റിയാദ്: സൗദി തലസ്ഥാനമായ റിയാദിന് നേരെ നടന്ന ബാലിസ്റ്റിക് മിസൈൽ ആക്രമണത്തിനിടെ പരിക്കേറ്റ് ചികിത്സയിലായിരുന്ന ഇന്ത്യൻ തൊഴിലാളി അന്തരിച്ചു. ഉത്തർപ്രദേശ് സ്വദേശിയായ രവി ഗോപാൽ ആണ് ശനിയാഴ്ച മരണപ്പെട്ടത്. മാർച്ച് 18-ന് റിയാദിലെ ഇൻഡസ്ട്രിയൽ സിറ്റി ലക്ഷ്യമാക്കി എത്തിയ മിസൈലുകൾ സൗദി വ്യോമ പ്രതിരോധ സേന ആകാശത്തുവെച്ച് തകർക്കുന്നതിനിടെ, അവയുടെ അവശിഷ്ടങ്ങൾ പതിച്ചാണ് ഇദ്ദേഹത്തിന് ഗുരുതരമായി പരിക്കേറ്റത്.
റിയാദ് ന്യൂ സനാഇയയിലെ പ്ലാസ്റ്റിക് ഫാക്ടറിയിൽ ജീവനക്കാരനായിരുന്ന രവി ഗോപാൽ, സംഭവദിവസം താമസസ്ഥലത്തെ കെട്ടിടത്തിന് മുകളിൽ നിൽക്കുമ്പോഴാണ് അപകടത്തിൽപ്പെട്ടത്. നാല് ബാലിസ്റ്റിക് മിസൈലുകളാണ് അന്ന് റിയാദിനെ ലക്ഷ്യമിട്ട് കുതിച്ചെത്തിയത്. ഇവയെല്ലാം വിജയകരമായി പ്രതിരോധിച്ചെങ്കിലും താഴേക്ക് പതിച്ച അവശിഷ്ടങ്ങൾ രവി ഗോപാൽ ഉൾപ്പെടെ നാല് വിദേശ തൊഴിലാളികൾക്ക് പരിക്കേൽപ്പിച്ചു. ഉടൻ തന്നെ ആശുപത്രിയിൽ പ്രവേശിപ്പിച്ച രവി ഗോപാൽ തീവ്രപരിചരണ വിഭാഗത്തിൽ ചികിത്സയിലിരിക്കെയാണ് അന്തരിച്ചത്.
Also Read: ഒമാനിൽ കനത്ത മഴയ്ക്കും മിന്നൽ പ്രളയത്തിനും സാധ്യത; ജാഗ്രതാ നിർദ്ദേശവുമായി അധികൃതർ
രവി ഗോപാലിന്റെ വിയോഗത്തിൽ സൗദിയിലെ ഇന്ത്യൻ എംബസി ആഴത്തിലുള്ള അനുശോചനം രേഖപ്പെടുത്തി. മൃതദേഹം നാട്ടിലെത്തിക്കുന്നതുൾപ്പെടെയുള്ള ഔദ്യോഗിക നടപടികൾ വേഗത്തിലാക്കാൻ പ്രാദേശിക അധികൃതരുമായി ചേർന്ന് പ്രവർത്തിക്കുകയാണെന്ന് എംബസി വാർത്താക്കുറിപ്പിൽ അറിയിച്ചു. സംഭവത്തിൽ സൗദി പ്രതിരോധ മന്ത്രാലയവും ഖേദം പ്രകടിപ്പിച്ചു. പരിക്കേറ്റ മറ്റ് തൊഴിലാളികൾക്ക് മികച്ച ചികിത്സ ഉറപ്പാക്കിയിട്ടുണ്ടെന്നും അധികൃതർ വ്യക്തമാക്കി.
The post റിയാദിൽ മിസൈൽ അവശിഷ്ടം വീണ് പരിക്കേറ്റ യുപി സ്വദേശി മരിച്ചു appeared first on Express Kerala.
