കണ്ണൂര്‍: സൂപ്പര്‍ ലീഗ് കേരളയിലെ കണ്ണൂരിന്റെ സ്വന്തം കണ്ണൂര്‍ വാരിയേഴ്സിന്റെ 2025-26 സീസണിലെ പരിശീലന ഗ്രൗണ്ടായി കണ്ണൂര്‍ പോലീസ് പരേഡ് ഗ്രൗണ്ട് തിരഞ്ഞെടുത്തു. പരേഡ് ഗ്രൗണ്ടിലെ സിന്തറ്റിക് ട്രാക്ക് കം ഫുട്ബോള് ഗ്രൗണ്ട് കേരള പോലീസ് സ്പോര്‍ട്സ് ആന്‍ഡ് യൂത്ത് വെല്‍ഫെയര്‍ സൊസൈറ്റിയുടെ ഫണ്ട് ഉപയോഗിച്ച് അടുത്തിടെയാണ് പണിപൂര്‍ത്തിയാക്കിയത്. സംസ്ഥാന സ്‌കൂള്‍ കായികമേളകള്‍ക്കും പോലീസ് ഗെയിംസിനും പോലീസ് കായിക മേളകള്‍ക്കും പോലീസ് പരേഡ് ഗ്രൗണ്ട് വേദിയാകാറുണ്ട്.
ത്രിദിന ക്യാമ്പ് പൂര്‍ത്തിയായി
കണ്ണൂര്‍ വാരിയേഴ്സ് ഫുട്ബോള് ക്ലബിന്റെ ത്രിദിന ഫുട്ബോള് പരിശീലന ക്യാമ്പ് പോലീസ് പരേഡ് ഗ്രൗണ്ടില്‍ പൂര്‍ത്തിയായി. മൂന്ന് ദിവസം നീണ്ടു നിന്ന പരിശീലനത്തിന് കണ്ണൂര്‍ വാരിഴേയ്സിന്റെ സഹപരിശീലകന്‍ ഷഫീഖ് ഹസ്സന്‍ നേതൃത്വം നല്‍കി. വിവിധ ജില്ലകളില്‍ നിന്നായി തിരഞ്ഞെടുത്ത ഫൂട്ബോള്‍ താരങ്ങളാണ് ക്യാമ്പില്‍ പങ്കെടുത്തത്. കേരളത്തിലെ യുവ ഫുട്ബോള് പ്രതിഭകളെ കണ്ടെത്തി സൂപ്പര്‍ ലീഗ് കേരളയിലെ ടീമുകളില്‍ കളിക്കാന്‍ അവസരമൊരുക്കുക എന്ന ലക്ഷ്യത്തോടെ സൂപ്പര്‍ ലീഗ് കേരള അവതരിപ്പിച്ച ‘ഗെയിംചേഞ്ചര്‍’ സംസ്ഥാനതല ടാലന്റ് സ്‌കൗട്ടിംഗ് പദ്ധതിയുടെ ഭാഗമായിയാണ് പരിശീലനം ഒരുക്കിയത്.
ക്യാമ്പില്‍ മികച്ച പ്രകടനം കാഴ്‌ച്ചവെച്ചവരെ നാളെ സീനിയര്‍ ടീമിനൊപ്പം പരിശീലിപ്പിക്കുമെന്ന് ഷഫീഖ് ഹസ്സന്‍ പറഞ്ഞു. കണ്ണൂര്‍ ജില്ലയില്‍ നിന്ന് മാത്രം പത്ത് താരങ്ങള്‍ ക്യാമ്പില്‍ ഉണ്ടായിരുന്നു.
നാളെയാണ് കണ്ണൂര്‍ വാരിയേഴ്സ് സീനിയര്‍ ടീം പരിശീലനം ആരംഭിക്കുക. ടീമില്‍ നിലവില്‍ അഞ്ച് കണ്ണൂര്‍ താരങ്ങളുണ്ട്. ഗോള്‍ കീപ്പര്‍മാരായ ഉബൈദ് സി.കെ., മിഥുന്‍ വി, പ്രതിരോധ താരങ്ങളായ സച്ചിന്‍ സുനി, അശ്വിന്‍ കുമാര്‍, വിങ്ങര്‍ മുഹമ്മദ് സനാദ് എന്നിവരാണ് ടീമിലെ കണ്ണൂര്‍ താരങ്ങള്‍. സൂപ്പര്‍ ലീഗ് കേരളയുടെ ആദ്യ സീസണില്‍ സെമി ഫൈനലിലെത്തിയ കണ്ണൂര്‍ ഇത്തവണ കിരീടം നേടുക എന്ന ലക്ഷ്യത്തോടെയാണ് ഒരിങ്ങിക്കൊണ്ടിരിക്കുന്നത്. വരുന്ന സൂപ്പര്‍ ലീഗ് കരേളയില്‍ കണ്ണൂര്‍ സ്വന്തം ഗ്രൗണ്ടിലായിരിക്കും ഹോം മത്സരങ്ങള്‍ കളിക്കുക. കഴിഞ്ഞ വര്‍ഷം കോഴിക്കോട് കോര്‍പ്പറേഷന്‍ സ്റ്റേഡിയത്തിലാണ് കണ്ണൂരിന്റെ ഹോം മത്സരങ്ങള്‍ കളിച്ചത്.
