അഹമ്മദാബാദ്: ആഭ്യന്തര ക്രിക്കറ്റിലെ ഏകദിന ടൂര്ണമെന്റ് വിജയ് ഹസാരെ ട്രോഫിയില് കേരളം ഇന്ന് മധ്യപ്രദേശിനെ നേരിടും. രണ്ട് മത്സരങ്ങളില് ഒരു ജയവും ഒരു തോല്വിയും നേരിട്ട കേരളം ഗ്രൂപ്പ് എ പോയിന്റ് പട്ടികയില് മൂന്നാം സ്ഥാനത്താണ്. കളിച്ച രണ്ട് മത്സരങ്ങളിലും വിജയിച്ച മധ്യപ്രദേശും കര്ണാടകയുമാണ് കേരളത്തിന് മുന്നിലുള്ളത്.
റണ്നിരക്കിന്റെ അടിസ്ഥാനത്തില് പട്ടികയില് മുന്നിലുള്ള മധ്യപ്രദേശിനെയാണ് കേരളത്തിന് ഇന്ന് നേരിടേണ്ടത്. ആദ്യ കളിയില് ത്രിപുരയ്ക്കെതിരെ കൂറ്റന് ജയം നേടിയ കേരളം രണ്ടാം മത്സരത്തില് കര്ണാടകയോട് എട്ട് വിക്കറ്റിന്റെ പരാജയമാണ് ഏറ്റുവാങ്ങിയത്. ആദ്യം ബാറ്റ് ചെയ്ത് 284 എന്ന മികച്ച സ്കോര് കണ്ടെത്തിയിട്ടും പരാജയപ്പെടുകയായിരുന്നു. രോഹന് കുന്നുമ്മല് നയിക്കുന്ന കേരള ടീമില് കഴിഞ്ഞ മത്സരത്തില് നിന്നും മാറ്റമുണ്ടാകാന് സാധ്യതയില്ല. ഓള് റൗണ്ട് പ്രകടനവുമായി ബാബാ അപരാജിത് കേരളത്തിനായി കഴിഞ്ഞ രണ്ട് മത്സരങ്ങളിലും മികവുകാട്ടി. മറുവശത്ത് വെങ്കിടേഷ് അയ്യര് ആണ് മധ്യപ്രദേശിനെ നയിക്കുന്നത്. ആദ്യ കളിയില് രാജസ്ഥാനെ തോല്പ്പിച്ച മധ്യപ്രദേശ് രണ്ടാം മത്സരത്തില് തമിഴ്നാടിനെയാണ് കീഴടക്കിയത്.
