ന്യൂദല്ഹി: ദല്ഹിയില് നടക്കുന്ന എസിജി ജൂനിയര് എന്ബിഎ 3-3 ബാസ്കറ്റ്ബോള് നാഷണല് ഫൈനല്സിന്റെ കലാശപ്പോരാട്ടത്തിന് കേരള ചാമ്പ്യന്മാരായ കോഴിക്കോട് പ്രൊവിഡന്സ് എച്ച്.എസ്.എസ് യോഗ്യത നേടി. കെ.ഡി. ജാദവ് ഇന്ഡോര് സ്റ്റേഡിയത്തില് നടന്ന ആവേശകരമായ സെമിഫൈനലില് പ്രയാഗ്രാജിലെ മാ ശാരദ പബ്ലിക് സ്കൂളിനെ 20-13 എന്ന സ്കോറിന് പരാജയപ്പെടുത്തിയാണ് പ്രൊവിഡന്സ് ഫൈനലിലെത്തിയത്.
മത്സരത്തില് തകര്പ്പന് പ്രകടനം കാഴ്ചവെച്ച പ്രൊവിഡന്സ് നേടിയ 20 പോയിന്റുകളില് ആറെണ്ണവും ത്രീ പോയിന്റ് ലൈനിന് പുറത്തുനിന്നുള്ള ഷോട്ടുകളിലൂടെയായിരുന്നു. ഒമ്പത് പോയിന്റുകള് നേടിയ തീര്ത്ഥ പ്രവീണ് ആണ് ടീമിന്റെ ടോപ്പ് സ്കോറര്. അക്ഷര ആറ് പോയിന്റുകള് നേടി വിജയത്തില് നിര്ണായക പങ്കുവഹിച്ചു.
ഫൈനലില് ലുധിയാനയിലെ സെന്റ് സേക്രഡ് ഹാര്ട്ട് സീനിയര് സെക്കന്ഡറി സ്കൂളുമായാണ് പ്രൊവിഡന്സ് ഏറ്റുമുട്ടുന്നത്. സെമിയില് ദല്ഹി പബ്ലിക് സ്കൂള് ബാംഗ്ലൂര് സൗത്തിനെ (15-13) പരാജയപ്പെടുത്തിയാണ് ലുധിയാന ഫൈനലിലെത്തിയത്.
ആണ് വിഭാഗം
ആണ്കുട്ടികളുടെ ഫൈനലില് പ്രയാഗ്രാജിലെ മഹാറാണ പ്രതാപ് ഇന്റര് കോളേജ്, ഡല്ഹിയിലെ നെഹ്റു വേള്ഡ് സ്കൂളിനെ നേരിടും. സെമിയില് ഇന്ഡോറിലെ ഐ.ടി.എം ഗ്ലോബല് സ്കൂളിനെ 21-17 എന്ന സ്കോറിന് മഹാറാണ പ്രതാപ് പരാജയപ്പെടുത്തിയപ്പോള്, ഹൈദരാബാദിലെ ഓക്റിഡ്ജ് ഇന്റര്നാഷണല് ഗച്ചിബൗളിയെ 17-8 ന് തോല്പ്പിച്ചാണ് നെഹ്റു വേള്ഡ് സ്കൂള് ഫൈനലിലെത്തിയത്.
