏതെങ്കിലും ഭാഗത്ത് തീ പിടിച്ചാല്‍, പെര്‍ഫ്യൂം കാരണം അത് ആളിപ്പടരാം. അതിനാല്‍, ക്യാബിനില്‍ പരിമിതമായ അളവില്‍ മാത്രമേ ഇത് അനുവദിക്കാനാകൂ.
അതേസമയം നിങ്ങളുടെ ചെക്ക് ഇന്‍ ബാഗേജില്‍ അത് കൊണ്ടുപോകാന്‍ കഴിയും. ഹാന്‍ഡ് ബാഗേജില്‍ ഉള്‍പ്പെടുത്തുന്ന പെര്‍ഫ്യൂമിന്റെ അളവ് നിശ്ചിത പരിധി കവിയുന്നുവെങ്കില്‍, നിങ്ങള്‍ അത് ലഗേജ് ചെക്ക്-ഇന്നിലേക്ക് മാറ്റുകയോ അല്ലെങ്കില്‍ ഉപേക്ഷിക്കുകയോ ചെയ്യേണ്ടിവരും. അവസാന നിമിഷത്തെ ബുദ്ധിമുട്ട് ഒഴിവാക്കാന്‍, നിയമങ്ങള്‍ പാലിക്കാന്‍ ശ്രദ്ധിക്കേണ്ടതുണ്ട്.
