മസ്കത്ത്: വരുന്ന ഖരീഫ് സീസണിൽ സഞ്ചാരികളെ ദോഫാറിലേക്ക് ആകർഷിക്കുന്നതിനായി കുവൈത്ത് സിറ്റിയിൽ പ്രമോഷനൽ കാമ്പയിനുമായി ഒമാൻ പൈതൃക, ടൂറിസം മന്ത്രാലയം. ജി.സി.സി രാജ്യങ്ങളിലെ പൗരന്മാരെ ഒമാനിലെ ഏറ്റവും പ്രശസ്തമായ ടൂറിസ്റ്റ് സീസൺ പരിചയപ്പെടുത്തുന്നതിനുള്ള വിപുലമായ ശ്രമങ്ങളുടെ ഭാഗമായാണ് ‘സഫേക് അഖ്ദർ’ അല്ലെങ്കിൽ ‘നിങ്ങളുടെ വേനൽക്കാലം പച്ചയാക്കുക’ എന്ന പേരിൽ കാമ്പയിൻ നടത്തുന്നത്. ഗൾഫിലുടനീളം കൊടും വേനലിൽ വെന്തുരുകമ്പോൾ, ദോഫാറിന്റെ മാത്രം സവിശേഷമായെത്തുന്ന കുളിരണിയിക്കുന്ന മഴയും, അതിനെത്തുടർന്ന് പച്ചപ്പണിയുന്ന ഭൂപ്രകൃതിയെയും എടുത്തുകാണിക്കുന്നതിനാണ് ഈ സംരംഭം രൂപകൽപ്പന ചെയ്തിരിക്കുന്നത്.
മിതമായ കാലാവസ്ഥയും പ്രകൃതിദൃശ്യങ്ങളും മുതൽ ആഴത്തിൽ വേരൂന്നിയ സാംസ്കാരിക പൈതൃകം വരെ ദോഫാർ വാഗ്ദാനം ചെയ്യുന്ന അസാധാരണമായ അനുഭവങ്ങൾ പ്രദർശിപ്പിക്കുക എന്നതാണ് കാമ്പയിനിലൂടെ മന്ത്രാലയം ലക്ഷ്യമിടുന്നത്. പ്രാദേശിക വിപണികളിൽനിന്നുള്ള ഇൻബൗണ്ട് ടൂറിസം വർധിപ്പിക്കുന്നതിനുള്ള മന്ത്രാലയത്തിന്റെ വിശാലമായ തന്ത്രവുമായി ഈ ശ്രമം യോജിക്കുന്നു.
ജൂൺ 21മുതൽ സെപ്റ്റംബർ 21വരെ നീണ്ടുനിൽക്കുന്ന ‘ഖരീഫ് ദോഫാർ 2025’ നുള്ള എല്ലാവിധ ഒരുക്കങ്ങളും പൂർത്തിയായതായി മന്ത്രാലയം അറിയിച്ചിട്ടുണ്ട്. സന്ദർശകർക്ക് സുഗമവും സമ്പന്നവുമായ അനുഭവം ഉറപ്പാക്കുന്നതിന് പ്രസക്തമായ സ്ഥാപനങ്ങളുമായി അടുത്ത ഏകോപനത്തോടൊപ്പം നിരവധി പ്രമോഷനൽ പരിപാടികളുടെ അവതരണവും ഒരുക്കങ്ങളിൽ ഉൾപ്പെടുന്നു. ഹോസ്പിറ്റാലിറ്റി രംഗത്ത് മികച്ച സൗകര്യമാണ് ഇപ്രാവശ്യവും ഒരുക്കിയിരിക്കുന്നത്. ലൈസൻസുള്ള സ്ഥാപനങ്ങളുടെ എണ്ണം 100 ആയി. ഇതിലൂടെ 7,300 മുറികൾ വാഗ്ദാനം ചെയ്യുന്നുണ്ടെന്ന് ഹെറിറ്റേജ് ആൻഡ് ടൂറിസം ഡയറക്ടറേറ്റ് ജനറൽ സ്ഥിരീകരിച്ചു. സലാല, താഖ, മിർബാത്ത് എന്നിവിടങ്ങളിൽ പുതിയ ഹോട്ടൽ തുറക്കുന്നതിലൂടെയാണ് ഈ സൗകര്യമൊരുങ്ങുന്നത്. ഈ ശേഷി വളർച്ച സന്നദ്ധതയിലും സേവന മികവിലും ഞങ്ങൾ ശ്രദ്ധ കേന്ദ്രീകരിക്കുന്നതിനെ പ്രതിഫലിപ്പിക്കുന്നതാണെന്ന് ദോഫാറിലെ പ്രമോഷൻ ഡിപാർട്ട്‌മെന്റ് അസിസ്റ്റന്റ് ഡയറക്ടർ അബ്ദുല്ല ബിൻ ഉമർ അൽ സബ്ബ ബാബൂദ് പറഞ്ഞു.
ടൂറിസം അടിസ്ഥാന സൗകര്യങ്ങൾ നവീകരിക്കുന്നതിനും ഹോസ്പിറ്റാലിറ്റി മേഖലയിലേക്ക് കൂടുതൽ നിക്ഷേപം ആകർഷിക്കുന്നതിനുമായി പൈതൃക-ടൂറിസം മന്ത്രാലയം പങ്കാളികളുമായി ചേർന്ന് പ്രവർത്തിക്കുന്നുണ്ടെന്ന് അദ്ദേഹം ചൂണ്ടിക്കാട്ടി. സാമ്പത്തിക വൈവിധ്യവൽക്കരണത്തിനും പ്രാദേശിക വികസനത്തിനും ടൂറിസത്തെ നിർണായക സംഭാവന നൽകുന്ന ഒമാൻ വിഷൻ 2040 മായി ഈ ശ്രമങ്ങൾ യോജിക്കുന്നു.
2024 അവസാനത്തോടെ, ദോഫാറിൽ 6,537 മുറികളുള്ള 83 ലൈസൻസുള്ള ഹോട്ടലുകളാണ് ഉണ്ടായിരുന്നതെങ്കിൽ ഈ വർഷം വേനൽക്കാലത്തോടെ അത് നൂറായി വർധിച്ചു. 2024 സീസണിൽ തുടർച്ചയായി 90 ദിവസം നീണ്ടുനിൽക്കുന്ന പരിപാടികളുടെ വിപുലമായ കലണ്ടറും ഉണ്ടായിരുന്നു.
സാംസ്കാരിക പ്രദർശനങ്ങൾ, കുടുംബ വിനോദം മുതൽ സലാല ഇന്റർനാഷനൽ സൈക്ലിങ് ടൂർ പോലുള്ള കായിക ആകർഷണങ്ങൾ വരെയുള്ള പ്രവർത്തനങ്ങൾ ഗവർണറേറ്റിലുടനീളം വിശാലമായ പ്രേക്ഷക പങ്കാളിത്തം ആകർഷിച്ചു. ടൂറിസം മന്ത്രാലയം ഖരീഫിലേക്ക് വിനോദ സഞ്ചാരികളെ ആകർഷിക്കാനായി വിവിധ മാർക്കറ്റിങ് കാമ്പയിനുകളും നടപ്പാക്കി. ഒരു മുൻനിര മൺസൂൺ ലക്ഷ്യസ്ഥാനമെന്ന നിലയിൽ ദോഫറിനെ പരിചയപ്പെടുത്തുന്നതിനായി സോഷ്യൽ മീഡിയ പ്രവർത്തനങ്ങളും ശക്തമാക്കി.
ഔദ്യോഗിക കണക്കുകൾ പ്രകാരം, 2024 ഖരീഫ് സീസണിൽ ദോഫാർ 1.048 ദശലക്ഷം സന്ദർശകരാണ് എത്തിയത്. ഇത് 2023നെ അപേക്ഷിച്ച് ഒമ്പത് ശതമാനം വർധനയാണ്. ഒമാനി സന്ദർശകരുടെ എണ്ണം 70.1 ശതമാനം വർധിച്ച് 734,500 ആയി. അതേസമയം ഗൾഫ് സന്ദർശകരുടെ എണ്ണം 16.9 ശതമാനം _ഉയർന്ന് 177,000 ആയി. മറ്റ് അറബ് രാജ്യങ്ങളിൽ നിന്നുള്ള സന്ദർശകരിലും 3.6 ശതമാനം നേരിയ വർധനവ് രേഖപ്പെടുത്തി.
