ഫ്ളോറിഡ: അന്താരാഷ്ട്ര സൗഹൃദ ഫുട്ബോള് മത്സരത്തില് ബ്രസീല് കരുത്തരായ ക്രൊയേഷ്യയെ 3-1ന് തോല്പ്പിച്ചു. ഫ്ളോറിഡയില് നടന്ന പോരാട്ടത്തില് കാനറികള്ക്കായി ഡാനിലോ, ഇഗോര് തിയാഗോ, ഗബ്രിയേല് മാര്ട്ടിനെല്ലി എന്നിവര് ഗോളുകള് നേടി.
മത്സരത്തിന്റെ ആദ്യ പകുതിയില് ഏകപക്ഷീയമായ ഒരു ഗോളിന് മുന്നിട്ടു നിന്ന ബ്രസീല് രണ്ടാം പകുതിയില് മത്സരം അവസാനത്തോടടുക്കവെ ക്രൊയേഷ്യയോട് സമനില വഴങ്ങിയ ശേഷമാണ് ആവേശകരമായി രണ്ട് ഗോളുകള് കൂടി നേടിയത്.
ആദ്യ പകുതിയുടെ പരിക്ക് സമയത്തായിരുന്നു ഡാനിലോയുടെ ഗോള്. രണ്ടാം പകുതിയിലും കളം നിറഞ്ഞ കളിച്ചെങ്കിലും കാനറികളില് നിന്നും ഗോള് മാത്രം അകന്നു നിന്നു. ക്രൊയേഷ്യ ഒപ്പത്തിനൊപ്പം പൊരുതി ഒടുവില് 84-ാം മിനിറ്റില് ലോവ്റോ മജേര് നേടിയ ഗോളില് മത്സരം സമനിലയിലാക്കി. പിന്നെ കളിക്ക് തീപിടിച്ചു. നാല് മിനിറ്റിനകം തിയാഗോയം പരിക്ക് സമയത്ത് മാര്ട്ടിനെല്ലിയും ഗോളുകള് നേടി. കളി മെനഞ്ഞും അസിസ്റ്റുകള് നല്കിയും വിനീഷ്യസ് ജൂനിയര് വിജയശില്പ്പിയായി തിളങ്ങി.
