മയ്യിൽ: തെരുവുനായ ആക്രമണത്തിനെതിരെ ബോധവൽക്കരണ നാടകം കളിക്കുന്നതിനിടെ സ്റ്റേജിൽ കയറി നടന്റെ കാലിനു കടിച്ച് തെരുവുനായ. കണ്ടക്കൈപ്പറമ്പിലെ നാടക പ്രവർത്തകനായ പി.രാധാകൃഷ്ണനാണ് (57) സ്റ്റേജിൽ കളിക്കുന്നതിനിടെ നായയുടെ കടിയേറ്റത്. ഇന്നലെ രാത്രി എട്ടോടെ കണ്ടക്കൈ കൃഷ്ണപിള്ള സ്മാരക വായനശാലയിലാണു സംഭവം. തെരുവുനായശല്യത്തിന് എതിരെയുള്ള ബോധവൽക്കരണ പരിപാടിയിൽ തന്റെ ഏകപാത്ര നാടകമായ ‘പേക്കാലം’ അവതരിപ്പിക്കുകയായിരുന്നു രാധാകൃഷ്ണൻ. അതിൽ കുട്ടി തെരുവുനായ ആക്രമണത്തിന് ഇരയാകുന്ന രംഗം അഭിനയിക്കുന്നതിനിടെ നായ കുരയ്ക്കുന്ന ശബ്ദം പശ്ചാത്തലത്തിൽ ഉപയോഗിച്ചിരുന്നു. ഈ സമയത്താണ് നായയുടെ ആക്രമണമുണ്ടായത്. […]
