മരുഭൂമിയിലെ ശൈത്യകാലം മടിയുടേതല്ല, മറിച്ച് അനേകായിരം അനുഭൂതികളുടേതാണ്. യാത്രകളുടെ വസന്തകാലമെന്ന് ഋതുക്കളിലെ ഈ ശിശിരകാലത്തെ വിശേഷിപ്പിക്കാം. മരുഭൂമിയിൽ പ്രണയം പൂക്കുന്ന കാലമാണ് ശൈത്യം. ചൂട് കൊണ്ട് ചുവന്ന ചെടികളിലെല്ലാം തണുപ്പ് വന്ന് പൂക്കൾ ചൊരിയുന്ന കാലം. കാറ്റ് നട്ട വിത്തുകളിലെല്ലാം ഫലങ്ങൾ പൂക്കുന്ന കാലം. തനിച്ച് കിടന്നിരുന്ന മരുഭൂമി യാത്രക്കാരുടെ തറവാടായി മാറുന്ന കാലം.
യാത്രക്കാർ രാവും പകലും ഇറങ്ങുന്ന മരുഭൂമിയിൽ കൃത്യമായി പാലിക്കേണ്ട സൂക്ഷിക്കേണ്ട ചിലതുണ്ട്. അതിനെ കുറിച്ചാണ് അബൂദബി മുനിസിപ്പാലിറ്റി പറയുന്നത്. അബൂദബി അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റി, ഡിജിറ്റൽ പ്ലാറ്റ്ഫോമുകളിലൂടെയും സോഷ്യൽ മീഡിയയിലൂടെയും നടപ്പിലാക്കുന്ന നിരന്തരമായ ബോധവൽക്കരണ കാമ്പയിനുകളിലൂടെ, മരുഭൂമി യാത്രകളിലും ക്യാമ്പിങിലും സമൂഹ അംഗങ്ങൾ ഭക്ഷണ-ആരോഗ്യ സുരക്ഷാ മാർഗനിർദേശങ്ങൾ പാലിക്കേണ്ടതിന്റെ പ്രാധാന്യം ഊന്നിപ്പറയുന്നുണ്ട്. ഇത് ആരോഗ്യപരമായ അപകടങ്ങൾ തടയുന്നതിനും മരുഭൂമികളിൽ സുരക്ഷിതവും ഉത്തരവാദിത്തമുള്ളതുമായ അനുഭവം പ്രോത്സാഹിപ്പിക്കുന്നതിനും സഹായിക്കുന്നു. പ്രത്യേകിച്ച് ശൈത്യകാല ഉല്ലാസ യാത്രകൾ വർധിക്കുന്ന സീസണുകളിൽ.
മൂൻകൂട്ടി ആസൂത്രണം ചെയ്യുക
സുരക്ഷിതമായ യാത്രകളുടെ അടിസ്ഥാന സ്തംഭങ്ങളിലൊന്നാണ് മുൻകൂർ ആസൂത്രണം എന്ന് അതോറിറ്റി അതിന്റെ ബോധവൽക്കരണ സന്ദേശങ്ങളിൽ ഊന്നിപ്പറഞ്ഞു. യാത്രയുടെ കാലയളവിലുടനീളം ഭക്ഷണം സുരക്ഷിതമായി തയ്യാറാക്കുന്നതിനും സംഭരിക്കുന്നതിനും കൊണ്ടുപോകുന്നതിനും വേണ്ടി, യാത്ര പുറപ്പെടുന്നതിന് മുമ്പ് അടിസ്ഥാന ആവശ്യങ്ങളുടെ ഒരു പട്ടിക തയ്യാറാക്കണം. മാംസം കഴിക്കുന്നതിന് മുമ്പ് നന്നായി പാകം ചെയ്തിട്ടുണ്ടെന്ന് ഉറപ്പുവരുത്തുന്നതിനൊപ്പം, പാകം ചെയ്തതിനുശേഷം ഭക്ഷണം വീണ്ടും ഫ്രീസുചെയ്യാതിരിക്കുകയും, കേടാകാൻ സാധ്യതയുള്ള ഭക്ഷണം അനുയോജ്യമായ റഫ്രിജറേറ്ററുകളിൽ സുരക്ഷിതമായ താപനിലയിൽ സൂക്ഷിക്കുകയും വേണം.
ഐസ് പാക്കുകളോ മറ്റു തണുപ്പിക്കൽ രീതികളോ ഉപയോഗിക്കാം. മലിനീകരണം ഒഴിവാക്കാൻ അസംസ്കൃതവും വേവിച്ചതുമായ ഭക്ഷണങ്ങൾ പൂർണമായും വേർതിരിക്കുന്നതിന്റെ പ്രാധാന്യവും അതോറിറ്റി വിശദീകരിക്കുന്നുണ്ട്. ചൂടുള്ളതോ അനിശ്ചിതമോ ആയ കാലാവസ്ഥയിൽ, ഭക്ഷണം ദീർഘനേരം മൂടിവെക്കുകയോ വായുവിലും സൂര്യപ്രകാശത്തിലും തുറന്നുവെക്കുകയോ ചെയ്യുന്നത് ഒഴിവാക്കണമെന്നും യാത്രകളിൽ ഉപയോഗിക്കുന്ന ഭക്ഷണത്തിന്റെയും ജലത്തിന്റെയും സ്രോതസുകളുടെ സുരക്ഷ ഉറപ്പാക്കണമെന്നും അതോറിറ്റി ആവശ്യപ്പെട്ടു. മോശം സംഭരണമോ സുരക്ഷിതമല്ലാത്ത തയ്യാറെടുപ്പോ ഭക്ഷ്യജന്യ രോഗങ്ങൾക്ക് കാരണമായേക്കാം.
ഭക്ഷണക്കാര്യത്തിൽ ശ്രദ്ധവേണം
മരുഭൂമിയിൽ ഭക്ഷണം തയ്യാറാക്കുമ്പോഴും കഴിക്കുമ്പോഴും ആരോഗ്യകരമായ രീതികൾ പാലിക്കണമെന്ന് അതോറിറ്റി ഊന്നിപ്പറയുന്നു. ഭക്ഷണം തയ്യാറാക്കുന്നതിന് മുമ്പും ശേഷവും സോപ്പും വെള്ളവും ഉപയോഗിച്ച് കൈ കഴുകുക, വെള്ളം ലഭ്യമല്ലാത്തപ്പോൾ സാനിറ്റൈസറുകൾ ഉപയോഗിക്കുക, മാംസവും പച്ചക്കറികളും തയ്യാറാക്കുന്നതിന് പ്രത്യേക ഉപകരണങ്ങൾ അനുവദിക്കുക, ഇടക്കിടെ പാചക പാത്രങ്ങളും മറ്റും വൃത്തിയാക്കുക എന്നിവ ഇതിൽ ഉൾപ്പെടുന്നു. പൊതുജന സുരക്ഷ വർധിപ്പിക്കുന്നതിന്റെ ഭാഗമായി, ആവശ്യത്തിന് കുടിവെള്ളം നൽകേണ്ടതിന്റെയും ആവശ്യമായ സാധനങ്ങൾ അടങ്ങിയ ഒരു പ്രഥമശുശ്രൂഷ കിറ്റ് സജ്ജീകരിക്കേണ്ടതിന്റെയും ആവശ്യകത അതോറിറ്റി പ്രത്യേകം പറയുന്നുണ്ട്.
അനുയോജ്യമായ പ്രകാശ സ്രോതസുകളും ചാർജ് ചെയ്ത ആശയവിനിമയ ഉപകരണങ്ങളും കൂടാതെ, സാധ്യമായ കാലാവസ്ഥാ വ്യതിയാനങ്ങൾ ശ്രദ്ധിക്കുകയും താഴ്വരകളിൽ നിന്നും താഴ്ന്ന പ്രദേശങ്ങളിൽ നിന്നും വന്യമൃഗങ്ങൾ ഒത്തുചേരുന്ന പ്രദേശങ്ങളിൽ നിന്നും സുരക്ഷിതമായ ക്യാമ്പിങ് സൈറ്റുകൾ തിരഞ്ഞെടുക്കുകയും വേണം. പ്രകൃതിദത്ത സ്ഥലങ്ങളുടെ ശുചിത്വം പാലിക്കുക, മാലിന്യങ്ങൾ ഉപേക്ഷിക്കാതിരിക്കുക, സസ്യജാലങ്ങൾക്കോ വന്യജീവികൾക്കോ ദോഷം വരുത്താതിരിക്കുക എന്നിവയിലൂടെ ഉത്തരവാദിത്തമുള്ള പാരിസ്ഥിതിക പെരുമാറ്റങ്ങൾ പാലിക്കണമെന്നും അതോറിറ്റി ആവശ്യപ്പെട്ടു. മരുഭൂമി പരിസ്ഥിതി സംരക്ഷിക്കുന്നത് എല്ലാവരിൽ നിന്നും അവബോധവും സുസ്ഥിരമായ പെരുമാറ്റവും ആവശ്യമുള്ള ഒരു പങ്കിട്ട ഉത്തരവാദിത്തമാണെന്ന് ബന്ധപ്പെട്ടവർ പറഞ്ഞു.
