സാവോപോളോ: പേടിച്ചതുപോലെ തന്നെ സംഭവിച്ചു. ബ്രസീലിന്റെ എക്കാലത്തെയും മികച്ച താരങ്ങളിലൊരാളായ നെയ്മര് ഇത്തവണത്തെ ലോകകപ്പിനുണ്ടാവില്ലെന്ന് ഉറപ്പായി. തിരിച്ചുവരവിനുള്ള ശ്രമത്തിലായിരുന്ന നെയ്മര് ഏറെക്കാലത്തിനു ശേഷം പരിക്കുമാറി കളത്തിലെത്തിയിരുന്നു എന്നാല്, ഒരിക്കല്ക്കൂടി പരിക്ക് വില്ലനായെത്തിയതോടെ നെയ്മറിന്റെ ലോകകപ്പ് കരിയറിന് പൂര്ണവിരാമമാവുകയാണ്.
ഈ മാസമൊടുവില് അമേരിക്കയില് നടക്കുന്ന സൗഹൃദമത്സരങ്ങള്ക്കുള്ള ബ്രസീലിയന് ടീമിനെ കോച്ച് കാര്ലോ ആഞ്ചലോട്ടി പ്രഖ്യാപിച്ചു. സൂപ്പര് താരം നെയ്മറെ ഒഴിവാക്കിയുള്ള ടീമിനെയാണ് ആഞ്ചലോട്ടി പ്രഖ്യാപിച്ചത്. ഇതോടെ ലോകകപ്പിനുള്ള ബ്രസീലിയന് സ്ക്വാഡില് നെയ്മറെ ഉള്പ്പെടുത്താനാവില്ലെന്നുറപ്പായി. മാര്ച്ച് 26ന് ഫ്രാന്സിനെയിരെയും 30ന് ക്രൊയേഷ്യക്കെതിരേയുമാണ് ബ്രസീല് സൗഹൃദപോരാട്ടത്തിനൊരുങ്ങുന്നത്. പരിക്കില്നിന്ന് മോചിതനായി ടീമിലെത്തുമെന്ന് പ്രതീക്ഷിക്കപ്പെട്ടിരുന്ന നെയ്മര് കഴിഞ്ഞ ദിവസം സാന്തോസിനായി കളിക്കാനിറങ്ങിയെങ്കിലും ഫോമിന്റെ ഏഴയലത്തുപോലുമെത്താനായില്ല. മത്സരം 1-1 സമനിലയില് കലാശിച്ചു. താളം കണ്ടെത്താന് വിഷമിക്കുന്ന നെയ്മറെയാണ് കളത്തില് കണ്ടത്. മേയ് 18നാണ് ലോകകപ്പിനുള്ള ബ്രസീലിയന് ടീമിനെ പ്രഖ്യാപിക്കുന്നത്. 100 ശതമാനം ശാരീരികക്ഷമത കൈവരിച്ചാല് നെയ്മറെ ലോകകപ്പ് സ്ക്വാഡില് ഉള്പ്പെടുത്തുമെന്ന് ആഞ്ചലോട്ടി പറഞ്ഞു. എന്നാല്, അതിനുള്ള സാധ്യത വളരെ വിദൂരമാണെന്നതാണ് സത്യം.
സൗഹൃദമത്സരത്തിനുള്ള ടീമില് തന്നെ ഉള്പ്പെടുത്താത്തതില് വളരെ വിഷമത്തോടെയും ദേഷ്യത്തോടെയുമാണ് നെയ്മര് പ്രതികരിച്ചത്.
എന്നെ നിങ്ങള്ക്ക് തള്ളിക്കളയാനാവില്ല. തീര്ച്ചയായും, എന്നെ വിളിക്കാത്തതില് എനിക്ക് ദേഷ്യവും സങ്കടവുമുണ്ട്.
എന്നാല് എല്ലാ ദിവസവും എന്നല്ല, ഓരോ നിമിഷവും ഓരോ പരിശീലന സെഷനിലും ഓരോ മത്സരത്തിലും ഞാന് അതീവ ശ്രദ്ധാലുവാണ്. എന്റെ ഫിറ്റ്നസിനായി കഠിനാധ്വാനം ചെയ്യുന്നുണ്ട്. നമ്മള് നമ്മുടെ ലക്ഷ്യം കൈവരിക്കും. ഒരു അന്തിമ കോള്-അപ്പ് ഇനിയും വരാനിരിക്കുന്നു, ലോകകപ്പ് കളിക്കും എന്നുള്ള സ്വപ്നം നിലനില്ക്കുന്നു.- നെയ്മര് പറഞ്ഞു.
2023 ഒക്ടോബറിലാണ് നെയ്മര് അവസാനമായി ബ്രസീലിനായി കളിച്ചത്. പിന്നീട് ഇടതുകാല്മുട്ടിലും കാല്ക്കുഴയ്ക്കും പരിക്കേറ്റ് ചികിത്സ തേടുകയായിരുന്നു. ശസ്ത്രക്രിയയ്ക്ക് വിധേയനായ നെയ്മര് പലവട്ടം തിരിച്ചുവരവിനായുള്ള പ്രതീക്ഷ നല്കിയെങ്കിലും അതുണ്ടായില്ല. എന്നാല്, പരിക്ക് ഭാദമായി രണ്ടാഴ്ചമുമ്പ് ആരാധകര്ക്ക് സന്തോഷം നല്കിക്കൊണ്ട് തന്റെ ക്ലബ് സാന്തോസിനായി കളിക്കാനിറങ്ങിയ നെയ്മര്ക്ക് വീണ്ടും മസിലിനു പരിക്കേറ്റു. എന്നാല്, അതില്നിന്നും മുക്തനായി കഴിഞ്ഞ ദിവസം കളത്തിലിറങ്ങിയപ്പോഴാകട്ടെ ഫോം ഏറെ മങ്ങിയും പോയി. ഈ സാഹചര്യത്തിലാണ് നെയ്മറുടെ തിരിച്ചുവരവ് അനിശ്ചിതത്വത്തിലായത്. ബ്രസീലിനായി ഏറ്റവും കൂടുതല് ഗോള് നേടിയ താരം കൂടിയാണ് നെയ്മര്. പരിക്കിനെത്തുടര്ന്ന് റോഡ്രിഗോ, എഡര് മിലിറ്റാവോ, ബ്രൂണോ ഗുമെയ്റാസ്, എസ്റ്റാവോ എന്നിവരും ടീമില് ഉള്പ്പെട്ടിട്ടില്ല.
സൗഹൃദമത്സരങ്ങള്ക്കുള്ള ബ്രസീല് ടീം
ഗോള്കീപ്പര്മാര്: ആലിസണ് ബെക്കര്, ബെന്റോ, എഡേഴ്സണ്
ഡിഫന്ഡര്മാര്: അലക്സ് സാന്ഡ്രോ (ഫ്ലമെംഗോ), ഡാനിലോ (ഫ്ലമെംഗോ), ലിയോ പെരേര (ഫ്ലമെംഗോ), ബ്രെമര് (യുവന്റസ്), ഡഗ്ലസ് സാന്റോസ് (സെനിത് സെന്റ് പീറ്റേഴ്സ്ബര്ഗ്), ഗബ്രിയേല് മഗല്ഹെസ് (ആഴ്സനല്), ഇബാനെസ് (അല്-അഹ്ലി), മാര്ക്വിനോസ് (പിഎസ്ജി), വെസ്്ലി (റോമ).
മിഡ്ഫീല്ഡര്മാര്: ആന്ദ്രേ സാന്റോസ് (ചെല്സി), കാസെമിറോ (മാഞ്ചസ്റ്റര് യുണൈറ്റഡ്), ഡാനിലോ (ബൊട്ടാഫോഗോ), ഫാബിഞ്ഞോ (അല്-ഇത്തിഹാദ്), ഗബ്രിയേല് സാറ (ഗലാറ്റസരെ)
ഫോര്വേഡുകള്: എന്ഡ്രിക്ക് (ലിയോണ്), ജോവോ പെഡ്രോ (ചെല്സി), ഗബ്രിയേല് മാര്ട്ടിനെല്ലി (ആഴ്സണല്), ഇഗോര് തിയാഗോ (ബ്രന്റ്ഫോര്ഡ്), ലൂയിസ് ഹെന്റിക് (സെനിറ്റ് സെന്റ് പീറ്റേഴ്സ്ബര്ഗ്), മാത്യൂസ് കുഞ്ഞ (മാഞ്ചസ്റ്റര് യുണൈറ്റഡ്), റാഫിഞ്ഞ (ബാഴ്സലോണ), റയാന് (ബൗണിമൗത്ത്), വിനിഷ്യസ് ജൂനിയര് (റയല് മാഡ്രിഡ്)
