മനാമ : ഐ.വൈ.സി.സി മുഹറഖ് ഏരിയ കമ്മിറ്റിയുടെയും കിംസ് മെഡിക്കൽ സെന്ററിൻ്റെയും സംയുക്താഭിമുഖ്യത്തിൽ സൗജന്യ മെഡിക്കൽ ക്യാമ്പ് സംഘടിപ്പിച്ചു. ഐ.വൈ.സി.സിയുടെ ആരോഗ്യ ബോധവൽക്കരണ ക്യാമ്പയിനിന്റെ ഭാഗമായി നടന്ന ഈ ക്യാമ്പ്, ക്വിറ്റ് ഇന്ത്യാ ദിനാചരണത്തോടനുബന്ധിച്ചുള്ള 49-ാമത് സൗജന്യ മെഡിക്കൽ ക്യാമ്പായിരുന്നു.
രാവിലെ 8 മണി മുതൽ ഉച്ചയ്ക്ക് 12 മണി വരെ മുഹറഖിലെ കിംസ് ഹോസ്പിറ്റലിൽ നടന്ന ക്യാമ്പിൽ നിരവധി പ്രവാസികൾ പങ്കെടുത്തു. രക്തത്തിലെ ക്രിയാറ്റിനിൻ, കൊളസ്‌ട്രോൾ, യൂറിക് ആസിഡ്, ട്രൈഗ്ലിസറൈഡ്സ് തുടങ്ങിയവയുടെ പരിശോധനകൾ സൗജന്യമായി നടത്താൻ കഴിഞ്ഞത് ആളുകൾക്ക് ഏറെ സഹായകമായി. ഈ പരിശോധനകൾക്ക് പുറമെ, വിദഗ്ദ്ധരായ ഡോക്ടർമാരുടെ സൗജന്യ കൺസൾട്ടേഷനും ക്യാമ്പിൽ ലഭ്യമായിരുന്നു.
പ്രവാസികൾക്ക് ഏറെ പ്രയോജനകരമാവുന്ന രീതിയിൽ സംഘടിപ്പിച്ച ഈ ക്യാമ്പ് വിജയകരമായിരുന്നുവെന്ന് സംഘാടകർ അഭിപ്രായപ്പെട്ടു. ഏരിയ പ്രസിഡന്റ്‌ മണികണ്ഠൻ ചന്ദ്രോത്തിന്റെ അധ്യക്ഷതയിൽ ബഹ്‌റൈനിലെ സാമൂഹിക പ്രവർത്തകൻ സെയ്‌ദ് ഹനീഫ് ഉത്ഘാടനം ചെയ്തു. ഏരിയ ജോയിന്റ് സെക്രട്ടറി ഇർഷാദ് സ്വാഗതവും, അൻഷാദ് റഹിം നന്ദിയും പറഞ്ഞു.
ഐ.വൈ.സി.സി ദേശീയ പ്രസിഡന്റ്‌ ഷിബിൻ തോമസ്‌, ജനറൽ സെക്രട്ടറി രഞ്ജിത്ത് മാഹി, ട്രഷറര്‍ ബെൻസി ഗനിയുഡ്, ദേശീയ വൈസ് പ്രസിഡന്റ്‌ അനസ് റഹിം, കിംസ് മാർക്കറ്റിംഗ് മേധാവി പ്യാരിലാൽ, ഐ.വൈ.സി.സി മെമ്പർഷിപ്പ് കൺവീനർ സ്റ്റെഫി സാബു, മുൻ ദേശീയ പ്രസിഡന്റ്‌ ബേസിൽ നെല്ലിമറ്റം, വനിത വേദി കോർഡിനേറ്റർ മുബീന മൻഷീർ, ജോയിന്റ് കോർഡിനേറ്റർ മാരിയത്ത് അമീർഖാൻ, കോഴിക്കോട് പ്രവാസി ഫോറം സെക്രട്ടറി ജോജിഷ്, സാമൂഹിക പ്രവർത്തകരായ അൻവർ നിലമ്പൂർ, സംസാരിച്ചു. റജീന ഇസ്മായിൽ, കോർ ഭാരവാഹികൾ എക്സിക്യൂട്ടീവ് അംഗങ്ങൾ, കിംസ് ഹോസ്പിറ്റൽ മെഡിക്കൽ, അഡ്മിൻ പ്രതിനിധികൾ, വിവിധ ഏരിയ ഭാരവാഹികൾ സംബന്ധിച്ചു. കോഡിനേറ്റർമാരായ മണികണ്ഠൻ ചന്ദ്രോത്ത്, അൻഷാദ് റഹീം, മുഹറഖ് ഏരിയ ഭാരവാഹികൾ നേതൃത്വം നൽകി. ഇത്തരം പ്രവർത്തനങ്ങളിലൂടെ സമൂഹത്തിൽ ആരോഗ്യപരമായ അവബോധം വളർത്താൻ സംഘടനക്ക് സാധിക്കുന്നതിൽ സന്തോഷമുണ്ടെന്നും കോഡിനേറ്റർമാർ കൂട്ടിച്ചേർത്തു.
