“മന്ത്രി റിയാസിന് നടക്കാൻ വയ്യാത്ത ആളല്ലല്ലോ, നേരിട്ട് പോയി ആവശ്യങ്ങൾ ചോദിച്ചുകൂടെ?” ശോഭാ സുരേന്ദ്രൻ

കേരളത്തിലെ ടൂറിസം വികസനത്തിനായി സംസ്ഥാന മന്ത്രി ഒന്നും ആവശ്യപ്പെടുന്നില്ലെന്ന കേന്ദ്രമന്ത്രി സുരേഷ് ഗോപിയുടെ പരാമർശം ചൂണ്ടിക്കാട്ടി ബിജെപി സംസ്ഥാന ജനറൽ സെക്രട്ടറി ശോഭാ സുരേന്ദ്രൻ രംഗത്തെത്തി. ചെറുപ്പക്കാരനായ ടൂറിസം മന്ത്രിക്ക് നേരിട്ട് പോയി കേന്ദ്രമന്ത്രിയെ കണ്ട് ആവശ്യങ്ങൾ ഉന്നയിക്കാവുന്നതേയുള്ളൂവെന്നും അവർ കണ്ണൂരിൽ പറഞ്ഞു. കേരളത്തിന്റെ സമ്പത്ത് കേന്ദ്രം കൊള്ളയടിക്കുന്നു എന്ന മുഖ്യമന്ത്രിയുടെ ആരോപണം പിൻവലിച്ച് അദ്ദേഹം മാപ്പ് പറയണമെന്നും ശോഭാ സുരേന്ദ്രൻ വാർത്താസമ്മേളനത്തിൽ ആവശ്യപ്പെട്ടു.

കേന്ദ്ര ബജറ്റിൽ പ്രഖ്യാപിച്ച ധാതുമണൽ ഇടനാഴി രാജ്യത്തിന്റെ പൊതുസമ്പത്ത് സംരക്ഷിക്കാനാണെന്നും ശോഭ വ്യക്തമാക്കി. യുപിഎ സർക്കാരിന്റെ കാലത്ത് ഈ മേഖലയിൽ സ്വകാര്യ കമ്പനികളുടെ കൊള്ളയാണ് നടന്നതെന്നും എന്നാൽ രാജ്യത്തിന്റെ ധാതുസമ്പത്ത് കേന്ദ്രത്തിന് അവകാശപ്പെട്ടതാണെന്നും അവർ പറഞ്ഞു. മൈനർ മിനറൽസിൽ ഏതൊക്കെയാണ് കേരളത്തിന് അവകാശപ്പെട്ടതെന്ന് ജനങ്ങളോട് വ്യക്തമാക്കാൻ വ്യവസായ മന്ത്രി പി. രാജീവ് തയ്യാറാകണമെന്നും അവർ വെല്ലുവിളിച്ചു.

Also Read: വി.ഡി. സതീശനുമായി വ്യക്തിപരമായ വിരോധം മാത്രം, സമദൂര നിലപാടിൽ മാറ്റമില്ല: ജി. സുകുമാരൻ നായർ

കാസർകോട് കിണാനൂർ കരിന്തളത്തെ ബോക്സൈറ്റ് ഖനനവുമായി ബന്ധപ്പെട്ട് ഗുരുതരമായ ആരോപണങ്ങളാണ് ശോഭ ഉന്നയിച്ചത്. 50 ശതമാനത്തിലധികം അലൂമിനിയം അംശമുള്ള ബോക്സൈറ്റ് ചുവന്ന മണ്ണെന്ന പേരിൽ ഇൻവോയ്സ് ചെയ്ത് ഗോവ വഴി ചൈനയിലേക്ക് കടത്തുകയായിരുന്നുവെന്ന് അവർ ആരോപിച്ചു. വലിയ ജനകീയ സമരങ്ങൾക്കൊടുവിലാണ് ആ കമ്പനി പൂട്ടിയത്. ഈ ധാതുക്കൾ മലബാർ സിമന്റ്സിന് അസംസ്‌കൃത വസ്തുക്കളായി ഉപയോഗിക്കാമായിരുന്നിട്ടും നിലവിൽ തമിഴ്‌നാട്ടിൽ നിന്നാണ് അവ വാങ്ങുന്നതെന്നും ശോഭ ചൂണ്ടിക്കാട്ടി.

കേരളത്തിലെ ക്ലേ, ടൈറ്റാനിയം വ്യവസായങ്ങളുടെ തകർച്ചയെക്കുറിച്ചും അവർ ആശങ്ക പ്രകടിപ്പിച്ചു. മാടായിപ്പാറയിലും പഴയങ്ങാടിയിലും ആവശ്യത്തിന് ക്ലേ ഉണ്ടായിട്ടും ഇൻഡ്യൻ ഇംഗ്ലീഷ് ക്ലേയ്സ്, കുണ്ടറ ക്ലേയ്സ് തുടങ്ങിയ കമ്പനികൾ പൂട്ടിപ്പോയി. ചവറയിലെ കെ.എം.എം.എല്ലിൽ ടൈറ്റാനിയം ഡയോക്സൈഡ് കെട്ടിക്കിടക്കുമ്പോൾ പെയിന്റ് നിർമ്മാണ കമ്പനികൾ അസംസ്‌കൃത വസ്തുക്കൾ ഇറക്കുമതി ചെയ്യുകയാണ്. തൊഴിൽ സാധ്യതകൾ ഇല്ലാതാക്കുന്ന ഇത്തരം നടപടികൾ തിരുത്തണമെന്നും ബിജെപി നേതാവ് ആവശ്യപ്പെട്ടു. ബിജെപി നോർത്ത് ജില്ലാ പ്രസിഡന്റ് കെ.കെ. വിനോദ് കുമാർ, ജനറൽ സെക്രട്ടറി ടി.സി. മനോജ് എന്നിവരും പങ്കെടുത്തു

The post “മന്ത്രി റിയാസിന് നടക്കാൻ വയ്യാത്ത ആളല്ലല്ലോ, നേരിട്ട് പോയി ആവശ്യങ്ങൾ ചോദിച്ചുകൂടെ?” ശോഭാ സുരേന്ദ്രൻ appeared first on Express Kerala.