ന്യൂദല്‍ഹി: ചെസ്സില്‍ ലോക മൂന്നാം റാങ്കിലേക്കുയര്‍ന്ന് ഇന്ത്യയുടെ അര്‍ജുന്‍ എരിഗെയ്സി. ജൂണ്‍ മാസത്തില്‍ ആഗോള ചെസ് ഫെഡറേഷനായ ഫിഡെ പുറത്ത് വിട്ട ചെസ്സിലെ ലോക റാങ്കിംഗിലാണ് അര്‍ജുന്‍ എരിഗെയ്സി മൂന്നാം റാങ്കിലേക്കുയര്‍ന്നത്. ലോക ചെസ് ചാമ്പ്യനായ ഗുകേഷായിരുന്നു ഇതുവരെ മൂന്നാം സ്ഥാനത്ത്. ഗുകേഷ് ഇപ്പോള്‍ അഞ്ചാം സ്ഥാനത്തേക്ക് പിന്തള്ളപ്പെട്ടു. 2787 ആണ് അര്‍ജുന്‍ എരിഗെയ്സിയുടെ ഇഎല്‍ഒ റേറ്റിംഗ്. 2776 ഇഎല്‍ഒ റേറ്റിംഗേ ഗുകേഷിനുള്ളൂ.
പതിവുപോലെ മാഗ്നസ് കാള്സന് തന്നെയാണ് ലോക ഒന്നാം റാങ്ക്. 2837ആണ് കാള്‍സന്റെ റേറ്റിംഗ്. രണ്ടാം സ്ഥാനത്ത് യുഎസിന്റെ ഹികാരു നകാമുറയാണ്. റേറ്റിംഗ് 2804 ആണ്.
ഇക്കുറി ഇന്ത്യയില്‍ നിന്നുള്ള നാല് പേര്‍ ആദ്യ പതിനൊന്ന് റാങ്കില്‍ ഉള്‍പ്പെട്ടിട്ടുണ്ട് എന്നത് ലോകചെസ്സിലെ ഇന്ത്യയുടെ ആധിപത്യത്തിന്റെ സൂചനയാണ്. അര്‍ജുന്‍ എരിഗെയ്സി (മൂന്നാം റാങ്ക്) ഗുകേഷ് (അഞ്ചാം റാങ്ക്), പ്രജ്ഞാനന്ദ (ഏഴാം റാങ്ക്), അരവിന്ദ് ചിതംബരം (11ാം റാങ്ക്) എന്നിങ്ങനെയാണ് നാല് ഇന്ത്യക്കാര്‍ മുന്‍നിരയില്‍ സ്ഥനം പിടിച്ചിരിക്കുന്നത്. ആറാം റാങ്കിലുള്ള ഉസ്ബെക്കിസ്ഥാന്റെ അബ്ദുസത്തൊറോവിനും പ്രജ്ഞാനന്ദയ്‌ക്കും ഒരേ റേറ്റിംഗാണ്- 2767 ആണ് ഇരുവരുടെയും ഇഎല്‍ഒ റേറ്റിംഗ്.
