ബഹ്റൈൻ്റെ 53-)o ദേശീയ ദിനാഘോഷങ്ങളുടെ ഭാഗമായി ബഹ്റൈൻ കേരളീയ സമാജം ഒരുക്കുന്ന നൃത്ത സംഗീത പരിപാടിയായ “ധും ധലാക്ക സീസൺ 6 ” 2024 ഡിസംബർ 17 ചൊവ്വാഴ്ച രാത്രി 6.30മണിക്ക് സമാജം ഡയമണ്ട് ജൂബിലി ഹാളിൽ അരങ്ങേറും.കഴിഞ്ഞ അഞ്ച് വർഷങ്ങളിലായി നടന്നു വരുന്ന ധും ധലാക്കയുടെ ആറാം പതിപ്പിൻ്റെ മുഖ്യ ആകർഷണം പ്രശസ്ത നർത്തകനും നൃത്തസംവിധായനും നിരവധി ഡാൻസ് റിയാലിറ്റി ഷോകളിലൂടെ ശ്രദ്ധേയനുമായ നീരവ് ബവ്ലേച്ച , ഐഡിയ സ്റ്റാർ സിംഗർ എന്ന സംഗീത മത്സര വിജയിയും പ്രശസ്ത ഗായകനും വയലിനിസ്റ്റുമായ വിവേകാനന്ദൻ എന്നിവരാണ് .ഇവരോടൊപ്പം ബഹ്റൈനിലെ പ്രഗത്ഭരായ നൂറോളം കലാകാരന്മാരും നൃത്ത സംഗീത വിസ്മയക്കാഴ്ചയിൽ അണിചേരും.
സമാധാനത്തിന്റെയും സഹിഷ്ണുതയുടെയും സഹവർത്തിത്വത്തിന്റെയും മഹനീയ സന്ദേശം ലോകത്തിനു മുന്നിൽ പകർന്നുനൽകിക്കൊണ്ട് 53-ാം ദേശീയ ദിനമാഘോഷിക്കുന്ന ബഹ്റൈന് ഐക്യദാർഢ്യവും ആശംസകളും അർപ്പിച്ചുകൊണ്ട് സംഘടിപ്പിക്കുന്ന വിവിധ പരിപാടികളുടെ ഭാഗമായാണ് സമാജം കലാവിഭാഗത്തിൻ്റെ ആഭിമുഖ്യത്തിൽ ധുംധലാക്കയുടെ പുതിയ പതിപ്പ് സംഘടിപ്പിക്കുന്നതെന്ന്
സമാജം പ്രസിഡൻ്റ് പി.വി.രാധാകൃഷ്ണപിള്ളയും ജനറൽ സെക്രട്ടറി വർഗ്ഗീസ് കാരക്കലും വാർത്താ സമ്മേളനത്തിൽ അറിയിച്ചു.
സംഗീതം, നൃത്തം, വിനോദം എന്നിവയുടെ സമ്പൂർണ്ണ സമന്വയത്തോടെ, ബഹ്റൈനിലെ സമ്പന്നമായ സാംസ്കാരിക വൈവിധ്യത്തെ പ്രകീർത്തിച്ചുകൊണ്ട് സംഘടിപ്പിക്കുന്ന പരിപാടിയിൽ ബഹ്റൈനിലെ വിവിധ മേഖലകളിൽ നിന്നുള്ള പ്രമുഖർ പങ്കെടുക്കും.
കലാവിഭാഗം കൺവീനർ ദേവൻ പാലോടിൻ്റെ നേതൃത്വത്തിലുള്ള സംഘാടക സമിതിയാണ് ധുംധലാക്ക സീസൺ 6ൻ്റെ പ്രവർത്തനങ്ങൾക്ക് നേതൃത്വം നൽകുന്നത്.
ധുംതലക്ക സീസൺ6 ഇതുവരെ നടന്നതിൽ മികച്ചതായിരിക്കുമെന്നും അവിസ്മരണീയമായ ഒരു അനുഭവം കാണിക്കൾക്ക് ഉറപ്പു നൽകുന്നുവെന്നും പരിപാടി കാണുന്നതിന് പ്രവേശനം സൗജന്യമാണെന്നും സംഘാടകർ അറിയിച്ചു.
കൂടുതൽ വിവരങ്ങൾക്ക് 39498114 എന്ന നമ്പറിൽ സുനേഷ് സാസ്കോയെയോ 36808098 എന്ന നമ്പറിൽ ശ്രീ മനോജ് സദ്ഗമയയെയോ ബന്ധപ്പെടുക.
