കോഴിക്കോട്: ഇന്ത്യന് വോളിബോളിന്റെ പവര്ഹൗസാണ് കേരളം. എന്നാല് കേരള വോളിയുടെ പവര് ഹൗസാണ് തൃശൂര് പേരാമംഗലത്തുള്ള ശ്രീദുര്ഗ്ഗാ വോളിബോള് അക്കാദമി. ഇത്തവണ ഉത്തര്പ്രദേശിലെ വാരാണസിയില് നടക്കുന്ന 72-ാമത് ദേശീയ സീനിയര് വോളിബോള് ചാമ്പ്യന്ഷിപ്പില് കളിക്കുന്ന കേരള പുരുഷ ടീമിലെ അഞ്ച് പേര് ഒരു കോച്ചിന്റെ കീഴില് കളി പഠിച്ചുവന്നവരാണ്. അതില് മൂന്ന് പേര് ഒരേ അക്കാദമിയില് നിന്നുള്ളവരും.
തൃശൂര് ജില്ലയിലെ പേരാമംഗലം ശ്രീദുര്ഗ്ഗാ വോളിബോള് അക്കാദമിയില് നിന്ന്. പി. ശിവകുമാര് എന്ന കേരള വോളിബോളിലെ ദ്രോണാചാര്യനായ കോച്ചാണ് ഇവരുടെ കഴിവുകള് തേച്ചുമിനുക്കി മികച്ച താരങ്ങളാക്കി വാര്ത്തെടുത്തത്. കൂടാതെ മറ്റ് രണ്ട് ശിഷ്യര് സര്വീസസിനുവേണ്ടിയും ഉത്തരാഖണ്ഡിനുവേണ്ടിയും കളിക്കുന്നുണ്ട്. രാഹുല്, ആനന്ദ്, നിഹാല്, ആദര്ശ്, ഹേമന്ദ്, എന്നിവരാണ് ശിവകുമാറിന്റെ ശിഷ്യന്മാരായി കേരള ടീമിലെത്തിയത്. ഇതില് രാഹുല്, ആനന്ദ്, നിഹാല് എന്നിവരാണ് ശ്രീദുര്ഗ്ഗാ അക്കാദമിയില് നിന്നും സംസ്ഥാന ടീമിലേക്ക് എത്തിയത്. ആദര്ശ്, ഹേമന്ദ് എന്നിവര് തൃപ്രയാറിലെ കേരള വോളിബോള് അക്കാദമിയില് എലൈറ്റ് സ്കീമില് ശിവകുമാര് കോച്ചായിരിക്കെ ശിഷ്യന്മാരായിരുന്നു. മറ്റൊരു താരമായ ദിപു വേണുഗോപാല് സര്വീസസിനുവേണ്ടിയും നിവേദ് ഉത്തരാഖണ്ഡിനുവേണ്ടിയും കളിക്കുന്നു. ഈ ചാമ്പ്യന്ഷിപ്പില് കളിക്കുന്ന കേരള വനിതാ ടീമിന്റെ സഹപരിശീലകന് കൂടിയായ പി. ശിവകുമാര്
വിവിധ കാറ്റഗറിയിലായി 22ലേറെ ചാമ്പ്യന്ഷിപ്പുകളില് കേരള ടീമിന്റെ പരിശീലകനായിരുന്നു.
പേരാമംഗലം ശ്രീദുര്ഗ്ഗാവിലാസം ഹൈസ്കൂളില് 2006ലാണ് ശിവകുമാര് അക്കാദമി തുടങ്ങുന്നത്. 100 ലേറെ താരങ്ങള് അക്കാദമിയില് താമസിച്ച് പരിശീലനം നടത്തുന്നു. ഈ അക്കാദമിയില് നിന്ന് വിവിധ വിഭാഗങ്ങളിലായി 150ലേറെ താരങ്ങള് കേരള ടീമിനായി കളിച്ചു. ദേശീയ ജേഴ്സിയണിഞ്ഞ താരങ്ങളും ഈ അക്കാദമിയില് നിന്ന് പിറവിയെടുത്തു. കോച്ചിങ്ങില് എഫ്ഐവിബി ലെവല് ഫസ്റ്റ്, സെക്കന്ഡ് സര്ട്ടിഫിക്കറ്റും ശിവകുമാര് നേടിയിട്ടുണ്ട്. നിലവില് തൃശൂര് ജില്ലാ വോളിബോള് അസോസിയേഷന് പ്രസിഡന്റുകൂടിയാണ് പി. ശിവകുമാര്.
കഴിഞ്ഞ വര്ഷം നടന്ന പ്രൈം വോളിബോള് ലീഗിലും ശിവകുമാറിന്റെ താരങ്ങള് മികച്ച പ്രകടനം നടത്തി. ലിബറോ ഫാക്ടറി എന്ന പേരിലാണ് ശിവകുമാറിന്റെ ശ്രീദുര്ഗ്ഗാ വോളിബോള് അക്കാദമി അറിയപ്പെടുന്നത്. ലീഗില് ലിബറോയായി കളിക്കാനിറങ്ങിയ അഞ്ച് താരങ്ങള് ശിവകുമാറിന്റെ ശിഷ്യന്മാരാണ്.
തൃശൂര് ജില്ലയിലെ പേരാമംഗലത്താണ് പി. ശിവകുമാറിന്റെ താമസം. ഭാര്യ മിനി ശിവകുമാര്. മക്കള്: കിരണ് (ചാര്ട്ടേഡ് അക്കൗണ്ടന്റ്, കോഴിക്കോട്്), വരുണ് (ജനറല് ഇലക്ട്രിക്, ബെംഗളൂരു).
