ജീവിതകാലം മുഴുവൻ പല്ലുകൾ വളർന്നുകൊണ്ടിരിക്കുന്ന അതിശയിപ്പിക്കുന്ന സവിശേഷതയുള്ള ജീവികളാണ് സ്രാവുകൾ. എന്നാൽ, മനുഷ്യനിർമിതമായ മലിനീകരണവും കാലാവസ്ഥാ വ്യതിയാനവും കാരണം വൈകാതെ സ്രാവുകൾക്ക് പല്ലുകൾ നഷ്ടപ്പെട്ടേക്കാമെന്ന് ‘ദി നാഷണൽ ഓഷ്യാനിക് ആൻഡ് അറ്റ്മോസ്ഫെറിക് അഡ്മിനിസ്ട്രേഷൻ’ മുന്നറിയിപ്പ് നൽകുന്നു. സമുദ്രജലത്തിൽ വർധിച്ചുവരുന്ന അമ്ലത്വമാണ് സ്രാവുകളുടെ പല്ലുകൾക്ക് വില്ലനാകുന്നത്.
സമുദ്രം വായുവിൽ നിന്ന് അമിതമായി കാർബൺ ഡൈ ഓക്സൈഡ് ആഗിരണം ചെയ്യുന്നതാണ് ജലത്തിന്റെ അമ്ലത്വം വർധിക്കാൻ കാരണം. ഗവേഷകരുടെ കണക്കനുസരിച്ച്, 2300 ആകുമ്പോഴേക്കും സമുദ്രത്തിലെ അമ്ലത ഇപ്പോഴുള്ളതിനേക്കാൾ 10 മടങ്ങ് വർധിക്കും. ഇത് സ്രാവുകളുടെ പല്ലുകളെ സാവധാനം അലിയിച്ചു കളയുകയും നശിപ്പിക്കുകയും ചെയ്യും. നിലവിൽ തന്നെ വംശനാശഭീഷണി നേരിടുന്ന സ്രാവുകൾക്ക് പല്ലുകൾ കൂടി നഷ്ടപ്പെടുന്നത് അവയുടെ ഇരപിടിക്കാനുള്ള ശേഷിയെ ഇല്ലാതാക്കുകയും നിലനിൽപ്പിനെ തന്നെ ബാധിക്കുകയും ചെയ്യും. സ്രാവുകൾക്ക് പുറമെ കക്കകൾ, ഞണ്ടുകൾ തുടങ്ങിയ പുറന്തോടുള്ള ജീവികൾക്കും ഈ മാറ്റം വലിയ ഭീഷണിയാണ് ഉയർത്തുന്നത്.
Also Read: പുരുഷന്മാര് ഈ ലക്ഷണങ്ങൾ നിസ്സാരമായി കാണരുത്; പ്രോസ്റ്റേറ്റ് ക്യാൻസർ നിങ്ങളെ തേടിയെത്തിയേക്കാം!
സമുദ്രത്തിലെ ആവാസവ്യവസ്ഥയുടെ കാവൽക്കാരായ സ്രാവുകൾക്ക് പല്ല് നഷ്ടപ്പെടുന്നത് കേവലം ഒരു ജീവിയുടെ മാത്രം പ്രശ്നമല്ല, മറിച്ച് കടലിന്റെ മൊത്തത്തിലുള്ള സന്തുലിതാവസ്ഥ തകരുന്നതിന്റെ ലക്ഷണമാണ്. മനുഷ്യന്റെ ഇടപെടലുകൾ പരിധി വിടുമ്പോൾ പ്രകൃതിക്ക് സംഭവിക്കുന്ന ഈ മാറ്റങ്ങൾ വരാനിരിക്കുന്ന വലിയൊരു പാരിസ്ഥിതിക തകർച്ചയുടെ മുന്നറിയിപ്പാണ് നൽകുന്നത്. ഈ മാറ്റങ്ങളെ പ്രതിരോധിക്കേണ്ടത് കടലിലെ ജീവികളുടെ മാത്രമല്ല, മനുഷ്യന്റെയും നിലനിൽപ്പിന് അനിവാര്യമാണ്.
The post പല്ലില്ലാത്ത സ്രാവുകൾ; സമുദ്രത്തിലെ വേട്ടക്കാർക്ക് ഭീഷണിയായി വർധിക്കുന്ന അമ്ലത്വം! ഞെട്ടിക്കുന്ന പഠനവിവരങ്ങൾ appeared first on Express Kerala.
