മാതൃദിനത്തിൽ ലോകമെമ്പാടുമുള്ള അമ്മമാർക്ക് ഐക്യദാർഢ്യം പ്രഖ്യാപിച്ച് വിപ്ലവകരമായ തീരുമാനവുമായി ദുബായ് കിരീടാവകാശിയും യുഎഇ ഉപപ്രധാനമന്ത്രിയുമായ ഷൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. ഔദ്യോഗിക രേഖകളിൽ ‘വീട്ടമ്മ’ എന്ന വിശേഷണത്തിന് പകരം ‘തലമുറകളെ വാർത്തെടുക്കുന്നവർ’ എന്ന് മാറ്റാനാണ് അദ്ദേഹം ഉത്തരവിട്ടത്.
കുടുംബത്തെയും സമൂഹത്തെയും കെട്ടിപ്പടുക്കുന്നതിൽ അമ്മമാർ നൽകുന്ന നിസ്തുലമായ സംഭാവനകളെ മുൻനിർത്തിയാണ് ഈ ചരിത്രപരമായ മാറ്റം. ഇത് സംബന്ധിച്ച നിർദ്ദേശങ്ങൾ അദ്ദേഹം കമ്മ്യൂണിറ്റി ഡെവലപ്മെന്റ് അതോറിറ്റിക്ക് നൽകി കഴിഞ്ഞു. കുട്ടികളുടെ ആദ്യ വിദ്യാലയം അമ്മമാരാണെന്നും അവരിൽ നിന്നാണ് ഉത്തരവാദിത്തബോധവും സ്നേഹവും മൂല്യങ്ങളും അടുത്ത തലമുറ പഠിക്കുന്നതെന്നും ശൈഖ് ഹംദാൻ വ്യക്തമാക്കി.
Also Read:പെരുന്നാൾ തിരക്ക്; അതിർത്തികളിൽ സുരക്ഷ കൂട്ടി കുവൈത്ത്
എല്ലാ നന്മകളുടെയും അടിസ്ഥാനം അമ്മമാരാണെന്ന് ചൂണ്ടിക്കാട്ടിയ അദ്ദേഹം, ലോകത്തിലെ എല്ലാ അമ്മമാർക്കും മാതൃദിനാശംസകൾ നേരുകയും സ്നേഹനിർഭരമായ ഒരു വീഡിയോ സോഷ്യൽ മീഡിയയിൽ പങ്കുവെക്കുകയും ചെയ്തു. അമ്മമാരുടെ അധ്വാനത്തിന് അർഹിക്കുന്ന അംഗീകാരം നൽകുന്ന ഈ തീരുമാനം അന്താരാഷ്ട്ര തലത്തിൽ തന്നെ വലിയ ശ്രദ്ധ നേടിയിരിക്കുകയാണ്.
The post അമ്മമാർക്ക് ആദരം; ദുബായിലെ ഔദ്യോഗിക രേഖകളിൽ വലിയ മാറ്റം, പുതിയ വിശേഷണം ഇങ്ങനെ! appeared first on Express Kerala.
