കൊല്ക്കത്ത: അര്ജന്റീന ഫുട്ബോള് ടീം നായകന് ലയണല് മെസി ഡിസംബറില് ഇന്ത്യ സന്ദര്ശിക്കും.ഇന്ത്യയിലെത്തുന്നതിന് മെസിയുടെ ഏജന്റ് കൂടിയായ പിതാവ് ജോര്ജെ മെസിയുടെയും സംഘത്തിന്റെയും അനുമതി കിട്ടിയതായി കൊല്ക്കത്തയിലെ വ്യവസായി സതാദ്രു ദത്ത പറഞ്ഞു.
മെസി ഡിസംബര് 12ന് കൊല്ക്കത്തയിലെത്തും. 13ന് അഹമ്മദാബാദ്, 14ന് മുംബയ്, 15ന് ന്യൂദല്ഹി എന്നീ നഗരങ്ങളിലെ വിവിധ പരിപാടികളില് പങ്കെടുക്കും.ന്യൂദല്ഹിയില് മെസി പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും.
മെസിയുടെ ഇന്ത്യ സന്ദര്ശനം ഗോട്ട് ടൂര് ഓഫ് ഇന്ത്യ’ എന്ന പേരിലായിരിക്കും അറിയപ്പെടുക. ഈ മാസം 28നും സെപ്റ്റംബര് ഒന്നിനും ഇടയില് മെസി തന്നെ സ്വന്തം സമൂഹമാധ്യമങ്ങളിലൂടെ ഇന്ത്യ സന്ദര്ശിക്കുന്ന വിവരം ഔദ്യോഗികമായി പുറത്തുവിടുമെന്നും സതാദ്രു ദത്ത അറിയിച്ചു. ഇന്ത്യ സന്ദര്ശിക്കുന്നതിനോടനുബന്ധിച്ചുളള വീഡിയോയും മെസി സമൂഹമാധ്യമങ്ങളില് പോസ്റ്റ് ചെയ്യും.
മെസിക്കൊപ്പം ഇന്റര് മിയാമി ടീം അംഗങ്ങളായ റോഡ്രിഗോ ഡീ പോള്, ലൂയി സുവാരസ്, ജോര്ഡി ആല്ബ, സെര്ജിയോ ബുസ്കെറ്റ്സ് എന്നിവരുമുണ്ടായേക്കും. എന്നാല് ഇക്കാര്യത്തില് ഇപ്പോള് ഉറപ്പുപറയാനാവില്ലെന്ന് സതാദ്രു ദത്ത പറഞ്ഞു. ഈ വര്ഷം ഫെബ്രുവരി 28നാണ് മെസിയുടെ വീട്ടിലെത്തി പിതാവ് ജോര്ജെ മെസിയുമായി കൂടിക്കാഴ്ച നടത്തിയതെന്ന് സതാദ്രു ദത്ത വെളിപ്പെടുത്തി. മുക്കാല് മണിക്കൂറോളം നീണ്ട കൂടിക്കാഴ്ചയില് മെസിയുമായും സംസാരിച്ചെന്നും ദത്ത പറഞ്ഞു.
