തിരുവനന്തപുരം: ഭാരതം-ശ്രീലങ്ക വനിതാ ട്വന്റി20 ക്രിക്കറ്റ് പരമ്പരയിലെ നാലാം പോരാട്ടം ഇന്ന്. കാര്യവട്ടം സ്പോര്ട്സ് ഹബ് ഗ്രീന്ഫീല്ഡ് സ്റ്റേഡിയത്തില് നടക്കുന്ന മത്സരത്തില് ജയിച്ച് ആധിപത്യം പുലര്ത്താനാണ് ഹര്മന്പ്രീത് കൗറും സംഘവും കളത്തിലിറങ്ങുന്നത്. അഞ്ച് മത്സര പരമ്പരയിലെ ആദ്യ മൂന്ന് കളിയും ജയിച്ച് ഭാരതം പരമ്പര ഉറപ്പാക്കി കഴിഞ്ഞു. പരമ്പര നഷ്ടമായെങ്കിലും ബാക്കിയുള്ള മത്സരങ്ങളില് ജയിച്ച് തിരിച്ചുവരാനുള്ള ശ്രമത്തിലാണ് ശ്രീലങ്കന് വനിതകള്.
ഓള്റൗണ്ട് മികവാണ് ഭാരത ടീമിന്റെ പ്രധാന കരുത്ത്. ദീപ്തി ശര്മയുടെയും രേണുക സിംഗ് താക്കൂറിന്റെയും ബൗളിംഗ് പ്രകടനമാണ് ഗ്രീന്ഫീല്ഡില് ഭാരതത്തിന് മുന്തൂക്കം നല്കുന്നത്. ഓപ്പണര് ഷഫാലി വര്മ്മയുടെ തകര്പ്പന് ഫോമാണ് ബാറ്റിംഗില് ഇന്ത്യയുടെ ആത്മവിശ്വാസം. വിശാഖപട്ടണത്തെ രണ്ടാം മത്സരത്തിലും കാര്യവട്ടത്തെ മൂന്നാം മത്സരത്തിലും ഷഫാലി സുന്ദരമായൊരു ബാറ്റിങ് വിരുന്നാണ് ക്രിക്കറ്റ് ആരാധകര്ക്കായി സമ്മാനിച്ചത്. ആദ്യ മത്സരത്തില് ജെമീമ റോഡ്രിഗസിന്റെ മികവിലായിരുന്നു ഭാരതത്തിന്റെ ജയം. അതേസമയം, വൈസ് ക്യാപ്റ്റനും സൂപ്പര് താരവുമായ സ്മൃതി മന്ദനയ്ക്ക് ഈ പരമ്പരയില് ഇതുവരെ മികച്ച സ്കോറുകള് കണ്ടെത്താനാവാത്തതാണ് ചെറിയ നിരാശ പകരുന്നത്.
മറുഭാഗത്ത്, ബാറ്റിംഗ് നിരയുടെ പരാജയമാണ് ശ്രീലങ്കയെ വലയ്ക്കുന്നത്. മിക്ക ബാറ്റര്മാരും ചെറിയ സ്കോറുകള്ക്ക് പുറത്താകുന്നതും ഫീല്ഡിങ്ങിലെ പിഴവുകളും അവര്ക്ക് തിരിച്ചടിയാകുന്നു.
വനിതാ ക്രിക്കറ്റ് പൂരം പൊടിപാറുന്ന പശ്ചാത്തലത്തില് തലസ്ഥാന നഗരി ആവേശത്തിലാണ്. നഗരവാസികളില് നിന്ന് വലിയ പന്തുണയാണ് ലഭിക്കുന്നത്. എണ്ണായിരത്തോളം കാണികളാണ് കഴിഞ്ഞ മത്സരം കാണാനെത്തിയത്. പരമ്പരയിലെ അവസാന മത്സരം ചൊവ്വാഴ്ച്ച കാര്യവട്ടത്ത് നടക്കും.
