ധാക്ക : ട്വന്റി20 ലോകകപ്പിന് ഇന്ത്യയിലേക്കില്ലെന്ന് ബംഗ്ലദേശ് ഔദ്യോഗികമായി പ്രഖ്യാപിച്ചു. താരങ്ങളുടെ സുരക്ഷ കണക്കിലെടുത്ത് നിലവിലെ സാഹചര്യത്തില് ഇന്ത്യയിലേക്കു യാത്ര ചെയ്യാന് ബുദ്ധിമുട്ടുണ്ടെന്ന് ബംഗ്ലദേശ് ക്രിക്കറ്റ് ബോര്ഡ് അറിയിച്ചു.
ബിസിസിഐ നിര്ദേശ പ്രകാരം ബംഗ്ലദേശ് താരം മുസ്തഫിസുര് റഹ്മാനെ ഇന്ത്യന് പ്രീമിയര് ലീഗില്നിന്ന് ഒഴിവാക്കിയിരുന്നു. ഇതിനു പിന്നാലെയാണ് ബംഗ്ലദേശിന്റെ നീക്കം.
ഞായറാഴ്ച ഉച്ചയ്ക്കു ശേഷം ബംഗ്ലദേശ് ക്രിക്കറ്റ് ബോര്ഡ് യോഗം ചേര്ന്നാണ് ഇന്ത്യയിലേക്കില്ലെന്നു പ്രഖ്യാപിച്ചത്. ബംഗ്ലദേശ് സര്ക്കാരിന്റെ കൂടി നിര്ദേശം പരിഗണിച്ചാണ് തീരുമാനം.ബംഗ്ലാദേശിന് ഇന്ത്യയിലുളള മത്സരങ്ങള് ഇന്ത്യയ്ക്കു പുറത്തേക്കു മാറ്റണമെന്ന് രാജ്യാന്തര ക്രിക്കറ്റ് കൗണ്സിലിനോട് ആവശ്യപ്പെടുന്നുവെന്ന് ബംഗ്ലദേശ് ക്രിക്കറ്റ് ബോര്ഡ് പറഞ്ഞു.
അതേസമയം ബംഗ്ലദേശിന്റെ ആവശ്യത്തോട് ഐസിസിയോ, ബിസിസിഐയോ ഇതുവരെ പ്രതികരിച്ചിട്ടില്ല.
ലോകകപ്പിലെ ബംഗ്ലദേശിന്റെ മത്സരങ്ങള് ശ്രീലങ്കയിലേക്കു മാറ്റുന്നതിനുള്ള നടപടി സ്വീകരിക്കണമെന്ന് ബംഗ്ലദേശ് ക്രിക്കറ്റ് ബോര്ഡിനോട് (ബിസിബി) കായിക മന്ത്രാലയം ആവശ്യപ്പെട്ടിരുന്നു. താരങ്ങളുടെ സുരക്ഷ സംബന്ധിച്ച് ആശങ്കയുള്ളതിനാലാണ് വേദിമാറ്റം നിര്ദേശിച്ചത്. ഇക്കാര്യം അറിയിച്ച് ഐസിസിക്ക് കത്തയയ്ക്കാന് ബിസിബിയോടു നിര്ദേശിച്ചതായി സര്ക്കാര് ഉപദേഷ്ടാവ് ആസിഫ് നസ്രുള് പറഞ്ഞു.
നിലവിലെ ഷെഡ്യൂള് പ്രകാരം ട്വന്റി20 ലോകകപ്പിന്റെ ഗ്രൂപ്പ് ഘട്ടത്തില് ബംഗ്ലദേശിന്റെ നാലു മത്സരങ്ങളാണ് ഇന്ത്യയില് ഉളളത്. ഇതില് മൂന്നെണ്ണം കൊല്ക്കത്ത ഈഡന് ഗാര്ഡന്സിലും ഒരെണ്ണം മുംബയ് വാങ്കഡെ സ്റ്റേഡിയത്തിലുമാണ്. വെസ്റ്റിന്ഡീസ് (ഫെബ്രുവരി 7), ഇറ്റലി (ഫെബ്രുവരി 9), ഇംഗ്ലണ്ട് (ഫെബ്രുവരി 14) എന്നിവര്ക്കെതിരെയാണ് കൊല്ക്കത്തയിലെ മത്സരങ്ങള്.ഫെബ്രുവരി 17നു നേപ്പാളിനെതിരെയാണ് മുംബയിലെ മത്സരം. മുസ്തഫിസുറിനെ പുറത്താക്കിയതിനാല് ബംഗ്ലാദേശില് ഐപിഎല് ബ്രോഡ്കാസ്റ്റിംഗ് വിലക്കുമെന്നും വാര്ത്തയുണ്ട്.
