കൊച്ചി: കാഴ്ച്ചപരിമിതരുടെ ദേശീയ ക്രിക്കറ്റ് ടൂര്ണ്ണമെന്റായ നാഗേഷ് ട്രോഫി സൂപ്പര് എട്ടില് കേരളവും ഇടംപിടിച്ചു. എലിമിനേറ്റര് റൗണ്ടില് ഗോവയെ 15 റണ്സിന് പരാജയപ്പെടുത്തിയാണ് കേരളം സൂപ്പര് എട്ടില് കടന്നത്.
അങ്കമാലി ബൗണ്ടറി ക്രിക്കറ്റ് ഗ്രൗണ്ടില് നടന്ന മത്സരത്തില് ആദ്യം ബാറ്റ് ചെയ്യ്ത കേരളം 20 ഓവറില് 3 വിക്കറ്റ് നഷ്ടത്തില് 173 റണ്സെടുത്തു. കേരളത്തിന് വേണ്ടി 64 റണ്സെടുത്ത സ്നേഹിതാണ് ടോപ്പ് സ്കോറര്. 42 റണ്സെടുത്ത സായന്ത് കെ ബിയും 23 പന്തില് നിന്നും 29 റണ്സെടുത്ത അര്ജുന് പിയും മികവുകാട്ടി. മറുപടി ബാറ്റിങ്ങിനിറങ്ങിയ ഗോവക്ക് 20 ഓവറില് 158 റണ്സെടുക്കാനേ സാധിച്ചുള്ളൂ. ബൗളിങ്ങിലും മികച്ച പ്രകടനം കാഴ്ച്ച വെച്ച സായന്ത് കെ ബിയാണ് പ്ലെയര് ഓഫ് ദി മാച്ച്.കേരളത്തിന് വേണ്ടി സായന്ത് രണ്ട് വിക്കറ്റ് വീഴ്ത്തി.
ഗ്രൂപ്പ് മത്സരങ്ങളില് ക്വാളിഫൈ ചെയ്യാത്തതിനെ തുടര്ന്നാണ് കേരളത്തിന് എലിമിനേറ്റര് റൗണ്ടില് മത്സരിക്കേണ്ടി വന്നത്. ആറ് ഗ്രൂപ്പുകളിലായി നടന്ന ഗ്രൂപ്പ് മത്സരങ്ങളില് കേരളം എട്ടാം സ്ഥാനത്തായിരുന്നു. അടുത്ത മാസം 9 മുതല് 13 വരെ ദല്ഹിയിലാണ് സൂപ്പര് എട്ട് മത്സരങ്ങള്.
