മനാമ: സയ്യിദ് അലി ബാഫഖി തങ്ങൾക്ക് ഐ സി എഫ് ഇന്റർനാഷണൽ അവാർഡ്. ആറ് പതിറ്റാണ്ട് കാലമായി കേരളീയ മത സാമൂഹിക രംഗങ്ങളിൽ നിസ്തുല സേവനം അനുഷ്ഠിക്കുകയും വിദ്യാഭ്യാസ ജീവകാരുണ്യ പ്രവർത്തനങ്ങളിൽ അദ്ദേഹം നടത്തുന്ന അതുല്യമായ പ്രവർത്തനങ്ങൾക്കുമുള്ള അംഗീകാരമായാണ് ഒരു ലക്ഷം രൂപയും പ്രശസ്തിഫലകവും അടങ്ങുന്ന അവാർഡ്. നാളെ (ശനി) കോഴിക്കോട് കാലിക്കറ്റ് ടവർ ഓഡിറ്റോറിയത്തിൽ നടക്കുന്ന ഇന്റർനാഷണൽ മുഅല്ലിം കോൺഫറൻസിൽ അവാർഡ് സമ്മാനിക്കുമെന്ന് ഐ സി എഫ് ഭാരവാഹികൾ അറിയിച്ചു.
കേരളത്തിലെത്തിയ ബാഫഖി കുടുംബത്തിലെ ഏറ്റവും മുതിർന്ന നേതാവാണ് സയ്യിദ് അലി ബാഫഖി തങ്ങൾ. യമനിലെ തരീമില് നിന്ന് ബാഫഖി കുടുംബം പതിനെട്ടാം നൂറ്റാണ്ടിന്റെ തുടക്കത്തിലാണ് കേരളത്തിലെത്തിയിരുന്നത്. അന്ന് മുതൽ തന്നെ കേരളീയ മുസ്ലിം സമൂഹത്തിന്റെ നേതൃപദവിയിൽ ബാഫഖി കുടുംബമുണ്ട്.
സമസ്ത കേരള ജംഇയ്യത്തുല് ഉലമയുടെ വൈസ് പ്രസിഡന്റ്, സുന്നി വിദ്യാഭ്യാസ ബോർഡ്, സുന്നി ജംഇയ്യത്തുൽ മുഅല്ലിമീൻ, മർകസ് എന്നിവയുടെ പ്രസിഡന്റ് തുടങ്ങിയ നിലകളിൽ പ്രവർത്തിക്കുന്ന സയ്യിദ് അലി ബാഫഖി തങ്ങള് മദ്രസാ വിദ്യാഭ്യാസ പ്രവർത്തനങ്ങൾ വിപുലീകരിക്കുന്നതിനും മദ്രസാധ്യാപകരുടെ ക്ഷേമ പ്രവർത്തനങ്ങൾക്കുമായി നിരന്തരം പ്രവർത്തനം നടത്തുന്ന വ്യക്തിത്വമാണ്. ആറു പതിറ്റാണ്ടിലധികമായി തുടർന്ന ആ സേവനം ഇപ്പോഴും വീല്ചെയറില് എത്തിപ്പെടാന് പറ്റുന്നിടത്തെല്ലാം എത്തണമെന്ന ആഗ്രഹം അദ്ദേഹത്തിനുണ്ട്. ഈ സേവനങ്ങളെ ആദരിക്കുന്നതിന്റെ ഭാഗമായാണ് അവാർഡെന്ന് ഐ സി എഫ് വ്യക്തമാക്കി.
സയ്യിദ് അഹമ്മദ് ബാഫഖി സയ്യിദത്ത് നഫീസ ബീവി ദമ്പതികളുടെ മകനായി 1938 നവംബർ 14 നാണ് സയ്യിദ് അലി ബാഫഖി തങ്ങളുടെ ജനനം. മദ്രസകാലത്തിനു ശേഷം പള്ളിദർസുകളുടെ ലോകത്തേക്ക് കടന്ന തങ്ങൾ പട്ടിക്കാട് ജാമിഅ നൂരിയയിൽ നിന്നാണ് ഉപരിപഠനം പൂർത്തിയാക്കിയത്. പഠനശേഷം കാന്തപുരം എപി അബൂബക്കർ മുസ്ലിയാരുടെ അഭ്യർത്ഥനയെത്തുടർന്ന് പൊതുരംഗത്ത് സജീവമാകുകയായിരുന്നു.
നാളെ കോഴിക്കോട്ട് നടക്കുന്ന മുഅല്ലിം കോൺഫറൻസിൽ മദ്രസാ വിദ്യാഭ്യാസ പ്രവർത്തന രംഗത്തെ നിസ്തുല സേവനങ്ങൾക്ക് വി പി എം ഫൈസി വില്യാപ്പള്ളി, തെന്നല അബൂഹനീഫൽ ഫൈസി, എ കെ അബ്ദുൽ ഹമീദ് സാഹിബ് എന്നിവരെയും ആദരിക്കും.
ഇന്ത്യൻ ഗ്രാൻഡ് മുഫ്തി കാന്തപുരം എ പി അബൂബക്കർ മുസ്ലിയാർ, സയ്യിദ് ഇബ്രാഹീമുൽ ഖലീലുൽ ബുഖാരി, സയ്യിദ് ആറ്റക്കോയ തങ്ങൾ കുമ്പോൽ, പൊന്മള അബ്ദുൽ ഖാദിർ മുസ്ലിയാർ, വണ്ടൂർ അബ്ദുറഹ്മാൻ ഫൈസി, സി പി സൈതലവി ചെങ്ങര, മജീദ് കക്കാട്, റഹ്മത്തുള്ള സഖാഫി എളമരം, സയ്യിദ് അബ്ദുറഹ്മാൻ ആറ്റക്കോയ തങ്ങൾ, അബ്ദുൽ അസീസ് സഖാഫി മമ്പാട്, നിസാർ സഖാഫി, സുലൈമാൻ സഖാഫി കുഞ്ഞുകുളം തുടങ്ങിയ പ്രാസ്ഥാനിക നേതാക്കൾ പങ്കെടുക്കും.
