ദിവസവും ജോലി കഴിഞ്ഞ് വീട്ടിലെത്തുമ്പോൾ വിട്ടുമാറാത്ത കഴുത്തുവേദനയോ തലവേദനയോ നിങ്ങളെ അലട്ടാറുണ്ടോ? ഇതിന് കാരണം ജോലിഭാരമാണെന്ന് കരുതി വേദനസംഹാരികളിൽ അഭയം തേടുന്നവരാണ് ഭൂരിഭാഗം പേരും. എന്നാൽ ഇതിന് പിന്നിലെ യഥാർത്ഥ വില്ലൻ നിങ്ങളുടെ കൺമുന്നിലുള്ള മൊബൈൽ ഫോണോ ലാപ്ടോപ്പോ ആണെന്ന് ഡോക്ടർ കുനാൽ സൂദ് മുന്നറിയിപ്പ് നൽകുന്നു.
നമ്മൾ ഫോണോ ലാപ്ടോപ്പോ ഉപയോഗിക്കുമ്പോൾ പുലർത്തുന്ന തെറ്റായ ശാരീരിക നില (Posture) ആണ് ഈ വേദനകൾക്ക് പ്രധാന കാരണം. സ്ക്രീനിലേക്ക് നോക്കാൻ നമ്മൾ കഴുത്ത് കുനിക്കുമ്പോൾ നട്ടെല്ലിന്റെ ഭാഗമായ സെർവിക്കൽ സ്പൈനിന്മേൽ വലിയ ഭാരമാണ് അനുഭവപ്പെടുന്നത്. സാധാരണ നിലയിൽ നേരെ ഇരിക്കുമ്പോൾ തലയുടെ ഭാരം 10 മുതൽ 12 റാത്തൽ (lb) വരെയാണ് അനുഭവപ്പെടുക. എന്നാൽ 45 മുതൽ 60 ഡിഗ്രി വരെ കുനിഞ്ഞ് സ്ക്രീനിലേക്ക് നോക്കുമ്പോൾ ഈ ഭാരം 40 മുതൽ 60 റാത്തൽ വരെയായി വർദ്ധിക്കുന്നു. അതായത് സാധാരണയേക്കാൾ അഞ്ച് മടങ്ങ് അധിക സമ്മർദ്ദമാണ് കഴുത്തിലെ പേശികൾക്ക് അനുഭവപ്പെടുന്നത്.
Also Read: 30 പിന്നിട്ട സ്ത്രീകൾ നിർബന്ധമായും ചെയ്തിരിക്കേണ്ട 7 ആരോഗ്യ പരിശോധനകൾ; രോഗങ്ങളെ പടിക്കൽ നിർത്താം
കഴുത്തിൽ തുടങ്ങുന്ന ഈ അമിത സമ്മർദ്ദം പിന്നീട് കഠിനമായ തലവേദനയായി പരിണമിക്കുന്നു. സ്ക്രീനിന്റെ ഉയരവും തലയുടെ ആംഗിളും ഇതിൽ വലിയ പങ്കുവഹിക്കുന്നുണ്ട്. ഈ പ്രശ്നത്തെ പ്രതിരോധിക്കാൻ സ്ക്രീനുകൾ കണ്ണിന്റെ ലെവലിലേക്ക് ഉയർത്തി വെച്ച് ഉപയോഗിക്കണമെന്നും, ഇടയ്ക്കിടെ ഇടവേളകൾ എടുത്ത് ശാരീരിക നില മാറ്റണമെന്നും ഡോക്ടർ നിർദ്ദേശിക്കുന്നു. വേദനസംഹാരികൾ നൽകുന്ന താത്കാലിക ആശ്വാസത്തേക്കാൾ ഇത്തരം ലളിതമായ ശീലങ്ങളാണ് ദീർഘകാലാടിസ്ഥാനത്തിൽ ഗുണം ചെയ്യുക.
The post വിട്ടുമാറാത്ത കഴുത്തുവേദനയും തലവേദനയും! വില്ലൻ നിങ്ങളുടെ ഫോൺ ഉപയോഗിക്കുന്ന രീതിയാകാം appeared first on Express Kerala.
