കണ്ണൂര്: സൂപ്പര് ലീഗ് കേരള പുതിയ സീസണില് കിരീടം ലക്ഷ്യമിട്ട് തയ്യാറെടുപ്പ് നടത്തുന്ന കണ്ണൂര് വാരിയേഴ്സ് കേരള ബ്ലാസ്റ്റേഴ്സ് താരത്തെയും ടീമിലെത്തിച്ചു. മധ്യനിരതാരവും തിരുവനന്തപുരം പൊഴിയൂര് സ്വദേശിയുമായ എബിന് ദാസിനെയാണ് അവര് സ്വന്തമാക്കിയത്. കരാര് അടിസ്ഥാനത്തിലാണ് താരത്തെ വാരിയേഴ്സ് ടീമിലെത്തിച്ചത്. ആവശ്യഘട്ടത്തില് വിങ്ങറുടെ പൊസിഷനിലും എബിന് കളിക്കാന് സാധിക്കും. മധ്യനിരയില് കളി നിയന്ത്രിക്കുന്നതിനൊപ്പം ഗോള് അടിക്കാനും അടിപ്പിക്കാനും കഴിവുള്ള താരമാണ്.
കേരള ബ്ലാസ്റ്റേഴ്സ് റിസര്വ് ടീമില് കളിച്ച താരം 2024-25 സീസണില് സൂപ്പര് കപ്പില് കേരള ബ്ലാസ്റ്റേഴ്സ് സീനിയര് ടീമിനായി അരങ്ങേറി. മോഹന് ബഗാന് സൂപ്പര് ജയന്റ്സിനെതിരെയാണ് താരം അരങ്ങേറ്റം കുറിച്ചത്. കഴിഞ്ഞ സീസണില് കേരള പ്രമീയര് ലീഗില് ബ്ലാസ്റ്റേഴ്സിന് വേണ്ടി 13 മത്സരങ്ങളില് നിന്ന് ആറ് ഗോളുകള് നേടി.
ഭാരത ടീമിന്റെ അണ്ടര് 16, 19, 20 വിഭാഗത്തില് കളിച്ചിട്ടുണ്ട്. 2020-21 സീസണില് അണ്ടര് 16 വിഭാഗത്തില് ദുബായിയില് നടന്ന ഫുട്ബോള് പര്യടനത്തിലാണ് ആദ്യം ഭാരത കുപ്പായം അണിഞ്ഞത്. അന്ന് ഭാരതത്തിന് വേണ്ടി അബുദാബി ക്ലബിനെതിരെ ഗോളും നേടി. ആ വര്ഷത്തെ കേരള ഫുട്ബോള് അസോസിയേഷന്റെ മികച്ച താരത്തിനുള്ള പുരസ്കരവും സ്വന്തമാക്കിയിരുന്നു. അണ്ടര് 20 വിഭാഗത്തില് സാഫ് കപ്പ്, ഏഷ്യ കപ്പ് എന്നീ മത്സരങ്ങളും കളിച്ചു. 2023 അണ്ടര് 19 സാഫ് കപ്പ് ജേതാക്കളായ ഭാരത ടീമില് എബിന് ഉണ്ടായിരുന്നു. ദേശീയ ഫുട്ബോള് ചാമ്പ്യന്ഷിപ്പില് കേരളത്തിന് വേണ്ടി അണ്ടര് 14 വിഭാഗത്തില് കളിച്ച താരം ആറ് മത്സരങ്ങളില് നിന്നായി രണ്ട് ഹാട്രിക്ക് അടക്കം പത്ത് ഗോളാണ് നേടിയത്.
ലിറ്റില് ഫ്ളവര് ഫുട്ബോള് അക്കാദമി, ഗോകുലം കേരള എഫ്.സി., എന്നീ ടീമുകള്ക്ക് വേണ്ടിയും ബൂട്ടുകെട്ടിയിട്ടുണ്ട്.
