കൊച്ചി : തുർക്കിയിലെ ഇസ്താംബുളിലെത്തിയെങ്കിലും നഗരം സന്ദർശിക്കാനായില്ലെന്ന് സിപിഎം സംസ്ഥാന കമ്മിറ്റി അംഗം ചിന്താ ജെറോം..സിറ്റി ടൂർ നടത്തണമെന്ന ആഗ്രഹത്തോടെയാണ് വന്നതെങ്കിലും ട്രാൻസിറ്റ് വിസ ഇല്ലാത്തതിനാൽ അതിന് സാധിക്കാതെ വിമാനത്താവളത്തിൽ തന്നെ കഴിയുകയായിരുന്നുവെന്നും ചിന്താ ജെറോം പറഞ്ഞു.
‘ ഇസ്താംബുൾ ശരിക്കും കാണേണ്ട സ്ഥലമാണ് . എയർപോർട്ടിനു പുറത്തിറങ്ങി സിറ്റി ടൂർ നടത്തണമെന്ന ആഗ്രഹമുണ്ടായിരുന്നു. ടർക്കിഷ് എയർലൈൻസിന് അങ്ങനെയോരു പാക്കേജുമുണ്ട്. എന്നാൽ ഞങ്ങളാരും ട്രാൻസിറ്റ് വിസ എടുത്തിട്ടില്ലായിരുന്നു. അതിനാൽ തന്നെ എയർപോർട്ടിൽ തന്നെ ഇരിക്കുകയാണ് .
ട്രാൻസിറ്റ് വിസ എടുക്കാത്തത് ഒരു നഷ്ടമാണെന്ന് 14 മണിക്കൂറിനിടെ മനസിലായി . കുഞ്ഞിലെ മുതലേ കേൾക്കുന്നതല്ലേ , ഹിസ്റ്ററിയിലൊക്കെ പഠിക്കുകയും ചെയ്തു. കോൺസ്റ്റാന്റിനോപ്പിൾ, സിറ്റി ഒഫ് സെവൻ ഹിൽസ്. പക്ഷെ ഇപ്പോൾ എയർപോർട്ടിൽ നിൽക്കാനേ സാധിക്കുന്നൂള്ളൂ.
മറ്റൊരവസരത്തിൽ ഇസ്താംബൂളിലിറങ്ങി നാട് കാണാൻ സാധിക്കുമെന്നാണ് പ്രതീക്ഷ . മാത്രമല്ല ഇവിടുത്തെ ആഹാരവും ഏറെ പ്രത്യേകതയുള്ളതാണ് . കൊല്ലത്തെ ജില്ലാ കമ്മിറ്റി ഓഫീസിനടുത്ത് ഇസ്താംബുൾ ഗ്രിൽസ് ഉണ്ട്. ഞങ്ങൾ ഇടയ്‌ക്ക് അവിടെ പോകാറുണ്ട്. ആ രുചി തന്നെയാണോ എന്നറിയാൻ ഇവിടുത്തെ ആഹാരം കഴിച്ചു നോക്കണം . 14 മണിക്കൂറിന് ശേഷം ഹവാനയിലേയ്‌ക്ക് പോവുകയാണ്’- ഫേസ്‌ബുക്ക് വീഡിയോയിൽ ചിന്ത ജെറോം പറഞ്ഞു.
