സമര്‍ഖണ്ഡ്: പ്രജ്ഞാനന്ദയുടെ സഹോദരി വൈഖാലി ഫിഡെ ഗ്രാന്‍റ് സ്വിസ് വനിതാ ചാമ്പ്യനായി. പതിനൊന്നാം റൗണ്ടിലെ അവസാന മത്സരത്തില്‍ മുന്‍ വനിതാ ലോകചാമ്പ്യനായ ചൈനയുടെ ടാന്‍ സോംഗിയെ സമനിലയില്‍ കുരുക്കിയതോടെയാണ് എട്ട് പോയിന്‍റുകളുമായി വൈശാലി ചാമ്പ്യനായത്. ഒരു ഇന്ത്യന്‍ വനിതാ ചെസ് താരം രണ്ട് തവണ ഫിഡെ ഗ്രാന്‍റ് സ്വിസില്‍ ചാമ്പ്യനാകുന്നത് ഇതാദ്യം.
ഒമ്പതാം റൗണ്ടില്‍ രണ്ടാം സ്ഥാനത്തേക്ക് പിന്തള്ളപ്പെട്ട വൈശാലി പത്താം റൗണ്ടില്‍ ഗംഭീരതിരിച്ചുവരവ് നടത്തി വീണ്ടും ഒന്നാം സ്ഥാനത്തേക്കുയര്‍ന്നു. വൈശാലി പത്താം റൗണ്ടില്‍ ഉസ്ബെക് താരം മരിയ മ്യൂസിചുകിനെ തോല്‍പിക്കുകയായിരുന്നു. സിസിലിയന്‍ ഡിഫന്‍സ് ഓപ്പണിംഗിലെ സ്വെഷ്നിക്കോവ് വേരിയേഷനിലാണ് വൈശാലി മുന്‍ ലോകചാമ്പ്യന്‍കൂടിയായ മ്യൂസിചുകിനെ തോല്‍പിച്ചത്. ഇതോടെ ഏഴര പോയിന്‍റോടെ ഉക്രൈന്റെ കാറ്ററിന ലഗ്നോയ്‌ക്കൊപ്പം വൈശാലി ഒന്നാം സ്ഥാനത്ത് നില്‍ക്കുകയായിരുന്നു. പക്ഷെ അവസാനത്തേതും പതിനൊന്നാമത്തേതുമായ റൗണ്ടില്‍ വൈശാലി കറുത്ത കരുക്കള്‍ കൊണ്ട് കളിച്ചെങ്കിലും സമനില നേടിയതോടെയാണ് എട്ട് പോയിന്‍റ് നേടി ചാമ്പ്യനായത്. കാറ്ററിന ല ഗ്നോ തന്റെ 11ാം റൗണ്ട് മത്സരത്തില്‍ ഉള്‍വിയയുമായി സമനില പാലിച്ചിരുന്നു. പക്ഷെ ടൈബ്രേക്കറില്‍ വൈശാലി കാറ്ററിനയെ തോല‍്പിച്ചു.
തുടര്‍ച്ചയായി രണ്ടാം തവണയാണ് വൈശാലി ഫിഡെ ഗ്രാന്‍റ് സ്വിസ് ചാമ്പ്യനാകുന്നത്. 2023ലും വൈശാലി തന്നെയായിരുന്നു കിരീടം നേടിയത്. ഇത്തവണ ഫിഡെ ഗ്രാന്‍റ് സ്വിസ് ചാമ്പ്യനായതോടെ വൈശാലി കാന്‍ഡിഡേറ്റ് ടൂര്‍ണ്ണമെന്‍റില്‍ പങ്കെടുക്കാന്‍ യോഗ്യത നേടി. നിലവിലുള്ള വനിതാ ലോകചാമ്പ്യനുമായി മത്സരിക്കാനുള്ള കാന്‍ഡിഡേറ്റിനെ തെരഞ്ഞെടുക്കാനുള്ള ടൂര്‍ണ്ണമെന്‍റാണ് കാന്‍ഡിഡേറ്റ് ടൂര്‍ണ്ണമെന്‍റ്. ഇക്കുറി ഇന്ത്യയില്‍ നിന്നും മൂന്ന് വനിതകള്‍ കാന്‍ഡിഡേറ്റിലേക്ക് തെരഞ്ഞെടുക്കപ്പെട്ടിട്ടുണ്ട്- വൈശാലി, ഹംപി, ദിവ്യ ദേശ്മുഖ് എന്നിവര്‍.
