കൂടുതല് കരുത്തോടെ രണ്ടാം സീസണായുള്ള തയ്യാറെടുപ്പിലാണ് തൃശൂര് ടൈറ്റന്സ്. കേരള താരവും രഞ്ജി ട്രോഫി മുന് ടീം ക്യാപ്റ്റനുമായിരുന്ന സിജോമോന് ജോസഫിന് കീഴിലാണ് തൃശൂര് ടൈറ്റന്സ് ഈ സീസണില് ഇറങ്ങുക. മുന് ഇന്ത്യന് അണ്ടര് 19 താരം കൂടിയാണ് സിജോ. ഓഫ് സ്പിന്നറും മധ്യനിര ബാറ്ററുമായ അക്ഷയ് മനോഹറാണ് വൈസ് ക്യാപ്റ്റന്.
കഴിഞ്ഞ സീസണെ അപേക്ഷിച്ച് കൂടുതല് വൈവിധ്യമുള്ളൊരു ബാറ്റിങ് നിരയാണ് ഇത്തവണ തൃശൂരിന്റേത്. കഴിഞ്ഞ തവണത്തെ ടോപ് സ്കോററായ വിഷ്ണു വിനോദിന്റെ അഭാവം, ഇതിലൂടെ മറികടക്കാന് കഴിയുമെന്നാണ് ടീമിന്റെ പ്രതീക്ഷ. വിഷ്ണു വിനോദിനൊപ്പം കഴിഞ്ഞ സീസണില് മികച്ച പ്രകടനം കാഴ്ചവച്ച അക്ഷയ് മനോഹറും വരുണ് നായനാരും അഹ്മദ് ഇമ്രാനും ഇത്തവണയും ടീമിനൊപ്പമുണ്ട്. കഴിഞ്ഞ സീസണില് കൊച്ചിക്കായി തിളങ്ങിയ ഷോണ് റോജര് ഇത്തവണ തൃശൂരിന് വേണ്ടിയാണ് ഇറങ്ങുക. ഒപ്പം അരുണ് പൗലോസ്, വിഷ്ണു മേനോന്, ആനന്ദ് കൃഷ്ണന് തുടങ്ങിയ വെടിക്കെട്ട് ബാറ്റര്മാര് കൂടി ചേരുമ്പോള് തൃശൂരിന്റെ ബാറ്റിങ് ശക്തമാണ്.
ക്യാപ്റ്റന് സിജോമോന് ജോസഫ്, സി.വി.വിനോദ് കുമാര് എന്നിവരടങ്ങുന്ന പരിചയ സമ്പന്നര്ക്കൊപ്പം സിബിന് ഗിരീഷ്, അമല് രമേഷ്, തുടങ്ങിയവര് ഓള്റൗണ്ടര്മാരായി തൃശൂര് ടീമിനൊപ്പമുണ്ട്.
എം.ഡി. നിധീഷും മൊഹമ്മദ് ഇഷാഖും, ആനന്ദ് ജോസഫും അടക്കമുള്ളവരാണ് ടീമിന്റെ ബൗളിങ് കരുത്ത്. കഴിഞ്ഞ സീസണില് 11 വിക്കറ്റുകളുമായി മൊഹമ്മദ് ഇഷാഖ് മികച്ച പ്രകടനമാണ് കാഴ്ച്ചവച്ചത്. കഴിഞ്ഞ തവണ ആലപ്പുഴയ്ക്കായി തിളങ്ങിയ ആനന്ദ് ജോസഫിനെ ടീമിലെത്തിക്കാനായത് തൃശൂരിന് മുതല്ക്കൂട്ടാകും. ആതിഫ് ബിന് അഷ്റഫ്, ആദിത്യ വിനോദ് തുടങ്ങിയവരാണ് ബൗളിങ് നിരയിലെ മറ്റ് പ്രമുഖ താരങ്ങള്.
മുന് രഞ്ജി താരം എസ് സുനില് കുമാറാണ് ടൈറ്റന്സിന്റെ കോച്ച്. കഴിഞ്ഞ സീസണില് കോച്ചായിരുന്നു സുനില് ഒയാസിസാണ് കോച്ചിങ് ഡയറക്ടര്. അസിസ്റ്റന്റ് കോച്ചായി കെവിന് ഓസ്കാറും, ബാറ്റിങ് കോച്ചായി വിനന് ജി നായരും ബൗളിങ് കോച്ചായി ഷാഹിദ് സി പിയും ഫീല്ഡിങ് കോച്ചായി മണികണ്ഠന് നായരും ടീമിനൊപ്പം ഉണ്ട്. മനു എസ് ആണ് പെര്ഫോമന്സ് അനലിസ്റ്റ്.
ടീം: ബാറ്റര് – ആനന്ദ്കൃഷ്ണന്, അഹ്മദ് ഇമ്രാന്, ഷോണ് റോജര്, അക്ഷയ് മനോഹര്, രോഹിത് കെ ആര്, വിഷ്ണു മേനോന്, അരുണ് പൗലോസ്, അജു പൗലോസ്. ഓള് റൗണ്ടര് – വിനോദ് കുമാര് സി വി, സിജോമോന് ജോസഫ് ( ക്യാപ്റ്റന്), സിബിന് ഗിരീഷ്. ഫാസ്റ്റ് ബൗളര്മാര് – നിധീഷ് എം ഡി, ആനന്ദ് ജോസഫ്, ആതിഫ് ബിന് അഷ്റഫ്, ആദിത്യ വിനോദ്. സ്പിന്നര്മാര് – മുഹമ്മദ് ഇഷാഖ്, അജ്നാസ് കെ, അമല് രമേഷ്.
