പ്രവാസത്തിന്റെ വർത്തമാനവും ഭാവിയും പറഞ്ഞ് പ്രവാസി വെൽഫെയർ സംഗമം.

മനാമ: അഞ്ചര പതിറ്റാണ്ടുകൾക്ക് ശേഷവും ഗൾഫ് പ്രവാസി കേരളത്തിൻ്റെ സാമൂഹിക സാമ്പത്തിക വികസന മേഖലകളിൽ സുപ്രധാന പങ്ക് വഹിക്കുന്നു എന്ന് പ്രവാസി വെൽഫെയർ പ്രസിഡൻ്റ് ബദറുദ്ദീൻ പൂവാർ പറഞ്ഞു. പ്രവാസി വെൽഫെയർ മനാമ സോൺ സംഘടിപ്പിച്ച പ്രവാസം വർത്തമാനവും ഭാവിയും ചർച്ചാ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കേരളത്തിന്റെ സാമൂഹികഘടനയെത്തന്നെ പുരോഗമനപരമായി മാറ്റിമറിക്കാൻ ഗൾഫ് പ്രവാസത്തിലൂടെ മലയാളിക്ക് സാധിച്ചു. കേരളത്തിലെ ഒട്ടുമിക്ക കുടുംബങ്ങളിലെയും പട്ടിണിയും ദാരിദ്ര്യവും തൊഴിലില്ലായ്മയും കുറയ്ക്കുന്നതിൽ പ്രത്യക്ഷമായും പരോക്ഷമായും ഗൾഫ് പ്രവാസത്തിലൂടെ കേരളത്തിന് കഴിഞ്ഞെങ്കിലും ഇതിനു വേണ്ടി ജീവിതം ത്യജിച്ച പ്രവാസി സമൂഹത്തോട് മാറിമാറി വന്ന ജനപ്രതിനിധിസഭകൾ വേണ്ടത്ര നീതിപുലർത്തിയിട്ടില്ല എന്നത് വർത്തമാനകാല അനുഭവ യാഥാർത്ഥ്യമാണ്. അത് കൊണ്ട് പ്രവാസി സമൂഹം പ്രവാസത്തിന് ശേഷമുള്ള അതിജീവന പാഠങ്ങൾ പഠിക്കുകയും മനസ്സിലാക്കുകയും തങ്ങളുടെ ജീവിതത്തിൽ പുലർത്താൻ കണിശത പുലർത്തുകയും ചെയ്യണമെന്ന് അദ്ദേഹം പറഞ്ഞു.