അഹമ്മദാബാദ്: 23 വയസ്സില്‍ താഴെയുള്ളവര്‍ക്കായുള്ള ദേശീയ ഏകദിന ക്രിക്കറ്റ് ടൂര്‍ണ്ണമെന്റില്‍ രാജസ്ഥാനോട് കേരളം പൊരുതിത്തോറ്റു. അവസാന ഓവര്‍ വരെ നീണ്ട ആവേശപ്പോരാട്ടത്തിന് ഒടുവിലായിരുന്നു കേരളത്തിന്റെ ഏഴ് റണ്‍സ് തോല്‍വി. ആദ്യം ബാറ്റ് ചെയ്ത രാജസ്ഥാന് 50 ഓവറില്‍ ഏഴ് വിക്കറ്റ് നഷ്ടത്തില്‍ 340 റണ്‍സെടുത്തു. മറുപടി ബാറ്റിങ്ങിന് ഇറങ്ങിയ കേരളം 49.5 ഓവറില്‍ 333 റണ്‍സിന് ഓള്‍ ഔട്ടാവുകയായിരുന്നു.
ടോസ് നേടി ബാറ്റിങ് തെരഞ്ഞെടുത്ത രാജസ്ഥാന് ആദ്യ ഓവറില്‍ തന്നെ വിക്കറ്റ് നഷ്ടമായെങ്കിലും തുടര്‍ന്നെത്തിയവര്‍ തകര്‍ത്തടിച്ച് മുന്നേറുകയായിരുന്നു. 61 റണ്‍സെടുത്ത മിനാഫ് ഷെയ്ഖിന് ശേഷമെത്തിയ കരണ്‍ ലമ്പയും മികച്ച രീതിയില്‍ ബാറ്റ് വീശി. 106 പന്തുകളില്‍ 144 റണ്‍സ് കൂട്ടിച്ചേര്‍ത്ത രോഹന്‍ – കരണ്‍ സഖ്യമാണ് രാജസ്ഥാന്റെ കൂറ്റന്‍ സ്‌കോറിന് അടിത്തറയിട്ടത്. കരണ്‍ 62ഉം രോഹന്‍ 147ഉം റണ്‍സെടുത്തു. 136 പന്തുകളില്‍ 12 ഫോറുകളും അഞ്ച് സിക്‌സും അടങ്ങുന്നതായിരുന്നു രോഹന്‍ വിജയുടെ ഇന്നിങ്‌സ്. തുടര്‍ന്നെത്തിയവരും ആഞ്ഞടിച്ചതോടെ രാജസ്ഥാന്റെ ഇന്നിങ്‌സ് 340 വരെ നീണ്ടു. കേരളത്തിന് വേണ്ടി അഭിറാം മൂന്നും പവന്‍ രാജ് രണ്ടും വിക്കറ്റുകള്‍ വീഴ്‌ത്തി.
മറുപടി ബാറ്റിങ്ങിന് ഇറങ്ങിയ കേരളത്തിന് ഓപ്പണര്‍മാരായ അക്ഷയും കൃഷ്ണനാരായണും ചേര്‍ന്ന് ഉജ്ജ്വല തുടക്കമാണ് നല്‍ിയത്. കൂറ്റന്‍ ലക്ഷ്യത്തിനൊത്ത് അതിവേഗം സ്‌കോര്‍ ചെയ്ത് മുന്നേറിയ ഇരുവരും ചേര്‍ന്ന് ആദ്യ വിക്കറ്റില്‍ 160 റണ്‍സാണ് കൂട്ടിച്ചേര്‍ത്തത്. 78 റണ്‍സെടുത്ത കൃഷ്ണനാരായണ് പകരമെത്തിയ പവന്‍ ശ്രീധറും മികച്ച രീതിയില്‍ ബാറ്റ് വീശി. എന്നാല്‍ ഏഴ് റണ്‍സെടുക്കുന്നതിനിടെ മൂന്ന് വിക്കറ്റുകള്‍ നഷ്ടപ്പെട്ടത് കേരളത്തിന് തിരിച്ചടിയായി. അക്ഷയ് 107 റണ്‍സും പവന്‍ ശ്രീധര്‍ 42ഉം ക്യാപ്റ്റന്‍ രോഹന്‍ നായര്‍ ഒരു റണ്ണും നേടി പുറത്തായി. ഒരു വശത്ത് ഷോണ്‍ റോജര്‍ ഉറച്ച് നിന്ന് പൊരുതിയെങ്കിലും വിജയത്തിന് തൊട്ടരികെ കേരളത്തിന്റെ പോരാട്ടം അവസാനിച്ചു. അവസാന ഓവറിലെ അഞ്ചാം പന്തില്‍ ഷോണ്‍ റണ്ണൗട്ടാവുകയായിരുന്നു. 34 പന്തുകളില്‍ നിന്ന് ഒന്‍പത് ബൗണ്ടറികളടക്കം 58 റണ്‍സാണ് ഷോണ്‍ നേടിയത്. രാജസ്ഥാന് വേണ്ടി നീലേഷ് നാല് വിക്കറ്റുകള്‍ വീഴ്‌ത്തി.
