ഇന്ത്യൻ സിനിമയിൽ റീ-റിലീസുകൾ തരംഗമാകുന്ന ഈ കാലത്ത് തമിഴ് ബോക്സ് ഓഫീസിൽ പോരാട്ടം മുറുകുകയാണ്. തല അജിത്തിന്റെ സൂപ്പർഹിറ്റ് ചിത്രം ‘മങ്കാത്ത’ വീണ്ടും തിയറ്ററുകളിലെത്തിയപ്പോൾ വലിയ ആവേശമാണ് ആരാധകർക്കിടയിലുണ്ടായത്. റീ-റിലീസ് ആദ്യ ദിനത്തിൽ തമിഴ്നാട്ടിൽ നിന്ന് മാത്രം 3.75 കോടി രൂപ നേടി മങ്കാത്ത കരുത്തറിയിച്ചു. ഇതോടെ ദളപതി വിജയ്യുടെ ‘ഗില്ലി’ നേരത്തെ സ്ഥാപിച്ച 3.50 കോടിയുടെ ഓപ്പണിംഗ് റെക്കോർഡ് തകർക്കാൻ അജിത്തിന് സാധിച്ചു. ഇന്ത്യയിലാകെ മങ്കാത്ത 4.1 കോടി നേടിയപ്പോൾ ഗില്ലിക്ക് നേടാനായത് 4 കോടിയായിരുന്നു.
എന്നാൽ, ഒരു വാരാന്ത്യത്തെ മൊത്തം കളക്ഷൻ പരിശോധിക്കുമ്പോൾ ചിത്രം രണ്ടാം സ്ഥാനത്തേക്ക് പിന്തള്ളപ്പെട്ടു. റീ-റിലീസ് ചെയ്ത് ആദ്യ ആഴ്ചയിൽ തമിഴ്നാട്ടിൽ നിന്ന് 14.8 കോടി രൂപയാണ് മങ്കാത്തയ്ക്ക് സ്വന്തമാക്കാൻ കഴിഞ്ഞത്. അതേസമയം, ആദ്യ ആഴ്ചയിൽ 25 കോടി രൂപ വാരിക്കൂട്ടിയ ഗില്ലിയുടെ അധിപത്യം തകർക്കാൻ അജിത്തിന്റെ ചിത്രത്തിന് സാധിച്ചില്ല. റിലീസ് ചെയ്ത കാലത്തെക്കാളും വലിയ ഹൈപ്പോടെയാണ് ഈ ചിത്രങ്ങൾ വീണ്ടും പ്രേക്ഷകർക്ക് മുന്നിലെത്തുന്നത് എന്നത് തെന്നിന്ത്യൻ സിനിമയിലെ പുതിയ മാറ്റമായി വിലയിരുത്തപ്പെടുന്നു.
Also Read: ഡെലുലുവും പ്രഭേന്ദുവും ഹിറ്റാണ്! ഒടിടിയിലും “സർവ്വം മായ”!
വെങ്കട് പ്രഭു സംവിധാനം ചെയ്ത് 2011-ൽ പുറത്തിറങ്ങിയ മങ്കാത്ത അജിത്തിന്റെ കരിയറിലെ ഏറ്റവും വലിയ വിജയങ്ങളിലൊന്നാണ്. അർജുൻ, തൃഷ തുടങ്ങിയ വൻ താരനിര അണിനിരന്ന ചിത്രം അന്ന് 74.25 കോടിയാണ് ആകെ നേടിയത്. ജനുവരി 23-ന് വീണ്ടും പ്രദർശനത്തിനെത്തിയപ്പോഴും തിയറ്ററുകളിൽ വൻ സ്വീകരണമാണ് ലഭിക്കുന്നത്. അജിത്തിന്റേതായി ഏറ്റവും ഒടുവിൽ പുറത്തിറങ്ങിയ ‘ഗുഡ് ബാഡ് അഗ്ലി’യും മികച്ച പ്രതികരണം നേടി മുന്നേറുകയാണ്.
The post റീ-റിലീസിലും തീപാറുന്ന പോരാട്ടം; ഗില്ലിയെ വെട്ടിച്ചെങ്കിലും വീണുടഞ്ഞ് ‘മങ്കാത്ത’യുടെ റെക്കോർഡുകൾ! appeared first on Express Kerala.
